الیکشن کمیشن ارکان دی تقرری، سپیکر تے چیئرمین سینیٹ نوں دس دن دی ہور مہلت

اسلام آباد: اسلام آباد ہائی کورٹ نے الیکشن کمیشن ارکان دی تقرری دے معاملے تے سپیکر قومی اسمبلی تے چیئرمین سینیٹ نوں ہور دس دن دی مہلت دے دتی۔

چیف جسٹس اطہر من اللہ دی سربراہی وچ اسلام آباد ہائی کورٹ دے سنگل بنچ نے وفاقی حکومت ولوں الیکشن کمیشن دے دو ارکان دی تقرری دے خلاف درخواست دی سماعت کیتی۔

وفاق نے الیکشن کمیشن دے دو ممبران دی تعیناتی لئی ہور 10دن دے ویلے دی استدعا کیتی۔ عدالت نے استدعا منظور کردیاں سپیکر قومی اسمبلی تے چیئرمین سینیٹ نوں دس دناں وچ معاملہ حل کران دی ہدایت کردیاں آکھیا 31دسمبر دن ساڈھے دس وجے تک رپورٹ جمع کرائی جاوے۔ چیف جسٹس اطہر من اللہ دا کہنا سی اہم معاملہ اے، اسیں ہور ویلا دے دیواں گے، پارلیمنٹ ای سپریم اے، ایہ معاملہ پارلیمنٹ نے ای حل کرنا اے۔

قائد ایوان تے قائد حزب اختلاف اگے آ کے معاملہ حل کرن۔ جسٹس اطہر من اللہ دا کہنا سی الیکشن اک اہم ادارہ اے۔

الیکشن کمیشن وچ اجہیا بندہ لایا جاندا اے جہدے تے عوام دا اعتبار ہووے۔کیہ تہانوں اک وی اجہیا بندہ نہیں مل رہیا؟ سانوں فیر وی پارلیمنٹ تے اعتبار اے کہ معاملہ حل کر لوے گی۔ شاید پارلیمنٹ انتہائی موزوں بندہ لبھ رہی اے، ایس لئی ویلا لگ رہیا اے۔

اپنا تبصرہ گھلو