سانحہ پی آئی سی: گرفتار ہون والے ہور 8وکیلاں نوں جوڈیشل ریمانڈ تے جیل گھل دتا

لہور: انسداد دہشت گردی دی خصوصی عدالت نے سانحہ پی آئی سی توں گرفتار ہور 8وکیلاں نوں جوڈیشل ریمانڈ تے جیل گھل دتا۔

انسداد دہشت گردی دی خصوصی عدالت نمبر 1دے جج ارشد حسین بھٹہ نے حکم جاری کیتا۔ پلس نے عدالتی ویلا ختم ہون تے ہور 8وکیلاں نوں جسمانی ریمانڈ لئی انسداد دہشت گردی دی خصوصی عدالت وچ پیش کیتا۔

غلام مرتضیٰ چودھری سینئر نائب صدر سپریم کورٹ بار نے ایس موقع تے میڈیا نال گل کردیاں آکھیا پلس نے 5وجے دے بعد ملزم وکیلاں نوں عدالت وچ پیش کر دتا۔ عدالت نے 8وکیلاں نوں جوڈیشل ریمانڈ تے جیل گھلن دا حکم دے دتا اے۔ اوہناں دا کہنا سی پلس نے ہور جسمانی ریمانڈ منگیا پر عدالت نے جوڈیشل کر دتا۔

سانوں ریکارڈ فراہم نہیں کیتا گیا تے ساڈے ساہمنے عدالت دے ساہمنے وی کوئی تفتیشی رپورٹ پیش نہیں کیتی۔ ساڈے عدالت توں باہر آن دے بعد شاید پلس عدالت دے ساہمنے کجھ پیش کر دیوے۔

اپنا تبصرہ گھلو