پرویز مشرف دی سزائے موت دے فیصلے تے مسلح افواج دا غم و غصے دا اظہار


راولپنڈی: ترجمان پاک فوج دے مطابق سابق صدر و آرمی چیف پرویز مشرف دے خلاف خصوصی عدالت دے فیصلے تے مسلح افواج نے غم و غصے دا اظہار کیتا اے۔ ترجمان افواج پاکستان ولوں جاری بیان وچ آکھیا گیا اے خصوصی عدالت دے فیصلے تے افواج پاکستان وچ شدید غم و غصہ تے اضطراب اے، جنرل (ر) پرویز مشرف آرمی چیف، چیئرمین جوائنٹ چیفس آف سٹاف کمیٹی تے صدر پاکستان رہے نیں، اوہناں نے 40ورھیاں توں ودھ پاکستان دی خدمت کیتی تے ملک دے دفاع لئی جنگاں لڑیاں نیں۔ترجمان افواج پاکستان نے بیان وچ آکھیا جنرل (ر) پرویز مشرف کسے صورت وی غدار نہیں ہو سکدے، کیس وچ آئینی تے قنونی تقاضے پورے نہیں کیتے گئے جد کہ پرویز مشرف نوں اپنے دفاع دا بنیادی حق وی نہیں دتا گیا۔ ڈی جی آئی ایس پی آر میجر جنرل آصف غفور نے بیان وچ آکھیا عدالتی کاروائی شخصی بنیاد تے کیتی گئی جد کہ کیس نوں عجلت وچ نبیڑیا گیا اے، افواج پاکستان توقع کردیاں نیں کہ جنرل پرویز مشرف نوں آئین پاکستان دے تحت انصاف دتا جاوے گا۔

اپنا تبصرہ گھلو