تحقیقی بنیاد تے جج مقدمے دے سارے پہلوواں دا جائزہ لے سکدا اے: چیف جسٹس

اسلام آباد: چیف جسٹس آف پاکستان جسٹس آصف سعید کھوسہ آکھیا اے تحقیقات دے بل بوتے تے قوماں ترقی کردیاں نیں۔

تحقیقی بنیاد تے جج مقدمے دے سارے پہلوواں دا جائزہ لے سکدا اے۔ اسلام آباد وچ اک تقریب نال خطاب وچ چیف جسٹس آصف سعید کھوسہ آکھیا کسے معاشرے دے اقدار جانے بغیر اصلاحات دا عمل بے اثر اے۔

ججز، وکلاء تے عملے دی تربیت تے توجہ دے رہے آں۔ اوہناں دا کہنا سی قبائلی ضلعیاں وچ بہترین ججز تے پلس افسراں نوں گھلیا جا رہیا اے، اوتھے بہترین وکیلاں نوں وی پریکٹس لئی جانا چاہیدا اے۔

ریسرچ پروگرامز دی حوصلہ افزائی ہونی چاہیدی اے۔ نویں چیزاں دے مشاہدے نال تسیں بہت کجھ سکھ سکدے او۔ چیف جسٹس آکھیا دہشت گردی پاکستان نہیں سگوں پوری دنیا دا مسئلہ اے۔

دہشت گردی دی تریخ ہزاراں ورھے پرانی اے۔ سپریم کورٹ دہشت گردی دی تعریف بارے فیصلہ دے چکی اے۔

اوہناں آکھیا سیاسی تے مذہبی مقاصد لئی دنیا بھر وچ تشدد دے طریقے اپنائے جاندے رہے۔ روس دے خلاف جنگ کرن والیاں نوں مغرب نے مجاہدین قرار دتا پر نائن الیون دے بعد ایہناں نوں دہشت گرد قرار دے دتا گیا۔