فیصلہ مشکوک، اعلیٰ عہدیاں تے موجود لوکاں نے مینوں ٹارگٹ کیتا: پرویز مشرف

دبئی: سابق صدر جنرل ریٹائرڈ پرویز مشرف نے خصوصی عدالت دے فیصلے نوں مشکوک قرار دیندیاں آکھیا اجہے فیصلے دی پہلے کوئی مثال نہیں ملدی، ملزم تے نہ ایہدے وکیل نوں دفاع دا حق دتا گیا۔

سابق صدر پرویز مشرف ولوں جاری بیان وچ آکھیا گیا اے میں خصوصی عدالت دا فیصلہ ٹی وی تے سنیا۔

میں ایس فیصلے نوں مشکوک کہنا آں۔ کیس وچ صرف اک بندے نوں ٹارگٹ کیتا گیا۔ اوہناں دا کہنا سی میں پاکستانی عدلیہ دا بہت احترام کرنا آں پر خصوصی عدالت دا اجہیا فیصلہ پہلی واری سنیا اے۔

میں آکھیا سی سپیشل کمیشن نوں بیان دین لئی تیار آں پر میری ایس گل نوں نظر انداز کردیاں ہوئیاں میرا بیان نہیں لیا گیا۔پرویز مشرف آکھیا اوہناںلوکاں نے مینوں ٹارگٹ کیتا جہڑے اعلیٰ عہدیاں تے فائز نیں۔ کجھ لوکاں دی ذاتی عدالت دی وجہ توں کیس سنیا گیا۔ ٹارگٹ کرن والیاں نے اپنے عہدیاں دا غلط استعمال کیتا۔

میرے دور وچ فائدہ چُکن والے جج میرے خلاف کیویں فیصلہ دے سکدے نیں؟ اپنی منشا دے مطابق واقعات نوں چناؤ ظاہر کردا اے کہ ایہ لوک کیہ چاہندے نیں۔

سابق صدر دا کہنا سی میری خدمات نوں یاد رکھن تے فوج تے عوام دا شکر گزار آں۔ میں ایس تمغے نوں اپنے نال قبر وچ لے کے جاواں گا۔ اوہناں آکھیا کیس وچ قنون دی بالادستی دا خیال نہیں رکھیا گیا۔ آئندہ دے لائحہ عمل دا فیصلہ قنونی ٹیم نال مشاورت مگروں کراں گا۔

عدالت تے اعتماد تے آس اے کہ قنون دی بالادستی نوں مدنظر رکھن گے۔

اپنا تبصرہ گھلو