پرویز مشرف خلاف فیصلہ کسے وی تہذیب تے اقدار توں بالاتر اے: ترجمان پاک فوج

راولپنڈی: پاک فوج دے ترجمان میجر جنرل آصف غفور آکھیا اے خصوصی عدالت دا فیصلہ کسے وی تہذیب تے اقدار توں بالاتر اے، ساڈے خدشات ٹھیک ثابت ہو گئے۔

سانوں دشمن تے اوہناں دے سہولت کاراں دی وی سمجھ اے۔ ڈی جی آئی ایس پی آر میجر جنرل آصف غفور دا انتہائی اہم پریس کانفرنس کردیاں کہنا سی سابق صدر جنرل (ر) پرویز مشرف دے خلاف مختصر فیصلے تے جہڑے خدشات دا اظہار کیتا گیا، اوہ ہن تفصیلی فیصلے ٹھیک ثابت ہو رہے نیں۔

اج دا فیصلہ کسے وی تہذیب تے اقدار توں بالاتر اے۔ میجر جنرل آصف غفور دا کہنا سی اسیں ملکی استحکام لئی بہت لما سفر کیتا جہڑا کم دنیا دی فوج نہیں کر سکی، اوہ افواج پاکستان نے کر وکھایا۔ فوج تے سرکار رل کے ملک نوں مستحکم بنانا چاہندے نیں۔

ملکی استحکام نوں کسے صورت ریورس نہیں ہون دیواں گے۔ اوہناں دا کہنا سی اندرونی تے بیرونی مسئلیاں وچ الجھا کے آپس وچ لڑایا جا رہیا اے۔

عوام افواج پاکستان تے اعتماد رکھن، کسے صورت انتشار نہیں پھیلن دیواں گے۔ اسیں اپنے ودھدے ہوئے قدم توں پچھے نہیں ہٹاں گے۔ بیرونی دشمناں نوں نکام بناواں گے۔ ترجمان پاک فوج آکھیا کجھ لوک سانوں شکست دین دا خواب ویکھ رہے نیں ، جہڑا کدی کامیاب نہیں ہووے گا۔

موجودہ ڈیزائن ملک دشمن قوتاں دا چل رہیا اے، ایہدا وی مقابلہ کراں گے۔ پاکستان نوں داخلی طور تے کمزور کرن دیاں سازشاں اجے وی ہو رہیاں نیں۔

مک دشمن عناصر دے موجودہ عزائم نوں وی شکست دیواں گے۔اوہناں دا کہنا سی افوج پاکستان صرف ادارہ نہیں سگوں اک خاندان اے۔ افواج پاکستان نے بہت قربانیاں دتیاں تے ملکی سلامتی لئی جاناں قربان کرن دے حلف بردار آں۔

پاک فوج دے ترجمان آکھیا اسیں ملک تے ادارے دی عزت وقار دا دفاع وی بڑی چنگی طرح جاندے آں پر ساڈے لئی ملک پہلاں ادارہ بعد وچ اے۔

اسیں ملک تے ایہدی عزت دے وقار دا بھرپور دفاع کراں گے۔