آمدن توں ودھ اثاثیاں دا کیس: حمزہ شہباز دے جوڈیشل ریمانڈ وچ 3جنوری تک وادھا

لہور: احتساب عدالت نے آمدن توں ودھ اثاثہ جات کیس وچ حمزہ شہباز دے جوڈیشل ریمانڈ وچ 3جنوری تک توسیع کر دتی۔

وکیلاں دی ہڑتال تے سکیورٹی دی وجہ توں حمزہ شہباز نوں عدالت پیش نہ کیتا جا سکیا۔ حمزہ شہباز تے یوسف عباس دے خلاف احتساب عدالت نے سماعت شروع کیتی تے عدالت نے دوواں دے پیش نہ ہون تے برہمی دا اظہار کیتا تے استفسار کیتا کہ حمزہ شہباز تے یوسف عباس نوں عدالت وچ کیوں پیش نہیں کیتا۔

عدالت نوں آگاہ کیتا گیا کہ وکیلاں دی ہڑتال دی وجہ توں جوڈیشل ریمانڈ ہون تے ایہناں نوں پیش نہیں کیتا گیا۔ احتساب عدالت دے جج نے باور کرایا وکیلاں دی ہڑتال اے تے کیہ کسے نے ملزماں نوں پیش کرن توں روکیا اے۔

عدالت نے حمزہ شہباز تے یوسف عباس نوں پیش نہ کرن دا اقدام قنون دے منافی قرار دتا تے متعلقہ حکام نوں شوکاز نوٹس جاری کردتے۔ عدالت نے حکم دتا حمزہ شہباز تے یوسف عباس نوں تن جنوری نوں پیش کیتا جاوے۔