ملتان دیاں جیلاں وچ نیب دے ملزماں نوں بی کلاس نہ دین دا فیصلہ


ملتان: ڈی آئی جی جیل خانہ جات نے نیب حکام نوں پنج کروڑ دی کرپشن وچ ملوث ملزماں دی فہرستاں منگوان لئی تحریری درخواست گھل دتی۔ ڈسٹرکٹ تے سینٹرل جیل ملتان وچ نیب ملزماں دی تعداد60اے، پر نیب ملزماں توں جیلاں وچ بی کلاس نہ دین دے فیصلے تے عملدرآمد لئی ڈی آئی جی جیل خانہ جات ملک شوکت فیروز نے تحریری درخواست نیب حکام نوں گھل دتی اے۔

ایس درخواست وچ گھٹ توں گھٹ 50ملین دی کرپشن وچ ملوث ملزماں دی فہرست منگی گئی اے۔ جیل حکام دا کہنا اے کرپشن وچ ملوث ملزمان کسے وی رعایت دے مستحق نہیں، ایسے لئی بی کلاس نیب ملزماں نوں نہیں دتی جاوے گی۔

دوجے پاسے جیل وچ میوزیم دی تعمیر، ہسپتال دی اپ گریڈیشن تے جیل دی تزئین و آرائش لئی 40ملین دا تخمینہ لاگت لا کے کم شروع کر دتا گیا اے جد کہ قیدیاں دی فلاح و بہبود لئی وکیشنل ایجوکیشن دین دا سلسلہ وی جاری اے جہدے تے ملک شوکت فیروز دا کہنا اے جیلاں وچ قیدیاں دی اصلاح ترجیح اے۔

اپنا تبصرہ گھلو