جاندا نہیں بنگلہ دیش آخر ٹیسٹ میچاں لئی پاکستان کیوں نہیں آ رہیا: اظہر علی

لہور: پاکستان ٹیسٹ کرکٹ ٹیم دے کپتان اظہر علی دا کہنا اے نہیں جاندا کہ بنگلہ دیش آخر ٹیسٹ میچاں لئی پاکستان نہ آن دی وجہ کیہ اے۔ کراچی دے نیشنل سٹیڈیم وچ سری لنکا دے خلاف دوجے ٹیسٹ میچ جتن دے بعد پریس کانفرنس کردیاں اوہناں دا کہنا سی پاکستان وچ کئی ٹیماں آ کے کھیڈ چکیاں نیں، ورلڈ الیون دی ٹیم آئی، پاکستان سپر لیگ (پی ایس ایل) ہوئی، اہم کھڈاریاں نے دورہ کیتا، انٹرنیشنل کرکٹ ہو رہی اے، سری لنکا دی ٹیم اک وی نہیں دو ٹیسٹ میچ کھیڈ کے جا رہی اے ایس لئی مینوں تے سمجھ نہیں آ رہی کہ ٹیسٹ میچاں لئی پاکستان نہ آن دی کیہ وجہ اے۔ اظہر علی دا کہنا سی سری لنکا دے خلاف ٹیسٹ میچ تے سیریز وچ فتح تے قوم نوں مبارکباد دینا آں۔ مہمان ٹیم دے خلاف سیریز وچ فتح دی مجموعی کاوشاں دا نتیجہ اے جہدے تے سارے بہت خوش نیں۔