کراچی گرین لائن پراجیکٹ، وزیر ٹرانسپورٹ سندھ نے فروری وچ افتتاح دا دعویٰ رد کر دتا

کراچی: کراچی مین گرین لائن پراجیکٹ کدوں مکمل ہووے گا، وزیر ٹرانسپورٹ سندھ نے گورنر دے فروری وچ افتتاح بارے دعوے نوں رد کر دتا۔ پچھلے دیہاڑ گورنر سندھ عمران اسماعیل آکھیا سی 7فروری نوں گرین لائن منصوبے دا افتتاح ہو سکدا اے پر وزیر ٹرانسپورٹ سندھ اویس شاہ دا کہنا اے پراجیکٹ دا افتتاح 7فروری نوں نہیں ہو سکدا، اوہناں آکھیا وفاق پہلاں بساں لیاوے فیر اعلان کرے۔

جدوں بساں نہیں آئیاں، ٹریک مکمل نہیں ہویا تے وزیراعظم افتتاح کہدا کرن گے۔ ہور بولے گورنر صاحب چنگے بندے نیں جدوں چاہن بیان دے دیندے نیں۔ صوبائی وزیر دا کہنا سی جو وی بولیا جاوے سوچ سمجھ کے بولیا جاوے۔

گرین لائن بس منصوبے نوں سندھ حکومت نے مکمل سپورٹ کیتا اے۔ وفاق جہڑا اعلان کردا اے ایہدے تے یوٹرن نہ لوے، صوبائی وزیر ٹرانسپورٹ دا ہور کہنا سی وفاق جے نیت کر لوے تے ایس منصوبے نوں جلد مکمل کر لیا جاوے گا۔