پشاور ہائی کورٹ دا بی آر ٹی منصوبے دی تحقیقات دا حکم سپریم کورٹ وچ چیلنج

اسلام آباد: خیبر پختونخوا حکومت نے بی آر ٹی منصوبے وچ کرپشن دی تحقیقات بارے پشاور ہائی کورٹ دا حکم سپریم کورٹ وچ چیلنج کر دتا اے۔ بی آر ٹی منصوبے دی تحقیقات رکوان لئی سپریم کورٹ اسلام آباد تے پشاور رجسٹریز وچ وکھریاں وکھریاں درخواستاں دائر کیتیاں گئیاں نیں۔

صوبائی حکومت نے سپریم کورٹ دی پشاور رجسٹری وچ درخواست دائر کیتی اے جد کہ پشاور ڈویلپمنٹ اتھارٹی ولوں وکیل مخدوم علی خان دے ذریعے اسلام آباد وچ رجسٹری وچ حکمنامہ چیلنج کیتا گیا اے۔ دوواں درخواستاں وچ پشاور ہائی کورٹ دا فیصلہ معطل کرکے ایف آئی اے نوں بی آر ٹی دی تحقیقات توں روکن دا حکم دین دی استدعا کیتی گئی اے۔

درخواستاں وچ موقف اپنایا گیا اے پشاور ہائی کورٹ دا حکم خلاف قنون اے، عدالت عالیہ نے حقائق دا ٹھیک طریقے جائزہ نہیں لیا، پشاور ہائی کورٹ دے تحقیقات کران دے فیصلے نوں کالعدم قرار دتا جاوے جد کہ سپریم کورٹ وچ درخواستاں تے فیصلے توں پہلاں ایف آئی اے نوں انکوائری توں روکیا جاوے۔