2020ء وچ معیشت بہتر، نوکریاں پیدا کراں گے: وزیراعظم عمران خان

اسلام آباد: وزیراعظم عمران خان دا کہنا اے میرٹ دے نظام تے چل کے ای ملک ترقی ول جا سکدا اے، اداریاں وچ اصلاحات کرکے ہور بہتری لیاواں گے۔ 2019ء وچ حکومت معیشت وچ استحکا م لیائے، 2020وچ حکومت معیشت نوں ہور بہتری لیاوے گی، عوام لئی نوکریاں پیدا کراں گے۔ پاکستان پوسٹ دے ذریعے ترسیلاب زر گھلن دی سکیم دا افتتاح دی تقریب نال خطاب کردیاں وزیراعظم دا کہنا سی اوورسیز پاکستانی بیرون ملک محنت کردے نیں، سانوں ایہناں دی قدر کرنی چاہیدی اے، اوورسیز پاکستانیاں دے مسئلے چنگی طرح سمجھنا آں، بیرون ملک رہن والے پاکستانی ساڈا قیمتی سرمایہ نیں۔

جدوں توں ساڈی حکومت آئی سارے سفیراں نوں پاکستانیاں دا خیال رکھن دی ہدایت کیتی اے، اوہناں دا کنا سی گورنمنٹ لوکاں لئی ہوندی اے جہدا کم عوام دے مسئلے حل کرنا ہوندا اے، جمہوریت تے بادشاہت وچ بہت فرق ہوندا اے، جمہوریت وچ لوکاں دی خدمت کیتی جاندی اے جد کہ بادشاہت وچ صرف بادشاہت دی خدمت کیتی جاندی اے۔ عمران خان دا کہنا سی بدقسمتی نال ساڈی حکومتاں نے اداریاں دا مائنڈ سیٹ تبدیل نہیں کیتا، سرکاری دفاتر وچ جدوں لوک کم کروان جاندے نیں تے اوتھے سرکاری افسر کسے دا احسان سمجھ کے ایہناں نوں ڈیل کردے سن۔ پاکستان پوسٹ وانگوں عوام لئی آسانیاں پیدا کرنا چاہندے نیں۔

وزیراعظم دا کہنا سی سرکاری سکولاں وچ وی سہولتاں لیانا چاہنے آں جیویں پرائیویٹ اداریاں وچ طلبہ نوں تعلیم دتی جاندی اے۔ لوکاں دا مائنڈ سیٹ بدلن وچ ویلا لگے گا، پر ایہ ہو جاوے گا۔ اوہناں دا کہنا سی کابینہ دے اجلاس وچ ہر وزیر توں پچھنا آں کہ لوکاں دی آسانی لئی کوئی اک کم کیتا جاوے۔ تقریب نال خطاب کردیاں عمران خان دا ہور کہنا سی پلس وچ تھانہ کلچر تبدیل کرن لئی کوشاں آں، پنجاب وچ جہڑے نویں آئی جی آئے نیں اوہناں نوں آکھیا پلس کلچر بدلو، کیویں ہووے گا کہ عوام سمجھن کہ تھانے عوام دی حفاظت لئی نیں۔