ساری قوم کشمیری بھراواں دے پچھے چٹان وانگوں کھڑی اے، صدر و وزیراعظم دا پیغام

اسلام آباد: صدر مملکت عارف علوی تے وزیراعظم عمران خان نے قائداعظم دے یوم پیدائش دے موقع تے قوم دے ناں اپنے پیغامات وچ آکھیا اے کشمیر نوں پاکستان دی شہ رگ آکھیا سی، پوری قوم اپنے کشمیری بھراواں دے پچھے چٹان وانگوں کھڑی اے، بابائے قوم نے برصغیر دے مسلماناں دی وکھری شناخت تے سیاسی سمت دا تصور دتا۔

بانی پاکستان محمد علی جناح دے 144ویں ورھے گنڈھ دے موقع تے صدر عارف علوی نے اپنے پیغام وچ آکھیا اے اج دا دیہاڑ پاکستان دی تریخ وچ خاص دن دے طور تے منایا جاندا اے، عظیم رہنما دی پیدائش ہوئی جہناں نے براعظم دا جغرافیہ بدلیا تے سانوں پاکستان عطا کیتا، قائداعظم نے برصغیر دے مسلماناں دی وکھری شناخت تے سیاسی مست دا تصور دتا، اج دے دیہاڑ پوری قوم عظیم رہنما قائداعظم محمد علی جناح نوں خراج عقیدت پیش کر رہی اے۔

صدر مملکت دا ہور کہنا سی پاکستان قائداعظم دے تصور دے مطابق ترقی دی راہ تے گامزن اے، سانوںمتحد ہو کے قائداعظم دی تعلیمات تے قائم رہن دے عزم دا اعادہ کرنا اے، ترقی لئی اتحاد، ایمان تے نظم و ضبط دے اصولاں تے عمل پیرا ہونا اے۔

وزیراعظم عمران خان دا اپنے پیغام وچ کہنا سی قائداعظم 20ویں صدی دے عظیم تے صاحب بصیرت رہنما سن، اوہناں دی کرشمہ ساز شخصیت دے زیر سایہ کروڑاں مسلمان کڑے حالات دا مقابلہ کرن لئی متحد ہوئے تے بااصول جدوجہد دے ذریعے اپنی منزل پا لئی۔

عمران خان دا کہنا سی پوری دنیا بھارت دے نام نہاد سیکولر ازم نوں اپنی اکھاں نال ویکھ رہی اے جتھے کس طرح اقلیتاں خصوصاً مسلماناں دے خلاف سرکاری سطح تے نفرت انگیز تے ظالمانہ اقدامات کیتے جا رہے نیں۔

ایہ اوہی سنگین صورتحال اے جہڑی قائداعظم نے اپنی دور اندیش بصیرت دے ذریعے بہت پہلاں ای محسوس کر لئی سی کہ انتہا پسند ہندو مسلماناں نوں کدی عزت تے وقار نال جین نہیں دین گے۔

اپنا تبصرہ گھلو