مریم نواز نوں باہر جان توں روکنا کابینہ دا زبردست فیصلہ اے: فواد چودھری

وفاقی وزیر برائے سائنس اینڈ ٹیکنالوجی فواد چودھری نے وفاقی کابینہ ولوں مسلم لیگ (ن) دی نائب صدر تے نوازشریف دی دھی مریم نواز دا ناں ایگزٹ کنٹرول لسٹ (ای سی ایل) توں نہ کڈھن دے فیصلے نوں ٹھیک قرار دتا اے۔ پچھلے دیہاڑ وزیراعظم عمران خان دی زیر صدارت وفاقی کابینہ دے اجلاس وچ مریم نواز دا ناں ای سی ایل توں کڈھن دی درخواست متفقہ طور تے یکسر رد کر دتی گئی سی۔

وفاقی کابینہ نے مریم نواز نوں بیرون ملک جان دی اجازت نہ دین دی ذیلی کمیٹی برائے ای سی ایل دی سفارشات منظور کردیاں اوہناں دا ناں لسٹ وچ ای رکھن دا فیصلہ کیتا سی۔ ایس حوالے نال وفاقی وزیر فواد چودھری نے میڈیا نال گل کردیاں آکھیا مریم نواز نوں باہر جان توں روکنا کابینہ دا زبردست فیصلہ اے، نوازشریف نوں باہر جان دی اجازت دینا وی زیادتی سی۔ فواد چودھری آکھیا اسیں چاہنے آں ایہ لوک جیلاں وچ نہ رہن سگوں لٹی رقماں ادا کرن تے فیر جدھر مرضی چاہن جان۔