زیارت ریذیڈنسی وچ یوم قائد دی پروقار تقریب وچ بانی پاکستان نوں خراج تحسین

زیارت: ڈپٹی سپیکر قومی اسمبلی قاسم خان سوری، وزیراعلیٰ بلوچستان سنے دوجیاں اہم شخصیات نے اپنے خطاب وچ قائداعظم نوں خراج تحسین پیش کردیاں آکھیا قائداعظم دے عزم و حوصلے نے آزاد ملک دتا، ملک وادی زیارت وچ یوم قائد دی پروقار تقریب زیارت ریذیڈنسی وچ ہوئی جہدے اُچیچے پروہنے وزیراعلیٰ بلوچستان جام کمال دے نال کمانڈر سدرن کمانڈ، آئی جی ایف سی سنے دوجیاں اہم شخصیات نے رلت کیتی۔ پرچم کشائی دے بعد تقریب دا باقاعدہ آغاز کیتا گیا جہدے وچ سکولاں دے بالاں نے ملی نغمے پیش کیتے۔

ایس دوران تقریب دے اُچیچے پروہنے وزیراعلیٰ بلوچستان جام کمال نے تقریب نال خطاب وچ آکھیا قائداعظم بے شمار صلاحیتاں دی حامل شخصیت سن۔ اوہناں آکھیا پاکستان وچ اقلیتاں دا اپنا کردار اے، بھارت وچ اقلیتاں دے حقوق پامال کیتے جا رہے نیں جو ہن دنیا دے ساہمنے بے نقاب ہو چکیا اے۔

قومیت دی جنگ تے تعصب پھیل رہیا اے۔ وزیراعلیٰ بلوچستان دا کہنا سی سانوں یکجہتی نوں برقرار رکھنا اے۔ ڈپٹی سپیکر قاسم سوری نے وی تقریب نال خطاب کیتا، اوہناں دا کہنا سی اج دا دیہاڑ تریخ ساز دن اے۔ قائداعظم دے عزم تے حوصلہ دی وجہ توں اسیں آزاد ملک وچ ساہ لے رہے آں۔