سرکاری ہسپتالاں نوں عالمی معیار تے لے جان لئی سروس نوں بہتر کرنا ہووے گا: یاسمین راشد

نارووال: صوبائی وزیر صحت پنجاب ڈاکٹر یاسمین راشد اچانک ڈسٹرکٹ ہسپتال نارووال اپڑ گئیاں۔ اوہناں نے ڈی ایچ کیو ہسپتال نارووال وچ صفائی ستھرائی ، حاضری رجسٹرز، ڈیوٹی روسٹرز، طبی سہولتاں تے دوجے انتظامی امور دا جائزہ لیا۔ صوبائی وزیر صحت نے ایمرجنسی ، آپریشن تھیٹرز تے وکھو وکھ وارڈز دا دورہ کرکے مریضاں دی عیادت کیتی تے طبی سہولتاں بارے پچھیا۔ مریضاں نے صوبائی وزیر نال ڈی ایچ کیو ہسپتال نارووال وچ طبی سہولتاں تے اطمینان دا اظہار کیتا۔

ایم ایس ڈی ایچ کیو نارووال ہسپتال نے صوبائی وزیر نوں مریضاں نوں دتی جان والی طبی سہولتاں بارے آگاہ کیتا۔ ڈاکٹر یاسمین راشد دا کہنا سی سرکاری ہسپتالاں نوں اپ گریڈ کرکے مریضاں لئی ہور آسانیاں پیدا کیتی جا رہیاں نیں، مریضاں نوں ریلیف دینلئی بنیادی اقدامات کیتے جا رہے نیں، وزیراعظم عمران خان تے وزیراعلیٰ عثمان بزدار دے ویژن دے مطابق مریضاں نوں بہترین طبی سہولتاں دی فراہمی نوں یقینی بنایا جا رہیا اے

۔صوبائی وزیر دا کہنا سی سرکاری ہسپتالاں وچ صفائی ستھرائی تے دواواں دی فراہمی نوں آپ مانیٹر کر رہے آں، سرکاری ہسپتالاں وچ مریضاں دے علاج معالجہ دے معیار نوں بہتر کرن دی کوشش کیتی جا رہی اے، صحت انصاف کارڈ دے ذریعے 50لکھ توں ودھ خانداناں نوں مفت علاج معالجہ دی سہولت میسر آئی اے۔