سعودی وزیر خارجہ دی وزیراعظم تے وزیر خارجہ شاہ محمود نال ملاقاتاں

اسلام آباد: سعودی عرب دے وزیر خارجہ فیصل بن فرحان السعود نے وزیراعظم عمران خان تے وزیر خارجہ شاہ محمود قریشی نال ملاقاتاں کیتیاں۔ پاکستان تے سعودی عرب نے کشمیر سنے اہم علاقائی امور تے باہمی مشاورت جاری رکھن تے اتفاق کیتا اے۔ وزیر خارجہ شاہ محمود قریشی نے سعودی ہم منصب دے وزارت خارجہ اپڑن تے پرتپاک انداز وچ خیر مقدم کیتا۔

دفتر خارجہ ولوں جاری بیان دے مطابق سعودی وزیر خارجہ فیصل بن فرحان بن فرحان السعود دا عہدہ سنبھالن دے بعد ایہ پہلا دورہ پاکستان اے۔ وزارت خارجہ وچ وفود دی سطح تے ہون والی ملاقات وچ دوطرفہ تعلقات، باہمی دلچسپی دے معاملات تے علاقائی امور تے تبادلہ خیال کیتا گیا۔ ایس موقع تے شاہ محمود قریشی دا کہنا سی پاکستان تے سعودی عرب وچکار گہرے تے دیرینہ برادرانہ تعلقات نیں، دوواں ممالک کثیر الجہتی شعبہ جات وچ دوطرفہ تعاون نوں ہور مستحکم کرن لئی پرعزم نیں۔

وزیر خارجہ نے مقبوضہ کشمیر دے حوالے نال پاکستان دے موقف دی حمایت تے سعودی وزیر خارجہ تے سعودی عرب دی قیادت دا شکریہ ادا کیتا۔ بعدوں سعودی وزیر خارجہ فیصل بن فرحان السعود نے وزیراعظم آفس وچ وزیراعظم عمران خان نال ملاقات کیتی، ایس موقع تے وزیر خارجہ شاہ محمود قریشی ، پاکستان وچ سعودی سفیر نواف المالکی وی موجود سن۔

اپنا تبصرہ گھلو