مسلم لیگ ن دے رہنما رانا ثنا نوں کیمپ جیل لہور توں رہا کر دتا گیا

لہور: مسلم لیگ ن پنجاب دے صدر رانا ثنا نوں کیمپ جیل لہور توں رہا کر دتا گیا اے۔ اوہناں نوں منشیات سمگلنگ کیس وچ گرفتار کیتا گیا سی۔ جیل توں باہر آن تے لیگی کارکناں نے اوہناں دے حق وچ زبردست نعرہ بازی کیتی تے اوہناں دا والہانہ استقبال کیتا۔ لیگی کارکناں ولوں رانا ثنا نوں پھلاں دے ہار پوائے گئے جد کہ پتیاں وی نچھاور کیتیاں گئیاں۔

منشیات کیس وچ گرفتار رانا ثنا پنج مہینے 25دن بعد جیل توں رہا ہوئے۔ ٹرائل کورٹ دے ججاں دے چھٹی ہون دی وجہ توں لہورہائی کورٹ وچ ای اوہناں دے مچلکے جمع کرائے گئے جہناں دی تصدیق دے بعد اوہناں دی رہائی دی روبکار جیل سپرنٹنڈنٹ دے ناں تے جاری کیتی گئی۔