اداکارہ میرا دا گلوکاری وچ وی قسمت آزمان دا فیصلہ

لہور: پاکستان فلم انڈسٹری دی سینئر اداکارہ میرا، جہناں دا اصل ناں ارتضیٰ رباب اے، نے فلماں وچ اداکاری دے خوب جوہر وکھائے نیں، اداکاری وچ ناں کمان دے بعد اوہناں نے نویں اننگز کھیڈن دا فیصلہ کیتا اے۔ تفصیلات دے مطابق 2019دے دوران اداکارہ میرا نے فلم ‘باجی’ توں خوب پذیرائی حاصل کیتی ایہدے علاوہ اوہ دوجے ایوارڈز ایونٹس وچ وی کافی نمایاں رہیاں۔

پر سال دے آخر وچ میرا نے تصویراں تے ویڈیو شیئرنگ ایپ انسٹا گرام اکاؤنٹ تے ویڈیو شیئر کرکے مداحواں دی توجہ اک واری فیر سمیٹ لئی اے۔ میرا نے انسٹا گرام تے ویڈیو شیئر کیتی اے جہدے وچ ویکھیا جا سکدا اے اوہ سر تے راگ سکھ رہیاں نیں یعنی اداکارہ نے اشارہ دے دتا اے کہ اوہ جلد ای گلوکاری دے میدان وچ وی سر بکھیردی نظر آن گیاں۔