پختونخوا اسمبلی دا اک سال، بجٹ سنے 100توں ودھ بلاں دی منظوری

پشاور: خیبر پختونخوا اسمبلی دا اک ہور سال پورا ہو گیا، ایس ورھے بجٹ سنے 100توں ودھ بلاں دی منظوری دتی گئی۔ اسمبلی دے دس سیشن ہوئے جہدے وچ 85بلز، 47ایکٹ تے 73قرارداداں منظور کیتیاں گئیاں۔ سال 2019وچ اسمبلی دے سیشنز وچ وزیراعلیٰ دی حاضری سب توں گھٹ رہی، صوبائی وزراء وی عدم دلچسپی دا مظاہرہ کردے رہے، اپوزیشن دی ہنگامہ آرائی دے دوران حکومتی بل منظور ہوندے رہے۔

ایوان وچ حکومتی ارکان دا رویہ سب توں زیادہ غیر سنجیدہ رہیا۔ ایس ورھے اسمبلی وچ 76سوالات، 33توجہ دلاؤ نوٹس، 6تحریک استحقاق تے 2تحاریک التوا پیش کیتیاں گئیاں، احتساب ایکٹ ختم، ریجنل و ڈسٹرکٹ ہیلتھ اتھارٹی بل تے منرل سیکٹر ترمیمی جہے بل وی ہنگامے دے دوران منظور کیتے گئے۔

اپوزیشن اراکین ترقیاتی فنڈز تے جلد بازی وچ پاس کیتے قوانین دے خلاف نہ صرف ایوان وچ احتجاج کردے رہے سگوں وزیراعلیٰ ہاؤس دے ساہمنے وی سراپا احتجاج بنے رہے۔ اک ورھے دے دوران صوبائی کابینہ وی مکمل نہ ہو سکی، قبائلی ضلعیاں دے ارکان وزیر، مشیر تے معاون خصوصی وی نہ بن سکے۔