قاضی حسین احمد تے اج دی جماعت اسلامی

لکھت:محمد اکرم چوہدری

کیہ اج دی جماعت قاضی حسین احمد دی جماعت اے ۔ یقینا نہیں، کیہ جماعت اسلامی نوں قاضی حسین احمد دی کمی محسوس ہو رہی اے۔ بالکل ہو رہی اے۔ کیہ جماعت اسلامی دوبارہ عوامی جماعت بن سکدی اے پر کیویں، اج وی جماعت اسلامی قاضی حسین احمد نوں یاد کردیاں ہوئیاں ایہناں دی طرح عوام دے نال کھڑی ہو جاوے دوبارہ مقبول سیاسی جماعت بن سکدی اے۔پاکستان دی سیاست وچ جدوں کدی احتجاجی سیاست تے عوامی سیاست دی گل ہووے گی تے قاضی حسین احمد دا ناں ہمیشہ نمایاں نظر آوے گا۔ ظالمو قاضی آ رہیا اے ورگا مقبول نعرہ ایہناں دی احتجاجی سیاست تے ظالم حکمراناں دی نیندراں اُڈان لئی کافی سی۔ اج جماعت اسلامی قاضی حسین احمد دی برسی تے ایہناں نوں یاد کر رہی اے تے سب توں ودھ قاضی صاحب دی سیاسی جدوجہد تے ایہناں دے طرز سیاست نوں زندہ کرن دی لوڑ اے۔جماعت اسلامی دا سیاسی مستقبل قاضی حسین احمد دے طرز سیاست نال مشروط اے۔ قاضی حسین احمد بحیثیت امیر جماعت اسلامی نوں عوامی سیاسی جماعت بنان وچ سب توں اہم کردار ادا کیتا۔ حقیقی معنیاں وچ اوہ سید ابوالاعلیٰ مودودی دے بعد دوجی وڈی شخصیت نیں جہناں دے دور وچ جماعت اسلامی نے موثر سیاسی کردار ادا کیتا۔ ایہناں دے دور وچ جماعت اسلامی ملک دی سب توں اہم سیاسی جماعت دے طور تے نظر آندی رہی۔ بدقسمتی نال اج دے سیاسی منظرنامے وچ جماعت اسلامی دا کردار ہر لنگھدے دن دے نال محدود ہوندا تے سکڑدا جا رہیا اے۔ قاضی حسین احمد دے دور دی سب توں خاص گل ایہناں دی واضح سیاسی فکر تے ویلے سر سیاسی فیصلے سن۔ اوہ ڈگمگائے نہیں، عوام دی گل کردیاں ہوئیاں ایوان اقتدار دا خیال نہیں کیتا۔ مہنگائی تے ظلم و ستم دے خلاف کھڑے ہون دا فیصلہ کیتا تے فیر عوام نوں سڑکاں تے لیان وچ کامیاب وی رہے تے ثابت کیتا کہ ملک دی دوجی وڈی تے طاقتور سیاسی جماعتاں دے ہوندیاں ہوئیاں وی جماعت اسلامی بڑیکراوڈپلر اے۔ اوہ سیاسی تے مذہبی حلقیاں وچ یکساں مقبول سن۔ ایہناں دے دور وچ انج محسوس ہوندا سی کہ جماعت اسلامی صرف مذہبی نہیں سگوں اک مکمل سیاسی جماعت دے طور تے ملکی سیاست تے اپنا اثر چھڈ رہی اے۔ پر ایس دوران جماعت نے مکمل طور تے اپنے مذہبی تشخص تے انفرادیت نوں وی قائم رکھیا۔ قاضی حسین احمد دی جماعت تے اج دی جماعت وچ زمین آسمان دا فرق اے۔ ایہناں دی سیاسی حیثیت دا اندازہ قومی و صوبائی اسمبلیاں وچ نمائندگی نوں ویکھ کے لایا جا سکدا اے۔ مذہبی حوالے نال تے اوہ اپنا مخصوص کردار نبھا رہے ہون گے پر سیاسی معاملے وچ جماعت بہت پچھے رہ گئی اے۔ ہونا تے ایہہ چاہیدا سی کہ جماعت اسلامی مذہبی و سیاسی طاقت دے طور تے ہو رپکی ہوندی پر انج نہیں ہو سکیا۔ ویلے دے نال نال جماعت اسلامی دی گھٹ ہونی طاقت ملکی سیاست لئی نقصان دہ اے کیوں جے جماعت دے کمزور ہون دا مطلب جمعیت علماء اسلام دا مضبوط ہونا اے تے ایہناں دی مفاد تے موقع پرستی دے حوالے نال کسی نوں کوئی شک نہیں ہونا چاہیدا۔ ایس پہلوں توں ویکھیا جاوے تے بالخصوص خیبرپختونخوا وچ حکومت بنان دے عمل وچ جماعت اسلامی دا واپس قاضی حسین احمد دی سیاسی پالیسیاں تے واپس آنا ویلے دی اہم لوڑ اے۔ جے اوہ خیبر پختونخوا دی سیاست وچ مقبول تے مضبوط ہوندے نیں تے ایہدا اثر پورے ملک دی سیاست تے پوے گا۔ ایہو صورتحال کراچی دی سیاست وچ وی اے۔ کراچی وچ گھر گھر دوبارہ جماعت اسلامی دا پیغام اپڑان تے نویں سرے توں سیاسی سرگرمیاں نوں ترتیب دین دی لوڑ اے۔ ایہ کہنا ٹھیک نہیں کہ مذہبی جماعت لئی ملکی سطح دی سیاست کرنا اوکھا اے ایہ کم ماضی وچ قاضی حسین احمد بخوبی کر چکے نیں۔ ہونا تے ایہہ چاہیدا سی کہ اپنے مذہبی تشخص نوں قائم رکھدیاں ہوئیاں دور جدید دے تقاضیاں نوں اپناندیاں ہوئیاں جماعت دے ووٹراں دی تعداد ودھدی تے ایہناں دے ساتھیاں وچ وادھا ہوندا پر انج ہو نہیں سکیا۔ اکابریں جماعت نوں ایس حوالے نال اپنی پالیسیاں تے نظرثانی کرنی ہووے گی۔جماعت اسلامی نوں قاضی حسین احمد دی برسی دے موقع تے یاد کردیاں ہوئیاں ایہ عہد کرنا چاہیدا اے کہ اج دے جدید دور دی سیاسی ضرورتاں نوں سمجھدیاں ہوئیاں سب توں پہلاں عوامی سیاست شروع کرن دی لوڑ اے۔ سید منور حسن تے موجودہ امیر سراج الحق عوامی سیاست کرن وچ نکام رہے نیں۔ ایہو وجہ اے کہ جماعت اسلامی دی قوت گھٹ ہوئی اے۔ جے ایہو صورتحال رہی تے مستقبل وچ شخصیت دی بنیاد ہر جماعت دا امیدوار انتخاب تے جت جاوے گا پر جماعت اسلامی دا کردار ختم ہو جاوے گا۔ جماعت دا اپنے ووٹراں دا اعتماد بحال کرن لئی ملکی سیاست وچ متحرک ہونا ضروری اے۔ اپوزیشن کردیاں ہوئیاں سیاسی دوستاں تے مصلحتاں توں آزاد ہونا پیندا اے۔ سراج الحق ایماندار تے محب وطن سیاستدان نیں۔ اپنے بزرگاں دی نشانی نوں بچان تے ایہنوں زندہ رکھن لئی دوبارہ وقت دے ظالماں نوں للکارنا تے مظلوماں دے نال کھڑا ہونا پوے گا۔ ظالماں نوں للکار کے مظلوماں دا ساتھ دے کے جماعت اسلامی دی مقبولیت ودھ سکدی اے۔ پاکستان دے چنگے سیاسی مستقبل لئی جماعت اسلامی دے وڈیاں نوں مسلسل ملاقاتاںکرکے اپنے سیاسی فیصلیاں تے نظرثانی کردیاں ہوئیاں مستقبل دا لائحہ عمل تیار کرن دی لوڑ اے۔ جے اوہ جماعت نوں مضبوط بناندے نیں تے سید ابوالاعلیٰ مودودی تے قاضی حسین احمد نوں ایس توں بہتر خراج تحسین پیش نہیں کیتا جا سکدا۔ ایہ نہ ہووے کہ قاضی حسین احمد دی برسی مناندیاں مناندیاں ایہدے مخالفین جماعت دی برسی منانا شروع کر دین۔ اللہ تعالیٰ قاضی حسین احمد دے درجات نوں بلند کرے۔ اوہناں دا مسکراندا چہرہ جدوں وی یاد آندا اے۔ دل توں دعا نکلدی اے۔پاکستان نوں اجہے ای عوامی سیاستداناں دی اشد لوڑ اے۔