خان صاحب…کیا ہوا تیرا وعدہ

لکھت:ایثار رانا

خواجہ جمشید امام (جمشید بٹ) نوں میں جاندا ای نہیں پہچاننا وی آں کہ ساڈی زندگیاں وچ بہت گھٹ لوک ساڈی شناخت وچ آندے نیں۔ جمشید نال دوستی اک نجی میڈیا ہاؤس وچ ہوئی۔ میں اوہنوں پہلی وار ویکھیا تے ڈیل ڈول نال اوہ مینوں کوئی پہلوان وکھائی دتا۔ میرے پہلی صلاح ایہ سی کہ کشمیری اے تے کھان پین دے علاوہ کوئی شغل ہو نہیں سکدا تے فیر میڈیا مالک وی کشمیری سن، سو تعیناتی دی وجہ نوں میں اپنے تئیں سمجھ لیا۔ سمے دا پنچھی اُڈدا رہیا تے ہولی ہولی مینوں خواجہ جمشید امام بارے اپنی صلاح بدلنی پئی اوہ بلا دا ذہین صاحب مطالعہ بہترین نثر نگار قابل سماعت مقرر تے بہترین نثر نگار سی تے ایہناں سب دے نال جڑی سی اوہدی بدقسمتی کہ اوہ عمران خان دے قریبی ساتھیاں وچوں سی تے ایہدا ہور ادراک مینوں اوس ویلے ہویا جدوں پاکستان دے سارے میڈیا تے عمران خان نے دسیا کہ پچھلے 22ورھیاں توں جمشید نے پارٹی کارکناں دی تربیت کیتی اوہ تحریک دا دانشور اے تے ایہ اوہ ہیرو نیں کہ جدوں میرے نال کوئی نہیں سی اوس ویلے جمشید بٹ سی پر اج میں ویکھنا آں ساری دنیا عمران خان دے نال اے پر جمشید بٹ نہیں اے۔اقتدار تے اقتدار تک رسائی دی سیاست دو وکھو وکھ متضاد سگوں متصادم عمل نیں۔ تحریک انصاف دی فرد واحد دے لکھے آئین نوں وی میں غور نال پڑھیا اے جہڑا جمہوری ہون دا دعویٰ کردا وکھائی دیندا اے پر تحریک انصاف دی تنظیم سازی دا اختیار اوس فرد واحد نوں دے دتا گیا اے جہدے تے کل تک ثابت شدہ الزام سی کہ اوہنے پارٹی دے موجودہ اہم عہدیدار دے نال رل کے اک کروڑ نوے لکھ پارٹی فنڈ توں ذاتی اکاؤنٹ وچ منتقل کیتے نیں۔ ہن عامر کیانی نوں کرپشن دی بنیاد تے وفاقی وزارت توں ہٹا کے پارٹی دا مرکزی سیکرٹری جنرل بنا دتا گیا تے سیف اللہ نیازی نوں چیف آڑگنائزر۔ ہن اک دلچسپ قصہ سنو، پاکستان بھر وچ تحصیلاں نے ٹائون دی نامزدگیاں کرنیاں سن پر لہور دی نامزد تنظیم نے جدوں شو آف ہینڈ نال جمشید بٹ نوں سٹی تحصیل دا صدر منتخب کر لیا تے ڈاکٹر یاسمین راشد نے صدر پنجاب نوں آڑے ہتھاں لیا۔ اعجاز چوہدری پرانے سیاسی ورکر ہون دے باوجود ڈاکٹر یاسمین راشد نال لڑائی نہیں کرنا چاہندے۔ ایہدی کیہ وجہ ہو سکدی اے ایہ اوہ خوب جاندے نیں، پر جمشید بٹ نال اختلاف دی اک ای وجہ اے کہ اوہ کرپٹ بندے دے نال چل نہیں سکدا، سو اوہ کرپٹ بندیاں نوں قابل قبول وی نہیں ہو سکدا تے فیر اوہی ہویا جہدا یقین سی۔ پنجاب دی تنظیم دے حکم تے لہور دی تنظیم نے اپنے منتخب تحصیل صدر نوں تے ہٹایا ای، سگوں لہور دی پنج تحصیلاں نوں ای ختم کرکے ڈائریکٹ ٹائون بنا دتے جہڑا ہور غیر آئینی عمل سی ایتھے ایہ سوال ضرور اُٹھدا اے کہ لہور دی ایس نامزد تنظیم دی کیہ اوقات رہ جاندی اے جو اپنے آئینی اختیار تے عمل درآمد نہیں کروا سکی۔ میری رہائشی این ۔ اے 125دی اے سو میں جاننا آں کہ ڈاکٹر یاسمین راشد قیامت توں پہلاں ہون والے الیکشن تک عوامی ووٹ دی بنیاد تے نہیں جت سکدیاں۔ کارکناں نال اوہدا رویہ آئے دیہاڑ علاقے دے ورکراں توں پتہ لگ جاندا اے۔ پنجاب دے سارے ہسپتالاں دی حالت تہاڈے تے میرے ساہمنے اے۔ بہتری دے بجائے ایہ خراب توں خراب ہوندے جا رہے نیں۔ دواواں دیاں قیمتاں سونے دے نال نال ودھدی ضرور نیں، پر گھٹ نہیں ہوندیاں پر ایہدے باوجود ڈاکٹر یاسمین راشد کسے فاتح جرنیل وانگوں تحریک انصاف دے فیصلیاں تے انج اثر انداز ہوندیاں نیں جیویں عمران خان تے تحریک انصاف ایہناں کلّی دی کاوش دا نتیجہ اے۔ آئین وچ پنجاب دا ذکر اے، پر پنجاب دی ونڈ دا ذکر کدھرے نہیں پر نجانے کیوں پنجاب نوں چار حصیاں وچ تقسیم کر دتا۔ لہور دا صدر کشمیر دا ایم ۔ ایل۔ اے اے جد کہ آئین مقامی لوکاں دا عدہ دار بنان دی گل کردا اے۔ذوالفقار علی بھٹو نے محترمہ نصرت بھٹو نال اپنی آخری ملاقات وچ پچھیا کیہ لوک میرے لئی نکلن گے؟ تے نصرت بھٹو نے جواب دتا جو 1970وچ تہاڈے ساتھی سن اوہناں نوں تسیں آپ دلائی کیمپاں وچ اپڑا دتا تے جہناں نوں تسیں اپنا ساتھی بنایا اوہ تے ضیاء دے کوسے پہلاں ای ضیاء الحق دے ہتھ تے بیعت کر چکے سن۔ میں سوچ رہیا آں جے جمشید بٹ ورگے دانشور جنگجو سیاسی ورکر دے نال ریاست مدینہ دا ایہ سلوک اے تے فیر عام بندہ پاکستان وچ کیویں زندہ ہووے گا۔ عمران خان جے اپنے جانثار ساتھیاں نوں تحریک انصاف تے حملہ آور ہون والے اجنبی لشکر توں نہیں بچا سکیا تے دو نہیں اک پاکستان دا نعرہ ایہدی وعدہ خلافی نوں حیرت نال ویکھ رہیا اے۔ عمران خان نے وعدہ کیتا سی کہ اوہ اپنے پرانے کارکناں نوں کدی نہیں بھلن گے، پر اپنے 22ورھے پرانے ساتھیاں دے نال ایہ ذلت آمیز رویہ بہت سارے سوالاں نوں جنم دے رہیا اے۔ میں 2013دے انتخابات وچ وی اک کالم وچ جمشید بٹ دا تفصیلی ذکر کردیاں لکھیا سی کہ تحریک انصاف اوہنوں ٹکٹ نہیں دیوے گی تے فیر انج ای ہویا۔ کاش! جمشید بٹ دا وی لندن وچ ذاتی کاروبار یاں اوہدا اپنا وڈا گینگ ہوندا یاں فیر اوہ ماضی وچ اپنی نکی نکی ہاؤسنگ سوسائٹیاں دیاں فائلیاں لئے وزیراعلیٰ شہباز شریف دے پچھے پچھے نظر آندا تے اج اوہ تحریک انصاف دا اہم حصہ ہوندا۔چیئرمین تحریک انصاف نوں انتہائی ذمہ داری نال دس رہیا آں کہ پنجاب تے وفاق وچ جمشید بٹ ورگا اک وی وفادار جانثار تے باصلاحیت لیڈر اوہدی جماعت وچ موجود نہیں۔ تسیں ایہنوں نظر انداز کر سکدے او پر فراموش نہیں کہ جناں کم اوہنے تحریک انصاف لئی کر دتا اے ایہدا موقع ہن ایس زندگی وچ عمران خان دے سنگ کسے نوں نہیں ملے گا۔ عمران خان تحریک انصاف وچ ہون والے نامزدگیاں تے غور فرمان کہ ایہ سیاسی عمل معاشی رشتیاں وچ تبدیل ہو چکیا اے۔ تہاڈے ساتھیاں دا سیاسی قتل کرکے اوہناں نوں نویں تنظیم دی بنیاداں وچ دفن کر دتا گیا اے تے بنیادی دیاں اِٹاں کدی نظر نہیں آندیاں گو کہ ہر عالیشان عمارت ایہدے تے کھڑی ہوندی اے۔ اوس ویلے توں ڈرو جے ایہناں اِٹاں نے اپنی تھاں چھڈ دتی تے ایس ٹوپی ڈرامہ سیاسی محل دا کیہ بنے گا؟؟؟