پنجاب دی 56کمپنیاں وچوں اک وی نہیں بچے گی: چیف جسٹس

اسلام آباد: چیف جسٹس پاکستان گلزار احمد آکھیا پنجاب دی 56کمپنیاں وچوں ہن اک کمپنی وی نہیں بچے گی۔ چیف جسٹس دی سربراہی وچ سپریم کورٹ دے تن رکنی بنچ نے ڈپٹی جنرل منیجر لہور ٹرانسپورٹ کمپنی دی نوکری تے بحالی دی عرضی دی سماعت کیتی۔

درخواست گزار محمد حنیف آکھیا لہور ٹرانسپورٹ کمپنی پرائیویٹ لمیٹڈ پنجاب حکومت دی 56بنائی گئی کمپنیاں وچوں اک کمپنی اے، لہور ٹرانسپورٹ پرائیویٹ کمپنی لمیٹڈ وچ بطور ڈپٹی منیجر کم کر رہیا سی پر مینوں قواعد دے برخلاف کڈھ دتا گیا۔ جسٹس اعجاز الاحسن آکھیا جڑے عہدے تے کم کر رہے سی اوہ عہدہ ای ختم ہو گیا۔

چیف جسٹس آکھیا پنجاب دی ایہناں 56کمپنیاں وچوں ہن اک وی نہیں بچے گی، ایہناں دے ہن سب لوک گھر جان گے، ایہ ساری کمپنیاں ختم ہو جان گیاں، ہن ایہناں وچ کوئی نہیں رہوے گا۔ عدالت عظمیٰ نے عرضی خارج کردیاں لہور ٹرانسپورٹ کمپنی دی ذیلی کمیٹی نوں محمد حنیف دا کیس دوبارہ ویکھن دی ہدایت کر دتی۔