علاج تے ٹھیک سی‘مریض غلط سی!

لکھت :عطاء الحق قاسمی

لا علاج مریضاں کجھ مریض اجہے وی نیں جہناں دا کیس ذرا وکھری ٹائپ اے تے ایہناں دی تعداد وی کافی اے۔ ایس طبقے دی مالی حیثیت تے سائیکل خریدن دی ہوندی اے تے ایہ موٹرسائیکل خرید بیٹھدے نیں۔

ایسے طرح جہڑا موٹرسائیکل خرید سکدا اے اوہ گڈی خریدن نکل پیندا اے ایہدے بعد وڈی کار تے فیر ایس توں وڈی کار تے فیر اک دیہاڑ دوجیاں دا منہ لال ویکھ کے اپنا منہ چپیڑاں نال لال کرن والا ایہ بندہ کہہ رہیا ہوندا اے مہنگائی بہت ہو گئی اے، گزارا نہیں ہوندا! اک طبقہ تے واقعی بہت غریب اے تے جہدی زندگی حقیقتاً گھٹ آمدنی تے زیادہ مہنگائی نے عذاب بنائی ہوئی اے اوہ وی آلے دوالے دے حالات ویکھ کے مجبور ہو گیا اے کہ اپنے بالاں نوں ایہناں شیواں توں محروم نہ رکھے جہڑیاں اج دے دور وچ آسائش نہیں، لوڑ دی ذیل وچ آندیاں نیں چنانچہ اجہے بہت سارے لوک جہڑے استطاعت نہیں رکھدے، فریض وی خریددے نیں۔

بچپن وچ ساڈے گھراں وچ مٹی دے گھڑے ہوندے سن جہناں وچ پانی ٹھنڈا رہنداسی، جلدی خراب ہون والی کھان پین والیاں شیواں نوں محفوظ رکھن لئی اک چِھکا ہوندا سی جہڑا رسی دے نال اُچی تھاں نال لمکا دتا جاندا سی تاں جے ایہنوں ہوا لگدی رہوے۔ ایس قسم دیاں باقی شیواں لئی جالی والی الماری ہوندی سی گھرا ں وچ تیل والے چولہے وی نہیں ہوندے سن سگوں لکڑی دے برادرے نال انگیٹھی بالی جاندی سی تے ایہدے تے کھانا پکایا جاندا سی پر ہن انج نہیں اے۔ ہن غریب توں غریب بندہ وی دوجی عیاشیاں دے علاوہ گھر وچ ٹیلی وژن سیٹ لان تے وی مجبور ہو گیا اے۔

واپڈا والے ایہدے توں بجلی دے بل وچ 35روپے وکھرے وصول کردے نیں جہڑے ایہنے ٹی وی دے چیئرمین دے طور تے واپڈا دے بجائے پی ٹی وی دے اکاؤنٹ وچ جمع کرن دا آرڈر کروا کے پی ٹی وی دی آمدنی وچ ستر کروڑ روپے ماہوار وچ وادھا کر دتا سی۔ ایسے طرح استطاعت نہ رکھن دے باوجود ایس طبقے دے بندیاں نے گھراں وچ کیبل وی لگوائی اے جہدے لئی ایہناں نوں ہر مہینے ڈیڑھ دو سو روپے وکھرے ادا کرنا ہوندے نیں۔ اک شے ہور وی اے جہنوں موبائل فون آکھیا جاندا اے، ڈھائی ہزار روپے وچ ایہ وی خریدیا جاندا اے تے فیر گھٹ توں گھٹ پنج سو روپے ماہوار دے حساب نال ایہدا خرچہ وی ہوندا اے۔ ٹی وی تے وکھائی جان والی شادی ویاہ دیاں رسماں نے ایس طبقے نوں وی مجبور کر دتا اے کہ اوہ ایہناں رسماں دی پیرو کرے۔

اک واری ڈاک دے راہیں اسیں اہل خانہ نوں شادی دا اک دعوت نامہ موصول ہویا جہڑا بیگم و جناب رضی الدین ولوں سی دوجے دیہاڑ ساڈے گھر وچ کم کرن والی ماسی مختاراں آئی تے اوہنے مینوں تے میری بیگم نوں اصرار دے نال اپنے پتر دی شادی وچ رلت دی دعوت دتی تے پتہ چلیا کہ ڈاک وچ ملن والا دعوت نامہ اوسے شادی دا سی جہدے وچ ماسی مختاراں بیگم تے اوہدا شوہر جورا جناب رضی الدین دے روپ وچ موجود سن۔ اسیں اہل خانہ نے ایس شادی وچ رلت کیتی جہدے وچ باوردی ویٹر پروہنیاں نوں سرو کر رہے سن۔ سانوں پتہ چلی اکہ کُڑی والیاں ولوں مہندی لے جاندیاں ویلے وی اوہ سب کروفر موجود سن جہڑے ٹی وی دے ڈرامیاں وچ وکھایا جاندا اے، میں بعد وچ ماسی مختاراں نوں ایس فضول خرچی تے ڈانٹیا تے اوہنے روہانسے ڈھنگ وچ آکھیا کیہ کریئے صاحب جی اسیں مریں یاں جئیں، بالاں دیاں خوشیاں تے پوری کرنی ای پیندیاں نیں۔

پر اصلی تے وڈا لاعلاج عاشقاں دا طبقہ اے، ایس طبقہ دے بندے کسے معمولی جہے چہرے تے عاشق ہوندے نیں تے ایہدے قصیدے پڑھ پڑھ کے ایہنوں یقین دوا دیندے نیں کہ ایہنوں اگلے عالمی مقابلہ حسن وچ ضرور رلت کرنی چاہیدی اے جہدے نتیجے وچ اوہ بیوقوف محبوبہ اپنے انھے عاشق دیاں گلاں تے یقین کرکے آپ ایسے عاشق نوں حقیر سمجھن لگدی اے تے اپنے آپ نوں ایناں برتر کہ ایہدے لئی اپنے آپ تے عاشق ہون دے علاوہ کوئی ہور چارہ نہیں ہوندا۔

ایس نوع دے نابینا عاشقاں دیاں اکھاں اوس ویلے کھلدیاں نیں جدوں اوہ ویکھدا اے کہ کنے سارے مومن اوہدے محبوب دے دہانے تے بیٹھے اوہنوں ڈسے جا رہے نیں، فیر اوہدی غیرت جاگدی اے۔ اجہے عاشقاں نوں میرا مشورہ اے کہ اوہ ایس دنیا دی حور دے چنگل توں نکلن تے ایس عاشقی دے بجائے مولانا طارق جمیل دا بیان سنیا کرن جہدے مطابق نیک عملاں والیاں کئی جنت وچ بے شمار حوراں اوہدی منتظر ہوندیاں نیں۔ تے ہاں ! آخر وچ اوہناںبعض شاعراں دا ذکر جہڑے لاعلاج مریضاں دی ذیل وچ آندے نیں، اوہناںوچوں ہر کوئی اپنے آپ نوں ملک الشعرا سمجھدا اے تے جہڑا ایہناں بارے ایہ رائے نہ رکھے اوہناں دا جی ایہنوں کچا چبا جان نوں چاہندا اے پر ایہ تذکرہ ایتھے چھڈنے آں مینوں قیوم نظر تے انجم رومانی دا اک دلچسپ واقعہ یاد آگیا۔اک واری قیوم صاحب نے انجم صاحب نوں دسیا کہ ایہناں دی بنائی روز بروز گھٹ ہو رہی اے۔

انجم صاحب نے ایہناں دناں تازہ تازہ علاج بِالما (پانی دے ذریعے علاج) دے بارے پڑھیا سی، کہن لگے مسئلہ ای کوئی نہیں تے کسے ڈاکٹر دے کول جا کے ویلا ضائع کرن دے بجائے میرے گھر آ جاؤ، پنج منٹ وچ تہانوں ٹھیک کر دیواں گا۔ قیوم صاحب انجم صاحب دے گھر گئے تے انجم صاحب نے اک ہزار پاور دا بلب بال کے قیوم صاحب توں آکھیا اک فٹ دے فاصلے توں تن ،منٹ تک اکھاں جھپکائے بغیر مسلسل ایہدے ول ویکھدے رہو قیوم صاحب نے تعمیل کیتی، ایہدے بعد انجم صاحب نے اوہناں نوں اکھاں تے ٹھنڈے پانی دے چھٹے مارن لئی آکھیا، قیوم صاحب نے انج ای کیتا جہدے نتیجے وچ اوہدے ڈیلے اپنی تھاں توں ہل گئے۔ ٹی ہاؤس وچ جدو ں ایہ خبر اپڑی تے دوستاں ولوں انجم صاحب دی جواب طلبی ہوئی تے اوہناں آکھیا میرا علاج ٹھیک سی، مریض غلط سی!