باپو عزت نال ایدھر آ

لکھت :ایثار رانا

کوئی امب چوپن جاوے تے باغ وچ پھڑیا جاوے تے شاید اوہدا ارادہ پھڑن جان دا نہ ہووے پر جدوں بلاول زرداری ایہ کہندے نیں کہ ایہناں نوں پھڑ کے وکھاتے گل سمجھ آندی اے کہ ایہناں دا ارادہ پھڑے جان دا اے۔ کیوں جے ایہ ممکن نہیں کہ کوئی موگیمبو نوں چیلنج کرے تے باہر پھردا پھرے پر کیہ کریئے بلاول دے بیک گراؤنڈ میوزک وچ وی بجلی بھری اے میرے انگ انگ وچ جہڑا مینوں چھو لوے گا اوہ سڑ جاوے گا چل رہیا اے۔ یعنی ڈان نوں پھڑنا مشکل نہیں ناممکن اے پر ایہناں دے لچھن ایہو دسدے نیں کہ اج نہیں تے کل ایہناں دی ایہ خواہش پوری ہووے گی۔ اسیں تے ایہو ویکھیا اے کہ ساڈے خان صاحب جو اوکھا بوکا نیب نوں ضرور برا لگیا تے جو نیب نوں برا لگا ایہدی ابتدائی منزل حوالات۔ سنتا سنگھ نے اپنے باپو نوں آکھیا اوئے باپو ایدھر آ، سنتا دی امی بولی بے شرم پیو نوں عزت نال بلائی دا اے۔ سنتا سنگھ بولیا اوئے باپو عزت نال ایدھر آ جا۔ اسیں تے بلاول نوں خاص ممتا دے جذبے نال کہہ رہے آں کہ فیر پھڑے گئے تے سانوں دکھ ہووے گا۔ اجے اسیں احسن اقبال دا غم نہیں بھُلے۔ دل نوں اینے صدے نہیں ملنے چاہیدے۔ ساڈے درویش شہریار آفریدی کہندے نیں تے من لینے آں کہ ایہ ضمانتاں دا موسم اے۔ اسیں تے سمجھے سی کہ گیس دے بغیر رضائیاں وچ سکڑن تے کمزور رضائیاں وچ اکڑن دا موسم اے چلو من لینے آں پر اسیں اوہناں نوں مفت مشورہ دیواں گے کہ موسم وی اے تے موقع وی، اجے ضمانتاں کرا لین کل شاید سہولت ملے نہ ملے۔ کیوں جے جہڑی اج بہو اے اوہنے کل سس بننا ای بننا اے۔ ایہ ویلا روڑھدے پانی وانگوں چلدا رہندا اے۔ رانا ثناء اللہ دی گرفتاری تے ضمانت ایس توں چنگی کوئی مثال نہیں۔ بندہ پکا لیگی ہووے تے اُتوں رانا وی تے معاملہ سوہنی تے اُتوں سُتی پئی اٹھی والا ہو جاندا اے۔ ایہ مننا پوے گا رانا رانا ای ہوندا اے، جان جاوے پر وچن نہ جاوے، رانا دے گھر چور آ گئے، رانا دی اکھ کھل گئی چورا ٹھ کے بھج نکلیا، رانا نے پچھے دوڑ لا دتی چور توں اگے نکلدیاں ہوئیاں رانا بولیا اک تے چوری اتوں رانے نال ریساں من گئے رانا صاحب تسیں تے چور توں وی اگے نکل گئے، مینوں تے افسوس ایس درجناں کلو ہیروئن اُتے اے جو مال مقدمے وچ گل سڑ جاوے گی، کسے بے چارے دے منہ ای پے جاندی۔ جیویں عزت کسے کسے نوں راس آندی اے انج ای سب موسم سب نوں راس نہیں آندے، ضمانتاں دے موسم وچ نجانے ساڈے بھرا سعد رفیق توں کیہ گناہ ہویا اے کہ اک سال توں اوہناں دی سنی نہیں جا رہی۔ نہ شہباز شریف ایہناں لئی بولدے نیں نہ ہر ماسٹر وائس مریم اورنگزیب، پر سعد رفیق جہڑی بہادری نال کھڑے نیں ایہناں دا قد تے مینوں نوازشریف تے زرداری توں زیادہ اُچا لگ رہیا اے۔ کسے زنجیر دی سب توں کمزور کڑی سب توں پکی ہوندی اے اوہ کھل جاوے تے زنجیر کھلر جاندی اے۔ سعد رفیق جس دن کھل گئے مینوں نون لیگ کھلردی نظر آ رہی اے، ڈاکٹر بولیا بنتا سنگھ تہاڈی لت وچ زہر پھیل گیا اے پر فکر والی کوئی گل نہیں، بنتا سنگھ کراہندیاں ہوئیاں بولیا ڈاکٹر صاحب زہر تہاڈی لت وچ پھیلدا تے فکر میرے لئی وی کوئی نہیں سی۔ ایہ اے ساڈی سیاسی قیادت جہدی اوقات اینی ہی کہ جدوں وقت پوے تے دوڑ اپنی اپنی ہو جاندی اے۔ زنداناں توں آوازاں آ رہی ہوندیاں نیں بھئی جاگدے رہنا ساڈیتے نہ رہنا۔ بہرحال دعا اے جدوں سارے ای موسم نوں انجوائے کر رہے نیں تے سعد برادران دی وی سنی جاوے اپنیاں نے کہڑا دلی لٹن وچ نمبر ون کردار ادا کیتا سی۔لو جی سرکار نے سو پیاز کھا لئے بس دوجے پاسے 99تے جا کے نیب دی واگاں کھچ ای لین، جے اوہ شروع وچ بریک تے پیر رکھ لیندے تے شاید ایہناں نوں سو پیاز کھانے پیندے نہ سواسیں تے شروع توں کہہ رہے آں کہ خاں جی ایہ گنڈاسے والی فلم بہت ہو گئی ایہدے وچ تھوڑا بہت ششکا اک ادھ ٹھمکے والے گانا اک ادھ کوئی ہسن ہسان والا سین پانا ضروری اے پر ساڈی سن دا کون اے۔ رانا صاحب نے ضمانت دی خوشی وچ دوستاں نوں کھانے تے سدیا۔ کھانے وچ لون تیز نہیں بہت تیز ہو گیا۔ رانا صاحب ڈاہڈے سن اے این ایف وانگوں سارے ڈردے سن۔ رانا اک اک دوست دے کول جاندے کھان دا پچھدے، دوست ڈر کے مارے کہندا واہ مزا آ گیا۔ رانا سنتا سنگھ دے کول اپڑیا، سنتا بولیا واہ رانا جی، کیہ گل اے کھان دی، دو لکھ دا تے تسیں لون (نمک) ای پا دتا۔ ہن دسو معاشرے وچ سنتا سنگھ ورگے بھانڈ نہ ہون تے کون سچ بولے گا۔ اج دا دانشور تے انگلیاں چٹدیاں کہہ رہیا اے واہ خان صاحب واہ میاں صاحب سواد آ گیا۔ ایہ سنتا سنگھ بنتا سنگھ نہ ہون تے کون نمک دا سچ بولے۔ کون کہوے کہ خان صاحب اسیں تے مٹھے چول کھان تہاڈے نال آئے ساں تسیں کہندے او کہ مٹھے چول نے کج نہ پھول۔ تسیں نیب، احتساب دا نمک ایناں ودھا دتا کہ چاہندیاں ہوئیاں وی ایہ نہیں کہہ سکدے کہ واہ جوان سواد آ گیا، دانشور تے دانشور ، عوام بیچاری شرمندہ شرمندہ ٹکور کردی پھر رہی اے۔ ایہنوں بڑا چاہ سی تبدیلی دا، تبدیلی آوے نہ آوے ایہنوں چس آ گیا۔2019ء وی چلا گیا، نویں تے پرانے ورھے وچ بس انیہہ ویہہ دا ای فرق اے بھلا کیلنڈر بدلن نال عوام دی تقدیر بدلدی اے۔ اک بدبودار پیمپر بدل وی جاوے تے اگلا پیمپر کہڑا پرفیوم بھرا ہوندا اے۔ جہڑے چونسے عوام نے 19وچ نہیں چوپے اوہ 20وچ چوپ لوے گی۔ مہنگائی، بیروزگاری بے برکتی ساڈے آلے دوالے میں تے میرا دلبر جانی گاندی پھر رہی اے۔ بنتا سنگھ دا سو روپے دا بیلنس اک کُڑی نوں چلا گیا اوہناں نے میسج کیتا کہ اوہ برائے مہربانی واپس کر دیوے۔ کُڑی بولی پر میرے کول تے 80روپے دا بیلنس آیا اے۔ بنتا سنگھ بولیا اوہ سوری ٹھہرو میںویہہ دا بیلنس دوبارہ گھلنا آں۔ شاوا وئی شاوا ایہو ساڈا قومی مزاج اے ۔ حکمراناں نوں 80دا بیلنس ملے فیر وی قوم نوں سوری کرکے ویہہ دا بیلنس گھلنا ہوندا اے تے فیر وی ساڈے توں گلا اے کہ وفادار نہیں۔ بھیامیرے سرخ و سپید چہرے والو کیہ کریئے ہولی ہولی مر تے رہے آں۔ اڈیاں رگڑ رگڑ کے بھوک نال نڈھال ہو کے خون تھکدیاں تھکدیاں جان دے تے رہے آں کیویں پورا کریئے تہاڈا ویہہ دا بیلنس۔ ایہناں فاقہ حالاں توں ہور کیہ چاہندے او۔ عدالتاں تہاڈیاں، قنون تہاڈا، انصاف تہاڈا، فیصلے تہاڈے، موسم تہاڈے۔ اسیں تے بس فل ان دی بیلنک ٹھہرے۔ اپنا رول کرنے آں تے مر جانے آں۔ بہتر ورھیاں توں کواب خرید رہے آں تے لہو بکھیردیاں اکھاں نال اپنی بے بسی تے ماتم کر رہے آں۔ لڑدے رہو اقتدار دی جنگ اپنے پیاداں، فیلاںرخاں دی پٹواندے رہو، بس توں تے اچی مچان تے بیٹھا بادشاہ سلامت رہوے۔ کھیڈدے رہو ادارے ادارے۔

اپنا تبصرہ گھلو