کیہ امریکہ اپنی مرضی انج ای کردے رہوے گا؟

لکھت : عتیق انور راجہ

امریکی صدر ڈونلڈ ٹرمپ دے اک بیان نے دل نوں دکھی کیتا اے صدر امریکہ ڈونلڈ ٹرمپ فرماندے نیں سعودی حکومت نے سعودی عرب وچ امریکی فوج گھلن دا معاوضہ اک ارب ڈالرز امریکا دے اکاؤنٹ وچ جمع کرا دتا اے۔ ایہدے نال اوہناں نے اپنے ہم وطناں نوں ایہ نوید وی سنائی کہ جنوبی کوریا نے وی امریکی فوج دی اوہناں دے ملک تعیناتی دے عوض 50کروڑ ڈالرز معاوضہ امریکہ نوں دے دتا اے۔واشنگٹن وچ امریکی ٹی وی نوں دتے گئے انٹرویو وچ امریکی صدر ٹرمپ نے آکھیا سعودی عرب نے ایران دے حملیاں توں محفوظ رہن لئی ہور فوج گھلن دا مطالبہ کیتا سی، پر ریاض نوں آکھیا گیا کہ اوہنوں فوج دی تعیناتی دے اخراجات دینے ہون گے۔ سعودی عرب جہڑا مقامات مقدسہ دی وجہ توں مسلماناں دے دلاں وچ دھڑکن وانگوں دھڑکدا اے ایس پاک وطن دی حفاظت لئی کروڑاں مسلمان بغیر کسے معاوضے دے وی اپنیاں جاناں قربان کرن نوں تیار رہندے نیں ایس سعودی عرب دے بادشاہواں نے اپنے وطن دی حفاظت لئی امریکہ توں مدد منگی اے تے امریکہ نوں منہ منگے پیسے وی دتے نیں جس دیہاڑ امریکہ نے ایرانی جرنیل نوں میزائل نال ہلاک کیتا تے بہت سارے لوکاں دا خیال سی کہ ہن امریکہ تے ایران دی جنگ شروع ہون جا رہی اے پر اسیں اوس دیہاڑ ای آکھیا سی کہ ایہ حملہ امریکی صدر نے اپنی قوم دے وسیع تر مفاد وچ کیتا اے۔ امریکہ سعودی عرب تے ایران وچکار چلن والی چپقلش نوں ودھاوا دین لئی ہر ممکن کوشش کردا رہندا اے۔ ایران توں ڈرا کے امریکہ بزدل سعودی حکمراناں توں ارباں ڈالرز لٹن دا سلسلہ اگے ودھاندا رہندا اے تے ایس واری وی اسیں ویکھیا کہ انج ای ہوندا نظر آ رہیا اے یعنی ویکھو کہ محترم ڈونلڈ ٹرمپ اپنی قوم نوں صاف لفظاں وچ دس رہے نیں کہ سعودی عرب نے پہلاں اک ارب ڈالرز دا معاوضہ امریکی اکاؤنٹ وچ جمع کرایا تے ایہدے بعد امریکی فوج نوں ریاض گھلیا گیا۔ انج ویکھیا جاوے تے امریکہ نے ہولی ہولی سعودی حکمراناں نوں اپنا غلام بنا لیا اے۔ امریکہ جدوں چاہندا اے اوہناں توں حفاظت دا معاوضہ منگ لیندا اے تے جدوں چاہندا اے آلِ سعود توں سونے دے مہنگے تحفے لے اُڈدا اے۔ امریکہ جدوں چاہندا اے غریب اسلامی ملکاں نوں سعودی امداد دوا کے اپنے وسیع تر مفادات لئی استعمال کر لیندا اے۔ اجے پچھلے مہینے پاکستان نوں ترکی تے ملائیشیا دے نال نویں اسلامی اتحادی بنان توں روک کے امریکہ نے ثابت کیتا اے کہ سعودی حکمران کس طرح اوہدے اشاریاں تے ترقی پذیر اسلامی ملکاں تے دباء پاندا اے۔ سعودی صحافی جمال خاشقجی دے قتل تے امریکہ نے بڑا رولا پایا سی تے ہن صحافی جمال خاشقجی دے قاتلاں دے ٹرائل تے اوہناں وچ پنج نوں سزائے موت دے حکم نوں امریکی انتظامیہ اک اہم اقدام قرار دے رہی اے۔ وسیلیاں دے مطابق امریکی صدر ڈونلڈ ٹرمپ دی انتظامیہ دے اک اعلیٰ عہدیدار نے اپنی شناخت ظاہر نہ کرن دی شرط تے آکھیا اے ایس خوفناک جرم دے ذمہ داراں دا احتساب اہم اقدام اے تے اسیں سعودی عرب دی اک منصفانہ تے شفاف عدالتی عمل نوں جاری رکھن لئی حوصلہ افزائی کرنے آں۔ یاد رہوے پچھلے پیر نوں سعودی عرب دی اک فوجداری عدالت نے جمال خاشقجی دے قتل دے جرم وچ پنج بندیاں نوں قصور وار قرار دے کے سزائے موت دا حکم دتا اے تے مقدمے وچ ملوث ہون دے جرم وچ تن بندیاں نوں مجموعی طور تے 24ورھے قید دی سزا سنائی سی۔سعودی عرب وچ پچھلے دناں شدید بارشاں ہوئیاںجہناں دی وجہ توں کئی علاقیاں وچ نظام زندگی معطل ہو گیا۔ کئی تھاواں تے طوفانی بارش نال راہ بند ہو گئے تے کئی تھاواں تے سیلابی صورتحال پیدا ہو گئی۔ خصوصاً وادیاں، سڑکاں تے نشیبی علاقیاں وچ کوئی کئی فٹ پانی کھڑا ہو گیا جہدی وجہ توں مقامی شہریاں نوں بہت زیادہ پریشانی دا ساہمنا کرنا پیا۔ آلِ سعود امریکہ دی خوشنودی لئی اپنے ملک نوں روشن خیال بنان دی کوشش کر رہی اے‘ سینما ہال کھل رہے نیں تے ہوٹلاں وچ سیاحواں لئی بہت ساری آسانیاں دتی جا رہیاں ن پر اک خبر دے مطابق سعودی دارالحکومت ریاض دی پلس نے پبلک مقامات تے نامناسب لباس پا کے گھمن پھرن تے 60بندیاں نوں گرفتار کیتا اے جہناں وچ 37عورتاں وی شامل نیں۔ پلس ترجمان دا کہنا اے پلس سعودی عرب دے سارے وڈے شہراں وچ ایہناں دناں سماجی تہذیب دے منافی سرگرمیاں دا سختی نال نوٹس لے رہی اے۔ غیر سماجی حرکتاں توں روکن لئی کارروائیاں کیتی جا رہیاں نیں۔ ہن اک پاسے عرب حکمران اپنے ملک نوں سیاحواں لئی پرکشش بنان دے خواہاں نیں تے دوجے پاسے اوہناں نوں اپنی اقدار وی یاد آ رہیاں نیں مینوں حضرت علامہ اقبالؒ دا اوہ شعر یاد آ رہیا اے کہ
تمہاری تہذیب اپنے خنجر سے آپ خود کشی کرے گی
جو شاخِ نازک پہ بنے گا، آشیانہ ناپائدار ہوگا
شب تاریک توں انکار نہیں کیتا جا سکدا، پر نور سحر اک بہت وڈی حقیقت اے۔ خورشید دے طلوع ہوندیاں ای دور دور تک تاریکی دا ناں و نشان نہیں ہوندا۔ اسلام اک نور اے جہنوں پھیلن توں کوئی نہیں روک سکدا۔ اسلام دشمن لابیاں اپنے زہریلے تے اعصاب شکن پروپیگنڈے نال مسلماناں وچ مایوسی پھیلاندی رہندیاں نیں، پر ایہدے باوجود اسلام پوری آن بان دے نال دنیا بھر وچ اپنی روشنی پھیلا رہیا اے۔یورپ وچ اسلام دشمناں ولوں جہڑی شدت نال اسلام دی مخالفت کیتی گئی تے اسلام دے خلاف بھیانک پروپیگنڈا کیتا گیا، ایسے تیز رفتاری دے نال اسلام یورپ وچ پھیل رہیا اے۔ اسلام دیاں عظمتاں دے ترانے یورپ وچ لکھاں انساناں نوں مسحور کر رہے نیں تے ہزاراں سلیم الفطرت انسان اسلام دے حلقہ عافیت وچ پناہ لے کے ہمیشہ دیاں کامیابیاں سمیٹ رہے نیں۔ یورپ وچ اسلام نوں ات گردی تے بنیاد پرستی دا مذہب قرار دے کے ایہدے ودھدے ہوئے اثر نوں روکن دی بھرپور کوششاں کئی صدیاں توں ہو رہیاں نیں پر اسلام دیاں کرناں نوں نہ تے کوئی اج تک روک سکیا اے تے نہ روک سکے گا۔ اسلام دا اجالا ایہناں دے ظلمات مآب ایواناں تے دستک دے رہیا اے۔ ہالینڈ دا اک سیاستدان جورم کہندا اے کہ ایہنوں وی دوجے مغرب زدہ لوکاں وانگوں اسلام تے مسلماناں نال سخت نفرت سی تے ایسے مقصد لئی اوہ اسلام تے پیغمبر اسلام دے خلاف اپنی نویں کتاب لئی ریسرچ کرنی شروع کیتی۔ ایس دوران جدوں اوہناں نے سیرت مبارکہ دے کجھ پہلوواں دا تنقیدی جائزہ لیا تے محسن انسانیت دی زندگی نے اوہناں دی فکر نوں تبدیل کر دتا تے اوہناں نے دل نال پچھلے ورھے ای اسلام قبول کر لیا تے ایہدا باقاعدہ اعلان اپنے ملکی ریڈیو تے وی کیتا۔ ایس توں پہلاں گیرٹ ولڈرز دے اک ہور قریبی ساتھی تے ڈچ سیاستدان آرنودویں دورن نے وی اسلام قبول کیتا سی۔ اوہناں نے جورم نوں مبارکباد دیندیاں آکھیا گیرٹ دی اسلام مخالف پارٹی ہالینڈ وچ اسلام دی اکیڈمی تے دعوت دا مرکز بن جاوے گی۔ برطانیہ دے شہرہ آفاق ادیب جارج برنارڈشا نے ورھیاں پہلاں آکھیا سی کہ مغرب دنیا اسلام ول آ رہی اے تے مستقبل وچ محمدؐ دا دین یورپ وچ مقبول ہو کے رہوے گا۔ اسلام سچا دین اے تے ایہ غالب ہون لئی آیا اے ایہدے وچ اوہ پیغام اے جہڑا سوچن سمجھن والیاں دے دلاں تے اثر کردا اے۔ دعا اے کہ ساڈے سعودی عرب دے حکمران اپنے اسلاف نوں یاد کرن تے عیاشی تے عیاشی توں نکل کے اپنے دفاع لئی ہتھیار تیار کرن