چین دے نویں ورھے دے حوالے نال تقریب

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت، پنجاب دی چھترچھاویں چین دے نویں ورھے دے حوالے نال اک بھرویں تقریب دا پربندھ کیتا گیا جہدے وچ ڈائریکٹر جنرل پلاک ثمن رائے نے نویں ورھے دا کیک کٹیا جد کہ ایم پی اے طلعت فاطمہ نقوی (ممبر بورڈ آف گورنر‘ پلاک) نے مہمان خصوصی دے طور تے شرکت کیتی۔ دوجے رَلتیاں وچ چینی مہمان ڈونگ جیاقی‘ وینگ پے تے زونگ شامل سن۔ پلاک دی پوری عمارت نوں سرخ لائٹاں نال سجایا گیا جہدے نال عمارت ہور وی سوہنی ہو گئی۔ اک وڈی سکرین تے چینی تے پاکستانی نغمے پیش کیتے گئے۔

لائیوپرفارمنس وچ سہیل‘ سجاد بری تے عبداللہ قاضی نے چینی تے پاکستانی گانے گا کے حاضرین نوں محظوظ کیتا تے ڈھیر داد وصول کیتی۔ ایس طرح ایہ تقریب اک عالمی سطح دا منظر پیش کرن لگ پئی تقریب وچ میڈیا دے بندے‘ چینی باشندے تے چینی زبان سکھن والیاں توں علاوہ شاہ مکھی تے گرمکھی کلاساں دے طلباء نے بھرویں شرکت کیتی۔ ادارے دی ڈائریکٹر جنرل ثمن رائے نے آکھیا کہ پاکستان تے چین دی دوستی بے مثال اے۔