بلاول اپنی حکومت توں کدوں پچھن گے؟

لکھت:محمد اکرم چوہدری

بلاول بھٹو نے کراچی وچ وزیراعظم پاکستان عمران خان تے تنقید کردیاں ہوئیاں آکھیا اے کہ لہور وچ کنے فلائی اوور تے انڈر پاس بنے، خیبر پختونخواوچ کنے ہسپتال بنے، کہندے نیں وزیراعظم نے معیشت نوں تباہ کر دتا اے۔ اوہناں نے پنجاب حکومت تے وی تنقید کیتی اے۔ بلاول بھٹو کہندے نیں کہ پیپلزپارٹی نے ہمیشہ عوام نوں ریلیف دتا اے۔ طاقت دا سرچشمہ عوام نیں تے پاکستان وچ عوامی حکومت بنا کے رہن گے۔بلاول بھٹو دی بے چینی نوں سمجھنا کجھ مشکل نہیں اے۔ ایہناں دی جماعت دے سرکردہ لوک جیویں کرپشن کیساں وچ پیشیاں بھگت رہے نیں ایہدے توں اندازہ لانا مشکل نہیں اے کہ ایہناں دی حکومت کنی عوام دوست اے تے عوامی خدمت دے ناں تے ذوالفقار علی بھٹو دے سیاسی وارثاں نے پاکستان دی مظلوم تے معصوم عوام دے نال کناں ظلم کیتا اے۔ اج جہڑی معیشت دی خرابی دی پیڑ ایہناں نوں ہو رہی اے ایہ تباہی بلاول بھٹو تے ایہناں دے سیاسی دوستاں دی مرہون منت اے۔ ترقیاتی منصوبیاں دے ناں تے جناں قرض غریب عوام تے لدیا گیا اے ایس بارے بلاول بھٹو زرداری نوں ضرور دسنا چاہیدا اے۔ بچے جوان ہوئے بڈھے ہوئے تے دنیا توں وی چلے گئے پر عوام نوں ریلیف دین دے دعویدار اج تک سندھ توں غربت ختم نہیں کر سکے، عام بندہ غربت دی لکیر توں تھلے زندگی بسر کر رہیا اے۔ پین نوں پانی نہیں ملدا، سون لئی چھت نہیں اے تے ڈھڈ بھرن لئی کھانا نہیں اے تے چلے نیں عوام نوں ریلیف دین تے عوامی حکومت قائم کرن۔ کوئی ایہناں توں پچھے کہ ورھیاںتک پیپلزپارٹی نے سندھ تے حکومت کیتی اے ایہدا نتیجہ کیہ اے۔ نہ امن و امان اے نہ تعلیم اے نہ روزگار اے فیر ایہناں مظلوماں دے ووٹاں نال حکومت حاصل کرن دے بعد بلاول تے ایہناں دے وڈیاں نے ترقیاتی کم کتھے کروائے نیں۔ عوام دی ترقی تے نظر نہیں آندی پر ایہناں دی جماعت نال منسلک الیکشن لڑن والیاں نے بہت ترقی کیتی اے۔ ایہ جو ہر ورھے سینکڑاں لوک پانی تے علاج دی مناسب سہولتاں نہ ہون دی وجہ توں انتقال کر جاندے نیں کیہ ایہناں دا شمار پاکستان دی عوام وچ نہیں ہوندا۔ کیہ ایہناں نوں ریلیف دینا بلاول بھٹو یاں ایہناں دی جماعت دی ذمہ داری نہیں اے، کیہ اوہ مظلوم ہر انتخابات وچ صرف مہراں لان لئی ای استعمال ہوندے نیں۔پاکستان پیپلزپارٹی نوں سلیکٹڈ لفظ نال خاصی محبت اے۔ ہر واری چوناں وچ سندھ وچ جیویں ایہناں دے لوک سلیکٹ ہوندے نیں ایہناںنوں ایہدی حقیقت وی عوام نوں ضرور دسنی چاہیدی اے۔ عوام نوں روٹی کپڑا تے مکان دا نعرہ دے کے ایہناں دے سیاستدان اپنے لئی تے ایہ ساریاں چیزاں وافر مقدار وچ جمع کرن وچ کامیاب ہو گئے نیں پر ایہناں دی حکومت وچ عوام اج وی روٹی کپڑا تے مکان لئی خوار ہو رہی اے۔ پاکستان پیپلزپارٹی سندھ تے پاکستان دی عوام تے رحم کرے تے کجھ نہیں تے گھٹ توں گھٹ سچ بولنا ای شروع کر دیوے۔ ساڈی عوام بہت فراخدل اے اوہ یقینا ایہناں نوں معاف کردین گے۔اج کراچی دی جہڑی حالت اے ایہ کسے ہور دے دور حکومت وچ نہیں ہوئی ایہدی ذمہ داری بلاول بھٹو زرداری دی جماعت تے لاگو ہوندی اے۔ پاکستان دے معاشی گڑھ نوں جرائم پیشہ بندیاں دا گڑھ بنا دتا گیا تے بلاول بھٹو دی حکومت چپ چاپ ویکھدی رہی۔ کراچی دا امن تباہ کر دتا گیا تے پاکستان پیپلزپارٹی عوام نوں ریلیف دین دے ناں تے چپ رہی۔ کراچی نوں گندگی دے شہر وچ بدل دتا گیا تے بلاول بھٹو نوں ہر پاسے خوشبودار پھل نظر آندے رہے۔ ایہ ایہناں دی گورننس اے تے ایہ ایہناں دی سیاست اے۔ ایس سارے سیاسی عمل وچ دور دور تک کدھرے وی عوامی فلاح دا پہلو نظر نہیں آندا پر سیاستداناں دی فلاح و بہبود ریاست دے وسائل توں خوب ہوئی اے۔ جوش خطابت وچ بلاول بھل جاندے نیں کہ ایہناں دی حکومت وچ انسان کتیاں دے وڈھن نال مردے رہے نیں۔ نہ ایہ انسانی حقوق دی حفاظت کر سکدے نیں نہ بیمار جانوراں دے علاج دی اہلیت رکھدے نیں فیر کس ڈھٹائی دے نال عوام نوں گمراہ کرن، ایہناں دی ہمدردی حاصل کرن تے اپنی غلطیاں نوں لُکان لئی سرکار نوں برا بھلا کہندے رہندے نیں۔بلاول بھٹو نوں چاہیدا اے کہ اپنے پیو دا خیال رکھن، اوہناں دے علاج تے توجہ دین۔ اوہناں نوں توجہ تے بہتر علاج دی لوڑ اے۔ سندھ وچ چنگے ہسپتال بنان تے توجہ دین۔ سندھ دے عوام نوں تعلیم دی بہتر سہولتاں فراہم کرن تے توجہ دین۔ وفاقی حکومت تے وسدے رہن پر اپنا احتساب وی کر لین۔ مالی معاملیاں دا حساب تے نیب کر لوے گا پر خود احتسابی کرن تے اندازہ ہووے گاکہ پاک وطن دے اہم ترین صوبے دی سادہ لوح عوام تے جانے انجانے وچ اوہناں نے تے اوہناں دے وڈیاںنے کیہ مظالم ڈھائے نیں۔وزیراعلیٰ سندھ مراد علی شاہ کہندے نیں کہ گھبرائے ہوئے لوک اسلام آباد گئے سن۔ اصل گھبراہٹ وزیراعلیٰ تے ایہناں دے ساتھیاں نوںاے کیوں جے اوہ جان چکے نیں کہ ہن کرپشن تے مال بنان دا بوہا بند ہو چکیا اے تے جہنے جہنے لٹ مار کیتی اے اوہنوں حساب دینا ہووے گا۔ کنی بدقسمتی اے کہ جہناں دے ناں دے نال رہنما لکھیا جاندا اے ایہناں لوکاں نے عوام تے ملک دے نال ظلم کیتا اے۔ مراد علی شاہ نوں اپنی تے پیپلزپارٹی دی فکر کرنی چاہیدی اے پارٹی دے اندر موجود گھبراہٹ دی فکر کرن۔ اوہ سندھ دی عوام دے مقروض نیں ایس قرض نوں اتارن۔ ورھیاں توں جھوٹے وعدیاں دے نال حکومت وچ آندے رہے نیں نیک نیتی تے خدمت دے جذبے نال کم کیتا ہوندا تے اج کراچی وچ جانوراں دے وڈھن نال انسان نہ مر رہے ہوندے۔ بیانات دے بجائے عملی اقدامات ول آن تے جہدے جہدے تے الزامات یاں کیسز نیں تفتیشی اداریاں نوں جواب دین۔ سندھ کارڈ استعمال کرن دے بجائے عوام نوں حقیقت دسن۔ روٹی کپڑا تے مکان دین دے دعویداراں توں ظلم دا حساب لین دا ویلا آگیا اے۔ اوہ عوامی حکومت بنانا چاہندے نیں ساڈی دعا اے کہ کاش اوہ عوامی حکومت بنے جہدے وچ سرمایہ داراں، صنعتکاراں تے جاگیرداراں دے نمائندے شامل نہ ہون۔