کپتان جی… اسیں فیر نہ ای سمجھیے

لکھت:ایثار رانا

پیارے وزیراعظم فیر اسیںنہ ای سمجھیے، جیون جو گیا ہن سکون لئی سانوں قبر دا انتظار کرنا پوے گا۔ گود توں گور تک دے سفر وچ بہت تکلیفاں سہنے آں اسیں پاکستانی، ایہ تے دس دیندے کہ سانوںتے ساڈی حسرتاںنوں کفن دی سہولت وی ملے گی یاں نہیں، جو بے سروسامانی اے۔ ایہ بے برکتی اے جو بھکھ اے کیہ کریئے؟ جے اجازت دیو تے تھوڑا جیہا چنا منا جیہا گھبرا لیئے، پر سوال ایہ اے کہ؟
اب تو گھبرا کے یہ کہتے ہیں کہ مر جائیں گے
مرکے بھی چین نہ پایا تو کہاں جائینگے
میرے ہیرو کپتان، قبر وچ سکون ایناں آسان تھوڑی اے۔ انسان حیاتی وچ ای اپنے سکون یاں بے سکونی دا سامان اکٹھا کر لیندا اے بھاویں ایہ دنیا کھیڈ تماشا اے پر ایہ تماشا ایناں سوکھا وی نہیں، اچیاں شاناں تے پھٹے دھیاناں والے میرے وزیراعظم، زندگی عام بندے لئی جناں وڈا امتحان اے ایس توں کدھرے وڈا حکمران لئی جنجال اے، انج نہ ہوندا تے دنیا دا سب توں کامیاب حکمران حضرت عمرؓ سوندے سوندے اٹھ کے بیٹھ نہ جاندے بطور حکمران اپنی پکڑ دے خوف نال روندے نہ۔ بہرحال بھرا جی ڈاڈھے دا ستے ویہاں دا سو ہوندا اے تسیں کرومو جاں، کھا آلو گوشت تے سانوں قبر دے سکون دی تسلی تے رکھو۔ سنتا سنگھ مزے لے لے کے رس گلے کھا رہیا سی۔ اوہدی بیوی بولی سانوں وی چکھاؤ کیسا مزا اے۔ سنتا نے اک رس گلا دے دتا۔ اوہ بولی بس اک، سنتا سنگھ بولیا باقی رس گلیاں دا وی ایہو سواد اے۔ یار تھوڑا جیہا سنتا بن جا گھٹ توں گھٹ ایس زندگی وچ سانوں ایس بھکھی ندیدی غربت دی ماری عوام نوں اک رس گلا ای چکھا دیو۔ یقین کرو فاقیاں نے حلق زہر آلود کر دتا اے۔ سانوں وی آزادی دا آسودگی دا تھوڑا جیہا سواد چکھا دیو، ساڈا کم اے تہاڈے عدل دا ٹل کھڑکانا۔ اگوں جیویں تہادی مرضی۔شکر اے ساڈے پیارے میاں شہباز نے اک واری فیر مدھر گیت سنا دتا۔ راگ درجے جے گھنٹی وچ اوہ کہندے نیں کہ اوہناں نے اپنی زندگی وچ عمران خان توں زیادہ جھوٹا تے یوٹرن لین والا نہیں ویکھیا۔ میاں جی بس کسر نفسی توں کم لے رہے نیں نہیں تاں تازہ ترین آرمی ایکٹ دی ترمیم وچ جیویں دا یوٹرن اوہناں نے لیا ایہدے تے ن لیگ دے سیمی کامریڈ جیویں گھمن گھیریاں کھا رہے نیں، اوہ خاصہ عبرتناک اے۔ میں واری جاواں اوہناں دی معصومیت تے روز شیشہ ویکھدے نیں فیر کہندے نیں کہ عمران توں ودھ جھوٹا نہیں ویکھیا۔ سانوں تے اوہناں دی نہیں تاں میرا ناں بدل دینا والی تقریراں دا والیم نہیں بھلدا۔ سردی اپنے عروج تے سی سردار بنتا سنگھ دودھ والے دے آن تے بیگم دی شال منہ تے لپیٹ کے بوہے تے گئے، ہتھ ودھا کے دودھ دا برتن دتا واپس مڑے تے دودھ والا بولیا ڈارلنگ اج لفٹ نہیں کرا رہیاں۔ بنتا سنگھ بستر تے لیٹ کے ہسن لگے بیگم نے پچھیا تے بولے لگدا اے دودھ والے دی بیگم دی شال وی تیری شال ورگی اے۔ قسمے میاں جی تہاڈے وعدیاں والی شال کسے طرح وی ساڈے خان صاحب توں وکھری نہیں۔ اوہ وی لفٹ نہیں کراندے تے کراندے تسیں وی نہیں سی۔ شاید 72ورھیاں توں ساڈے نصیب دے متھے تے ’پپو یار تنگ نہ کر‘ دانوٹس لگ گیا اے۔ آرمی ایکٹ تے جیویں تہانوں کھچ دھرو کے اک پیج تے لیایا گیا اوہ نظریاتی سیاسی تدبر دی اک اعلیٰ مثال اے۔ جے ہن مریم بی بی تے نوازشریف کمپنی کھوتی توں ڈگ کے غصہ خواجہ آصف تے اتار رہے نیں تے کھسیانی بلی خواجہ دا ای کھمبا نوچ سکدی اے۔ غریب دی جورو سب دی بھابھی ہوندی اے۔ غریب خواجہ آصف تہاڈے وس پے گیا اے جو مرضی سلوک کرن۔لو جی تیار ہو جاؤ، پنجاب کابینہ دے سارے مسافر اپنے سامان دی آپ حفاظت کرن، سنیا اے اک واری فیر کارکردگی دی بنیاد تے اکھاڑ پچھاڑ تے ڈانٹ پھٹکار دا سوڈ شروع ہون جا رہیا اے۔ گلاں ہون گیاں سادہ مزاج عثمان بزدار دے خلاف اے جے اوہناں نوں ٹیم نکمی دیو گے، اوہناں دے اختیارات تے خود گاٹی سُٹ کے کھچ مارو گے تے اوہ بے چارہ سادہ بندہ کیہ کرے گا۔ اک واری وزیراعلیٰ عثمان بزدار نوں پورے وزیراعلیٰ دے طور تے کم کرن دا موقع تے دیو، اپنی ٹیم اوہناں دی مرضی نال بنان تے دیو فیر حساب وی کر لین، نہیں تاں اوہ کہہ سکدے نیں کہ دتا کیہ سی جہدا حساب منگدے او بھائی بدبودار جراب اک پیر توں اتار کے دوجے وچ پوا دین نال مسئلہ حل نہیں ہووے گا۔ نویاں جراباں لیاؤ پیر دھواؤ فیر ریساں لگواؤ۔ سردار سنتا سنگھ توں کسے نے پچھیا محبت اک طرفہ ہونی چاہیدی یاں دوطرفہ اوہ بولے یکطرفہ، کیوں جے دوطرفہ ہون نال شادی ہون دا خطرہ ہوندا اے، نہ بچو شادی دے خطرے توں دوطرفہ محبت کرکے تے ویکھو۔بھیا پاکستان کیہ تے امریکہ کیہ، سب تھاں اک ای ٹوپی ڈرامہ اے، کانگریس ٹل دا زور لا لوے ہووے گا اوہی جو ٹرمپ چاہوے گا۔ پنچاں دا آکھیا سر اکھاں اُتے تے پرنالہ اوتھے بہے گا۔ امریکی کانگریس کدی وی ٹرمپ نال جنگ دا اختیار سلب نہیں کر سکدی۔ اوہ جنگ نہیں کر سکدا تے صدر ای کیوں بنیا۔ تسیں ڈونلڈ دی ٹرمپیاں نہیں روک سکدے، دنیا نائن الیون دے بعد جنی غیر محفوظ ہوئی پہلاں کدی نہ سی۔ اج ہر تھاں مسلماناں دے لہو نال کھیڈیا جا رہیا اے۔ لیبیا، مصر، عراق، شام، یمن، افغانستا، عراق، کشمیر، فلسطین سب تھاں مسلمان مر رہیا اے، کروسیڈ دسے بغیر تہذیباں دا تصادم شروع کر اچکی۔ ہور لہو بہے گا۔ایران نا ل پنگا ختم نہیں ہووے گا کیوں جے مسلماناں نوں مارن تے اوہناں توں ای خون بہا لین دا جواز برقرار رہنا چاہیدا اے، پاکستان جے پرویز مشرف دی طرح یس سر نہ بنیا تے ایہ اگ ساڈے صحن وچ آن لئی تیار اے۔ ایہ بلوچستان وچ دھماکے ساڈے لئی چتانی نیں، امتحان تے قیادت دا ہن شروع ہویا اے کہ اسیں کیویں اپنی عزت تے وقار بحال رکھدیاں ہوئیاں انکار کراں گے۔ کوئٹہ دھماکہ سانوں اک چیلنج اے۔ سانوں لاشاں چکنی آندیاں نیں۔ سڑکاں تے مسیتاں بازاراں وچ کئی پٹی لاشے چکنے آندے نیں، ہن غیرت نال سر چکن دی لوڑ اے۔ قوماں دی بقا لئی لاشاں توں کودھرے ودھ غیرت نال سر چک کے جین دی لوڑ ہوندی اے۔