سرکار نے آٹا بحران تے لہور ہائی کورٹ وچ جواب جمع کرا دتا

لہور: حکومت پنجاب نے آٹا بحران بارے کیس وچ لہور ہائی کورٹ وچ جواب جمع کراندیاں ہوئیاں آکھیا اے پنجاب وچ آٹے دا کوئی بحران نہیں۔

چیف جسٹس لہور ہائی کورٹ مامون رشید شیخ نے آٹے تے کنک دیاں قیمتاں وچ وادھے دے خلاف جودیشل ایکٹوازم پینل دی درخواست دی سماعت کیتی۔

ایڈیشنل چیف سیکرٹری شوکت علی تے سیکرٹری فوڈ وقاص علی محمود عدالت وچ پیش ہوئے۔ ایڈیشنل چیف سیکرٹری شوکت علی نے جواب جمع کرایا کہ پنجاب وچ آٹے دا کوئی بحران نہیں تے ساڈے کول کنک وافر مقدار وچ موجود اے۔

ایڈیشنل چیف سیکرٹری پنجاب آکھیا ٹے دی قیمت 70روپے کلو نہیں 40روپے کلو اے، ایس ویلے 20کلو آٹے دے تھیلے دی قیمت 805روپے مقرر اے، جو دکاندار 20کلو تھیلے دی 805توں ودھ قیمت وصول کر رہے نیں اوہناں دے خلاف کاروائی ہووے گی۔