پاکستان نے پہلے ٹی ٹونٹی وچ بنگلہ دیش نوں ہرا دتا

لہور: پاکستان نے پہلے ٹی 20میچ وچ بنگلہ دیش نوں 5وکٹاں توں ہرا کے سیریز وچ 1-0دی برتری حاصل کر لئی۔

لہور دے قذافی سٹیڈیم وچ کھیڈے گئے پہلے ٹی ٹونٹی میچ وچ بنگلہ دیش دے کپتان محمود اللہ نے پاکستان دے خلاف ٹاس جت کے پہلے آپ بیٹنگ کرن دا فیصلہ کیتا تے مقررہ 20اوورز وچ 5وکٹاں دے نقصان تے 141سکور بنائے جد کہ پاکستان نے مطلوبہ ہدف پنج وکٹاں دے نقصان تے پورا کیتا۔ ہدف دے تعاقب وچ بابر اعظم تے احسان علی نے اننگز دا آغاز کیتا پر کپتان پہلے ای اوور دی دوجی گیند تے کھاتہ کھولے بغیر پویلین واپس ٹُر گئے جہدے بعد محمد حفیظ بیٹنگ لئی آئے تے صرف 17سکور ای بنا سکے۔

شعیب ملک تے احسان علی نے ذمہ دارانہ بلے بازی دا مظاہرہ کردیاں سکور بورڈ نوں اگے ودھایا، احسان 36سکور بنا کے آؤٹ ہوئے، افتخار احمد 16دے مہمان ثابت ہوئے تے عماد وسیم 6سکور تے بولڈ ہوئے پر شعیب ملک نے ذمہ داری دا مظاہرہ کردیاں ادھی سنچری سکور کرکے ٹیم دی جت وچ اہم کردار ادا کیتا، اوہ 58سکور تے ناٹ آؤٹ رہے۔