’’ان ہائوس‘‘ تبدیلی دا موسم

لکھت:محمد نواز رضا

2020ادا سورج طلوع ہوندیاں ای وفاق وچ چار اتحادی جماعتاں دی بیساکھیاں تے قائم تحریک انصاف دی حکومت لرزاں براندام ہو گئی چاراں اتحادی جماعتاں نوں اچانک اوہ مطالبات تے وعدے یاد آ گئے جہڑے تحریک انصاف نے حکومت قائم کردیاں ہوئیاں ایہناں جماعتاں نال کیتے سن۔ اتحادیاں ولوں اکھاں وکھان نال حکومت پریشان ہو گئی۔ سیاسی حلقیاں وچ ایہ سوال زیر بحث اے کہ کیہ واقعی ان ہاؤس تبدیلی دی کوئی سنجیدہ موومنٹ اے۔حا ل وچ ای پاکستانی سیاست دے اک اہم کھڈاری نے ملاقات وچ انکشاف کیتا اے کہ چار اتحادی جماعتاں ولوں اچانک ناراضی تے گلے شکوے بلاوجہ نہیں ایہ اک نپی تلی تحریک (calculated move) دا حصہ اے۔ اچانک دھماکہ ہو سکدا اے۔ بظاہر حکومت ایہ دعویٰ کر رہی اے کہ اوہنوں کسے پاسیوں کوئی خطرہ نہیں اے پر جیویں وزیراعظم عمران خان نے اتحادی جماعتاں دے شور شرابہ تے آہ و زاری دا فوری نوٹس لیا اے تے حکومتی ٹیم نوں فوری طور تے اتحادی جماعتاں نال رابطے قائم کرن تے اوہناں دی شکایتاں دا ازالہ کرن دی ہدایت کیتی اے ایہدے توں اندازہ لایا جا سکدا اے کہ کسے نہ کسے سطح تے کجھ نہ کجھ ہو رہیا اے جہنوں نکام بنان لئی پوری پارٹی میدان وچ اتر آئی اے۔ اتحادی جماعت ایم کیو ایم پاکستان دے سربراہ خالد مقبول صدیقی نے آ ؤ ویکھیا نہ تاؤ اپنے مطالبات منوان لئی وفاقی کابینہ چھڈن دا اعلان کرکے حکومتی حلقیاں وچ کھلبلی مچا دتی۔ اگلے ای دیہاڑ حکومتی کمیٹی اوہناں نوں منان لئی کراچی اپڑ گئی پر اوہ نہ صرف منے ای نہیں سگوں اگلے دیہاڑ اپنا استعفیٰ وزیراعظم نوں بھجوا دتا تے اوہناں توں فوری طور تے استعفیٰ قبول کرن دی عرضی کر دتی۔ دلچسپ امر ایہ اے ساری اتحادی جماعتاں اک ساہ وچ حکومت نال گلے شکوے کر رہیاں نیں تے دوجے ساہ وچ حکومت دے نال کھڑا ہون دا اعلان وی کر رہیاں نیں۔ سب توں ودھ اُچی آواز وچ مسلم لیگ (ق) دی اے جہنے حکومت دے خلاف دفتر شکایات کھول رکھیا اے۔ پاکستان مسلم لیگ (ق) دے صدر چودھری شجاعت حسین تے پنجاب اسمبلی دے سپیکر چودھری پرویز الٰہی نال ملاقات کرے تے بہتر اے جہناں نوں حکومت توں شکایتاں نیں جہدے بعد پنجاب ہاس اسلام آباد پرویز خٹک تے جہانگیر ترین نے ناراض مسلم لیگیاں نال ملاقات کیتی۔ وزیراعلیٰ پنجاب عثمان بزدار نوں خاص طور اسلام آباد بلوایا گیا اوہ وی ایس ملاقات وچ موجود سن۔ حکومتی حلقیاں ولوں ایہ تاثر دین دی کوشش کیتی جا رہی اے سب چنگا اے، حکومت ڈگن دا کوئی امکان نہیں پر حکومتی حلقیاں وچ افراتفری توں اندازہ لایا جا سکدا اے کہ حکومت نوں فکر لاحق ہو گئی اے۔ مذاق مذاق وچ ان ہاؤس تبدیلی دا شوشہ حقیقت دا روپ نہ دھار لوے ایس لئی حکومت ولوں اتحادیاں دی ناراضی نوں سنجیدگی نال لیا جا رہیا اے۔ دوجی اتحادی جماعتاں بلوچستان نیشنل پارٹی (مینگل)، گرینڈ ڈیمو کریٹک الائنس تے مسلم لیگ (ق) نوں وی اپنے مطالبات یاد آ گئے نیں۔ وزیراعظم عمران خان نے صورتحال دی سنگینی دے پیش نظر ایم کیو ایم پاکستان سنے ساری اتحادی جماعتاں دے تحفظات دور کرن دا فیصلہ کیتا اے۔ گورنر سندھ عمران اسماعیل گرینڈ ڈیمو کریٹک الائنس دے سربراہ پیر صاحب پگارا دے کول حاضری دے چکے نیں۔ بظاہر ان ہاؤس تبدیلی دے کوئی آثار نظر نہیں آندے پر جیویں حکومتی حلقیاں وچ افراتفری نظر آ رہیا اے ایہدے توں اندازہ لایا جا سکدا اے کہ کجھ ہون والا اے جہنوں غیر موثر بنان لئی پوری حکومت توپ تفنگ لے کے میدان وچ اتر آئی اے حکومت نے کسے ممکنہ موو نوں غیر موثر بنان دے اتحادیاں دے شکوے شکایتاں دور کرن دے نویں سرے توں وعدے شروع کر دتے نیں۔جمعیت علماء اسلام (ف) دے سربراہ مولانا فضل الرحمان سیاسی منظر تبدیل کرن دی جہڑی یقین دہانی دے بعد اسلام آباد توں دھرنا ختم کرکے واپس چلے گئے سن ایہدے عملی شکل اختیار کرن دی آس وچ اسلام آباد وچ ڈیرے پا رکھے نیں۔ پیپلزپارٹی دے چیئرمین بلاول بھٹو زرداری پہلاں ای ایم کیو ایم نوں اپوزیشن کیمپ جائن کرن دے عوض سندھ حکومت وچ ایم کیو ایم نوں بہت کجھ دین دی پیشکش کر چکے نیں۔ اجے تک ایم کیو ایم نے پیپلزپارٹی دی پیشکش قبول نہیں کیتی بھانویں خالد مقبول آکھیا اے ایہناں ساری چیزاں دا پیپلزپارٹی دی آفر نال لینا دینا نہیں، میرا وزارت وچ بیٹھنا بہت سارے سوالاں نوں جنم دیندا اے ایس لئی میں وزارت وچ نہیں بیٹھ رہیا قومی اسمبلی وچ متحدہ دی مجموعی طور تے 7نشستاں نیں۔حکومت توں علیحدگی دی صورت وچ حکومت نوں وڈا جھٹکا لگ سکدا اے حکمران جماعت تحریک انصاف دی 156، مسلم لیگ (ن) دی 84ی، پیپلزپارٹی دی 56، متحدہ مجلس عمل دی 16 تے مسلم لیگ (ق) دی 5نشستاں نیں۔ ایہدے علاوہ گرینڈ ڈیمو کریٹک الائنس دی 3، عوامی مسلم لیگ، عوامی نیشنل پارٹی تے جمہوری وطن پارٹی دی اک، اک، بلوچستان نیشنل پارٹی دی 4، بلوچستان عوامی پارٹی 5 تے آزاد ارکان دی تعداد 4 اے۔حکمران اتحاد دے کول مجموعی طور تے 183 نشستاںنیں جد کہحزب اختلاف دے کول 158نشستاں نیں۔ایم کیو ایم پاکستان دے اپوزیشن کیمپ جائن کرن نال ایہ تعداد 165ہو جاندی اے ایس طرح حکومت دی پارلیمانی قوت 176 رہ جاندی اے۔ بلوچستان نیشنل پارٹی دی وی کور کمیٹی دا اجلاس ہو چکیا اے جہدے وچ بی این پی دے رہنما ڈاکٹر جہانزیب جمال نے حکومتی کمیٹی دے ارکان جہانگیر ترین ، بیرسٹر فروغ نسیم ، اعظم سواتی نال ہون والی گل بات توں آگا ہ کردتااے حکومت نے گوادر پورٹ اتھارٹی آرڈیننس 2002وچ ہور ترمیم لیان تے گواچے بندیاں دی بازیابی لئی اقدامات دی یقین دہانی کرائی اے ۔ بی این پی گوادر وچ غیر مقامی بندیاں نوں شناختی کار ڈ وچ مستقل پتہ درج کرن تے اوہناں نوں ووٹ دا حق دین دی مخالف اے ہن ویکھنا ایہ اے حکومت بی این پی دے ایس مطالبہ تے کس حد تک عمل درآمد کرن دی پوزیشن وچ اے کیوں جے ایہ قنون صرف گوادر لئی نہیں بنایا جاسکداسگوں ایہدا اطلاق پورے ملک وچ ہووے گا۔اتحادی جماعتاں دی بغاوت نال پی ٹی آئی دے اقتدار دا سورج ہمیشہ لئی ڈُب سکدا اے سرکار نے وزیر قنون فروغ نسیم نوں وی ایم کیو ایم نوں راضی کرن وچ اپنا کردار ادا کرن دی درخواست کیتی پر ایم کیو ایم نال تعلق ہون دے باوجود ایم کیو ایم دا کوئی لیڈر ایہناں نال گل کرن لئی تیار نہیں۔ ایم کیو ایم دا کہنا اے ایہناں نوں ساڈے کوٹے نال وزیر نہیں بنایا گیا سگوں اوہ کابینہ وچ کسے ہور دی نمائندگی کر رہے نیں۔ پی ٹی آئی دی صفاں وچ ایم کیو ایم دے کابینہ وچ واپس نہ آن تے پریشانی پائی جاندی اے۔ مسلم لیگ (ن) دے صدر و قومی اسمبلی وچ قائد حزب اختلاف میاں شہباز شریف دے لندن وچ قیام نے طوالت پھڑ لئی اے اوہناں دے فوری طور تے وطن واپس آن دا کوئی امکان نہیں اوہ لندن وچ بیٹھ کے ای سیاست دے تانے بانے بن رہے نیں تے عبوری مدت لئی ان ہاؤس تبدیلی دا خواب ویکھ رہے نیں۔ جیویں ای اوہناں دی خواہش پوری ہون دی صورت نظر آوے گی اوہ اسلام آباد ول رخت سفر بنھ لین گے۔ ایم کیو ایم دی بغاوت دا اندازہ ایس گل توں لایا جا سکدا کہ وزیراعظم عمران خان دے بلان تے خالد مقبول صدیقی نے اسلام آباد آن توں انکار کر دتا تے آکھیا جے وزیراعظم عمران خا ن نے اوہناں نال ملنا اے تے اوہ جدوں کراچی آن گے اوہناں نال ملاقات ہو جاوے گی۔ سروسز ایکٹس وچ ترامیم دی حمایت تے متحدہ حزب اختلاف تقسیم ہو کے رہ گئی اے جد کہ اپوزیشن دی 9جماعتاں تے مشتمل رہبر کمیٹی ٹُٹن دا خطرہ وی ودھ گیا اے۔ جمعیت علماء اسلام (ف) دے سربراہ مولانا فضل الرحمان آکھیا اے جے اپوزیشن ای کھلر جاوے تے حکومت نوں کیویں کمزور کیتا جا سکدا۔ اپوزیشن دی وحدت نال ای حکومت کمزور ہوندی اے۔ مسلم لیگ (ق) نے حکومت نوں مطالبات تے عملدرآمد لئی اک ہفتے دی ڈیڈ لائن دتی اے تے حکومت توں اک ہفتے وچ مطالبات تے عملدرآمد دے بعد ای حکومت نال ہور گل بات ہو سکدی اے۔ مسلم لیگ (ق) دے رہنماواں نے ایس پروپیگنڈا تے وی شدید ناراضی دا اظہار کیتا اے مسلم لیگ (ق) مونس الٰہی نوں وزیر بنان لئی سب کجھ کر رہی اے مسلم لیگ (ق) دے رہنماواں آکھیا ایہناں دے مطالبات وچ مونس الٰہی نوں وزیر بنانا شامل نہیں ۔ مسلم لیگ (ق) دے وفد نے ملاقات توں پہلاں حکومتی کمیٹی تے واضح کر دتا جے ملاقات دے بعد حکومتی کمیتی ولوں ایہ تاثر دتا گیا کہ مسلم لیگ (ق) مونس الٰہی نوں وزیر بنوانا چاہندی اے تے فیر ایہ ساڈی آخری ملاقات ہووے گی۔ عوامی مسلم لیگ شیخ رشید پی ٹی آئی دی واحد اتحادی اے جہڑی ہر حال وچ خوش اے۔ اوہناں آکھیا کوئی عدم اعتماد دی تحریک نہیں آ رہی۔ فروری مارچ وچ سیاست اُتے تھلے ہووے گی پر عمران خان ای وزیراعظم رہن گے۔