کلین اینڈ گرین ڈرامہ تے پانی وچ ڈبیا گجرات

Hameed Ullah Bhatti

لکھت:حمیداللہ بھٹی

وکھو وکھ محکمیاں دے درجناں بندے موجود نیں تے سب ڈاکٹر خرم شہزاد دا انتظار کر رہے نیں جہناں دے آن وچ تاخیر ہو رہی اے کسے نوں خیال آندا اے کہ پتہ نہیں جہڑے شاپنگ بیگ وچ کوڑا پانا اے اوہ ہے وی یاں نہیں تسلی کر لئی جاندی اے کہ جیویں ڈی سی دی آمد ہووے گی فوری کم شروع کیتا جا سکدا اے کجھ لمحے لنگھدے نیں تے فیر کسے نوں خیال آندا اے کہ ڈی سی تے بہت نفاست پسند نیں اوہناں نوں گندگی ناپسند اے فوٹو سیشن دے دوران کوڑے والا شاپنگ بیگ اوہناں نے ای چکنا اے بھاویں کجھ لمحیاں وچ ای تصویر بن جاوے گی پر ایہ کجھ لمحے وی اوہناں دی طبیعت نوں ناگوار گزر سکدے نیں ایسے لئی دستانیاں دا بندوبست کیتا جاندا اے تاں جے شاپنگ بیگ چُکن توں پہلاں ہتھ جراثیم توں محفوظ رہن فیر ایس گل تے سوچ وچار شروع ہو جاندی اے کہ اپنے افسر نوں گندگی دے ڈھیراں توں اُٹھن والے بدبو دے بھبوکیاں توں کیویں بچایا جاوے حل ایہ کڈھیا جاندا اے کہ منہ لئی ماسک منگوا لیا جاندا اے انتظار کردے افسر اپنے صاحب دے ماتحتاں نال رابطے کردے نیں کدوں گھر توں دفتر جاندے نیں تے کدوں دفتر توں کلین اینڈ گرین گجرات دے پروگرام ول روانگی ہوندی اے سب اپنے اپنے ذرائع توں معلومات لیندے نیں پر کجھ واضح نہیں ہوندا پر کیہ کردے انتظار دی کوفت چُکن دے سوا کوئی چارہ نہ سی کافی دیر دے بعد اک ذریعے توں پتہ چلدا اے کہ ڈی سی دی سواری پروگرام ول نکل چکی اے ہر پاسے بھج نس شروع ہو جاندی اے انتظامات دا بار بار جائزہ لیا جاندا اے کسے چیز دی کمی تے نہیں رہ گئی آخر کار سب متفق ہو جاندے نیں کہ کسے چیز دی کمی نہیں رہی استقبال کیویں ہووے گا؟ سب توں پہلاں ہتھ کون ملائے گا؟ طے کرن دے بعد سارے چہریاں تے مسکراہٹ سجائے ضلعی انتظامی افسر دی راہ ویکھن لگدے نیں۔صاحب آندے نیں اک پُرغرور نظر سب تے پاندے نیں تے پچھدے نیں کم شروع کیتا جاوے سارے اک زبان نال جواب دیندے نیں جی جناب جیویں تسیں مناسب سمجھو اینی دیر وچ ماسک تے دستانے پیش کیتے جاندے نیں تے فیر شاپنگ بیگ پھڑایا جاندا اے تصویراں لین والیاں نوں ہشیار کیتا جاندا اے تاں جے کوئی لمحہ کیمرے دی اکھ توں بچ نہ سکے اک بندہ کاغذ دے ٹکڑے سُٹن لگدا اے اک ہاور بندہ کھلرے کاغذ دے ٹکڑے چک چک کے ڈی سی ولوں چکے شاپنگ بیگ وچ پان دی اداکاری کردا اے کجھ قدم چکے جاندے نیں ہر پاسیوں مبارک سلامت دا شور اُٹھدا اے فیر التجا کیتی جاندی اے کیوں جے اج بہت کم ہو گیا اے تھوڑی دیر آرام کر لین تے کجھ شکم سیری کر لین تے بہتر اے ڈی سی ولوں منظوری ملدیاں ای انواع و اقسام دیاں نعمتاں مہیا کیتی جاندیاں نیں ہتھ دھوان لئی وکھرے لوک موجود نیں جہڑے بھج بھج کے پانی تے دوجے لوازمات پیش کردے نیں جہدے بعد تجاویز طلب کیتی جاندیاں نیں کہ اج دی محنت و مشقت دا کل اخباراں، ٹی وی تے کیویں ڈھنڈورہ کیتا جاوے تے فیر اک دلفریب کہانی بنائی جاندی اے کہ موجودہ انتظامیہ کیویں پبلک پرائیویٹ پارٹنر شپ دے تحت کلین اینڈ گرین گجرات دے منصوبے تے کم کر رہی اے؟ تے لوک نہ صرف کلین اینڈ گرین گجرات مہم نوں پسند کر رہے نیں سگوں انتظامیہ دے شانہ بشانہ کم وی کر رہے نیں اک دو وڈے افسراں نوں آکھیا جاندا اے کہ وڈے کاروباری لوکاں دی ڈیوائیڈر نوں رنگ کرن تے گرین بیلٹ تے پودے لان دی ذمہ داری دیو تے جدوں کم ہو جاوے تے مینوں آگاہ کرو تاں جے میں تصویر بنوا کے وزیراعلیٰ دے دفتر گھل سکاں تاں جے وزیراعلیٰ عثمان بزدار جدوں گجرات آن تے اوہناں نوں ایتھے ہون والے مثالی کماں توں پہلاں ای آگاہی ہووے تے اوہ جاندیاں ہوئیاں حوصلہ افزائی دے طور تے کروڑاں دے فنڈز عنایت کر جان۔کلین اینڈ گرین گجرات دا ڈرامہ کرن دی ایس لئی لوڑ محسوس ہوئی کہ کجھ شنیدہ حلقیاں وچ ایہ افواہ گردش کرن لگی اے کہ عثمان بزدار پندرہ جنوری نوں گجرات آ رہے نیں تے عین ممکن اے اوہ محکمیاں دی کارکردگی دی بابت دریافت کرن پر ڈرامے دی حد تک تے گل بن گئی پر سچ ایہ اے کہ عملی طور تے گجرات وچ جابجا گندگی دے ڈھیر نیں مشرق ول ویکھیے تے بائی پاس تے کوڑے دے ڈھیر کئی کلومیٹر تک پھیلے نیں جہناں نے برساتی نالے نوں بند کر دتا اے۔ مغرب وچ کوڑے دے ڈھیراں توںبرساتی نالے دی پہچان نیں پر کسے ذمہ دار نوں احساس تک نہیں گجرات وچ اک ای دوڑ اے کہ وزیراعلیٰ نوں مطمئن کیویں کرنا اے؟ کارکردگی دے پہاڑ کیویں وکھانے نیں تے اوہناں توں شاباش کیویں لینی اے؟ ڈی سی دی قیادت وچ ہر افسر دی بھج نس ایسے نکتے تے اے پر میری معلومات دے مطابق وزیراعلیٰ دی آمد دی خبر مصدقہ نہیں تے زیادہ امکان ایہو اے کہ اوہ اجے گجرات نہیں آن گے پر گجرات انتظامیہ ہلکان اے۔گجرات وچ وسائل دی کمی نہیں عوامی نمائندے فنڈز لیان وچ کوتاہی نہیں کردے گجرات یونیورسٹی منہ بولدا ثبوت اے پر فنڈز نال ہوندا کیہ اے؟ کسے نوں پتہ نہیں جے کوئی بندہ خدا پچھے کہ ڈیوائیڈر تے رنگ کاروباری بندیاں نے کرانا اے پودے وی صاحب ثروت نے لانے نیں تے حکومتی فنڈز دا مصرف کیہ اے؟ جدوں ہر کم مخیر حضرات کردے نیں تے انتظامیہ کارروائی کیوں کردی اے؟ بارہ تیرہ جنوری دی درمیانی شپ توں وقفے وقفے نال ہلکی بارش ہو رہی اے پر پورا گجرات شہر پانی وچ ڈب گیا اے سرکاری عمارتاں وچ آن جان دے راہ بند نیں میونسپل کارپوریشن دے ایڈمنسٹریٹر ڈی سی دا اپنا گھر جوہڑ دا منظر پیش کر رہیا اے پر کسے نوں احساس نہیں سرکاری دفاتر بند نیں افسر دی عدم موجودگی دی بابت پچھو تے ایہو جواب ملدا اے کہ ڈی سی دفتر وچ میٹنگ اے تے جدوں پچھیا جاوے کہ اینی میٹنگاں دی وجوہات تے فائدہ کیہ اے تے جواب وچ خاموشی اختیار کر لئی جاندی اے ڈی سی تے دفتر آندے ای گھٹ نیں جانے کہڑی مصروفیات وچ گواچے نیں ضلع کونسل تے میونسپل کارپوریشن دیاں گڈیاں اوہناں دے کول نیں پر اوہناں نوں دفتر آن وچ اکثر دیر ہو جاندی اے چلو میونسپل کارپوریشن دی حکومتی گڈی تے لہور وچ اوہناں دے اہل خانہ دے استعمال وچ اے ضلع کونسل دی گڈی تے موجود اے جے اوہ وی کسے دوست دے حوالے کر رکھی اے تے دفتر تے گھر دا پیدل راہ دو تن منٹ توں ودھ نہیں فیر وی دیر دی وجہ؟بارش دی رفتار اینی نہیں کہ پورا شہر ای ڈب جاندا معمولی بارش نال ڈُبیا گجرات چیخ چیخ کے لُٹن دی داستان سنا رہیا اے وسائل استعمال کرن دے طریقے و سلیقے توں محروم ایڈمنسٹریٹر دی کارگزاری گندگی توں عیاں اے جو میونسپل کارپوریشن دی ڈاگ تے دستخط کرن وچ ہفتیاں لا دیندے نیں جے نالیاں دی صفائی ول توجہ دیندے تے بند سیوریج کھلوا دتے جاندے تے گجرات شہر ڈُبن توں بچ جاندا پر جہناں دا مطمع نظر صرف وزیراعلیٰ توں ستائش ہووے اوہناں نوں کم نال کیہ غرض؟ جیویں ہر مہینے دے شروع تے وکھو وکھ محکمیاں دے ایسین گھر سد کے حساب کتاب کیتا جاندا اے جے صفائی دے عملے نال میٹنگ کیتی جاندی تے شہر دیاں سڑکاں تالاب نہ بن دیاں لوکاں دے گھراں تے دکاناں وچ پانی داخل نہ ہوندا تے فرنیچر، الیکٹرونکس دیاں شیواں تے کھان پین دا سامان تباہ ہون توں بچ جاندا، دفتراں ، تعلیمی اداریاں، مسیتاں، سکولاں،ہسپتالاں دے راستے نہراں نہ بن دے کروڑاں دیاں گڈیاں تباہ نہ ہوندیاں بند سیوریج تے کوڑے دے ڈھیراں نال بند نکاسی آب دے نالے بس کھولن دی لوڑ سی فیکٹریاں وچ پانی داخل ہون نال کارخانے بند نیں جہدی وجہ توں روزانہ دی اجرت تے گزر بسر کرن والے مزدور فاقیاں نال بے حال نیں پر گجرات انتظامیہ تصویراں بنوان دے مقابلے وچ ہلکان اے۔

اپنا تبصرہ گھلو