خودکشی تے ڈپریشن وچ وادھے دا کارن

لکھت: ڈاکٹر اخترشمار

سوال ہویا کہ خودکشی دا رجحان کیوں ودھدا جا رہیا اے؟ حال وچ ای اک پلس افسر نے اپنے آپ نوں گولی مار کے ہلاک کر لیا اے۔ ایس توں پہلاں وی کئی سی ایس پی افسران خودکش کر چکے نیں۔ نوجوان ذرا جہی گل تے سگوں والدین دی ڈانٹ تے وی خودکشی کر لیندے نیں۔ ایہ ڈپریشن سوسائٹی وچ کیوں ودھ رہیا اے؟ بھوک ننگ، غربت وی ایہدی وجوہات نیں پر نویں نسل وچ ڈپریشن دی اک وجہ سوشل میڈیا وی اے۔ تسیں کسے وی تھاں چلے جاؤ، کوئی وی محفل ہووے ہر بندہ اپنے اپنے موبائل تے مصروف وکھائی دیندا اے۔ مسلسل موبائل دے استعمال نال وی ساڈے اعصاب شل ہو جاندے نیں۔ فیر سوشل میڈیا نے دنیا نوں اک محلے وچ تبدیل کرکے رکھ دتا اے۔ نت نویں معلومات، زندگی دی رنگا رنگی تے اک دوجے توں اگے نکلن دی دوڑ نے وی انسان نوں اندروں کھوکھلا، بے حس تے کسے حد تک کلیاں کر دتا اے۔ غربت مہنگائی وچ وادھے نے ساڈی اخلاقیات دا جنازہ کڈھ دتا اے۔ حرص و ہوس نے انساناں دے دلاں توں محبت، اخوت، ہمدردی، ایثار ختم کر دتا اے۔ ہر کوئی راتوں رات امیر ترین تے مشہور ہونا چاہندا اے۔ تعیش، سہل پسندی لئی وی اسیں جائز نجائز ہر ذریعہ اختیار کرن دی دوڑ وچ ہف رہے آں۔ جدوں اسیں سوشل میڈیا دے راہیں ویکھنے آں کہ بعض لوک کنی پرآسائش زندگی بسر کر رہے نیں حالاں جے ایسے سوشل میڈیا تے غربت ، بیروزگاری تے بھوک ننگ دے مناظر وی ویکھنے آں پر فطری طور تے اسیں اپنے توں اُتے والیاں نوں ویکھ کے اوہناں ورگا ہون تے بنن دی کوشش کرنے آں۔ کہندے نیں اک بزرگ اللہ تعالیٰ توں اپنی غربت دا گلہ کردیاں ہوئیاں اپنے لئی نویں جتی دی دعا منگ رہے سن جدوں اوہ دعا منگ کے باہر نکلے تے اوہناں دی نظر اک بندے تے پئی جہدے پیرای نہیں سن۔ اوسے ویلے اللہ تعالیٰ توں معافی منگی کہ یااللہ تیرا شکر اے میرے پیر تے سلامت نیں۔ ایتھے تے کئی لوک پیراں توں وی محروم نیں۔ جے اسیں سب اپنے توں اُتے والیاں نوں ویکھن دی بجائے اپنے توں گھٹ درجے دے لوکاں تے نظرپا کے حیاتی گزاریئے تے پریشانیاں گھٹ ہو سکدیاں نیں۔ اسیں ہمیشہ اپنے توں ودھ دولت تے سہولتاں رکھن والیوں نوں ویکھنے آں تے فیر جائز نجائز ذرائع اختیار کرکے اپنے آپ نوں ہلاکت وچ پا لینے آں۔ انسان تے اوہ اے جہڑا ہر حال وچ راضی رہوے پر اپنے حالات توں اسیں راضی ای نہیں ہوندے جہدی وجہ توں ملاوٹ کرن والے خوردنی شیواں وچ ملاوٹ کرکے، دوجیاں دی اکھاں وچ دھول جھونک کے پیسہ بناندے نیں۔ ذخیرہ اندوزی کرنے آں۔ نجائز منافع لئی کیہ کیہ کرنے آں۔ زندگی دے ہر شعبے وچ اپنے فرائض نال غفلت ورتدیاں ہوئیاں محنت دے بجائے بددیانتی دا ارتکاب کرنے آں۔ 21وی صدی د ا انسان پریشان ایسے لئی اے کہ اوہنے زیادہ سہولتاں تے تعیشات لئی اپنے آپ نوں کرپٹ کر لیا اے۔ ساڈے دلاں توں ہمدردی، ایثار، صبر تے محبت ختم ہوندی جاندی اے۔ میڈیا دی ترقی نال فائدہ گھٹ تے نقصان زیادہ ہویا اے۔ اندازہ لاؤ جے اک بندہ کسے حادثے وچ، اگ وچ سڑ رہیا اے، یاں کوئی گروہ کسے انسان تے ظلم کر رہیا اے تے سب توں پہلاں اسیں اپنا موبائل کڈھ کے اوہدی فلم بنان لگ پینے آں۔ اسیں اگ بجھان یاں اوہنوں ظلم توں بچان دی تھاں ویڈیو بنان وچ مصروف ہو جاندے آں۔ ہن تے فیس بک دی طرح ہر بندے نے اپنا ویڈیو چینل بنا لیا اے اوہ ہر قسم دا منظر کیمرے دے راہیں دوجیاں تک اپڑان وچ مصروف اے۔ اسیں لمحہ لمحہ موبائل تے اپ ڈیٹ رہن لئی اپنے کئی اہم امور توں غافل ہو جانے آں۔ نویں نسل تے موبائل دی عادی ہو چکی اے 24گھنٹے اسیں آن لائن رہنے آں تے دوجیاں بارے جانن دے تجسس وچ مبتلا رہ کے اپنی صحت تباہ و برباد کر رہے آں۔ جدوں توں انٹرنیٹ موبائل دا حصہ بنیا اے تے کیمرہ موبائل وچ آیا انسان نوں جیویں دیمک لگ گئی اے۔ ایس سوشل میڈیا دی وجہ توں بیماریاں ای نہیں طلاقاں دی شرح وچ وادھا ہو گیا۔ اخلاقی طور تے وی ہن انسان زوال دے عروج تے اپڑ چکیا اے۔ ایہناں اسباب نال ڈپریشن تے تناؤ وچ وادھا ہویا اے تے لوکاں وچ بے حسی، خودکشی تے بے صبری ودھ گئی اے ہن ایہ طوفان رکن والا نہیں اے جدوں تک سرکاری سطح تے موبائل توں انٹرنیٹ ختم نہیں ہونداانسان اندر توں کھوکھلا تے کسے حد تک تنہا ہو چکیا اے۔ ایہ حکومت تے دانشوراں دے سوچن دیاں گلاں نیں۔

اپنا تبصرہ گھلو