بنام بلاول بھٹو

لکھت:آصف عنایت

فیصل واوڈآ تے کاشف عباسی دے جتی ڈرامہ توں دل ایس قدر متنفر ہویا اے کہ قارئین! سیاست تے کالم لکھن نوں بالکل وی جی نہیں چاہ رہیا۔ پوری پارلیمنٹ نوں بوٹ لیگ بنا کے رکھ دتا تے معتبر ترین ادارے دا وقار وی مجروح کر دتا پر اج جناب بلاول بھٹو تے پیپلزپارٹی نال مکالمہ موضوع ایس لئی بن گئے کہ وزیراعظم جہناں نے مینار پاکستان تے اپنے پہلے جلسے وچ میاں نوازشریف تے جناب زرداری نوں ماضی دے سیاستدان کہہ کے پکاریا سی، میری نظر وچ اج آپ ماضی دے مضحکہ خیز سیاستدان بن چکے نیں تے کجھ انج پٹ چکے نیں کہ کوئی اوہناں دی گل تے اعتبار کرن نوں تیار نہیں۔ کسے وی واقعہ تے شخصیت بارے تجزیہ تعصب دی عینک اتارے بغیر نہیں ہو سکدا۔ کون نہیں جاندا کہ پیپلزپارٹی مخالف جنے وی اتحاد بنے اوہناں دے پچھے ملکی تے بین الاقوامی سطح تے کہڑیاں قوتاں سن۔ بھٹو دا عدالتی قتل بین الاقوامی تے مقامی اسٹیبلشمنٹ دی ہن تک دی وطن عزیز دے خلاف دی سب توں وڈی سازش اے جہنے باقی سازشاں لئی پیش قدمی نوں چہل قدمی وچ بدل دتا۔ کون نہیں جاندا کہ صرف پیپلزپارٹی نوں ختم کرن لئی ملکی وسائل جھونک دتے گئے۔ ادارے تباہ کر دتے گئے، بیورو کریسی وچ تفریق کر دتی گئی۔ سرکاری نوکریاں، قرضیاں، پلاٹاں، عہدیاں دی لوٹ سیل لا دتی گئی۔عدلیہ ،انتظامیہ، مذہبی جماعتاں، میڈیا، تاجر، سرمایہ دار، اسٹیبلشمنٹ کہڑی اوہ طاقت تے طبقہ سی جہنوں پیپلزپارٹی دے خلاف ترغیب نہ دتی گئی۔ غلط آکھیا جاندا اے کہ جناب بھٹو لئی لوک باہر نہیں نکلے سن جد کہ لوکاں نے خودکشیاں کیتیاں، کوڑے کھادے، قیداں، جیلاں، قلعے کٹے، پھانسیاں لائیاں، جلاوطنیاں کٹیاں۔ اپنی طاقت توں ودھ قربانیاں دتیاں۔ محترمہ بے نظیر بھٹو دی گیارہ سالہ جدوجہد وچ کون نال سی سب پیپلزپارٹی دے لوک تے جمہوریت پسند قوتاں تے عوام سن۔ پیپلزپارٹی اک اجہی جماعت سی جہدی مثال برصغیر ای نہیں شاید دنیا دی موجودہ تریخ وچ نہیں ملدی۔ہن آنے آں موجودہ حالات وچ جہدے وچ (ن) توں (ق) کشیدکیتی گئی وکھو وکھ جماعتاں دے مرکب دا کٹیل توں پی ٹی آئی نوں ٹانگے دی سواریاں نال حکمران جماعت وچ بدلیا گیا۔ حکومت وچ آن دے بعد عمران خان نے وزارت عظمیٰ تے اپوزیشن رہنما دوہاں سیٹاں دے مزے اِکو ویلے لینے چاہے۔ احتساب نوں عام بندے نے وی انتقام دا ناں دتا۔ میاں صاحبان بیرون ملک نیں۔ حکمران نکام ہو چکے نیں ہن نویں صورتحال وچ وطن عزیز وچ جناب بلاول بھٹو نوں اپنی سیاسی، سماجی صلاحیتاں دے مظاہرے دا بھرپور موقع ملیا اے۔ پنجاب کئی آئی جی پلس تبدیل کرن تے سندھ تے آئی جی پلس مسلط کرن دے باوجود 2019وچ صوبہ سندھ کارکردگی دے حوالے نا ل نمبر 1تے ہے ۔ سندھ وچ بہترین حکمرانی تے وفاق وچ مثبت تے سنجیدہ اپوزیشن دے راہیں بلاول بھٹو اپنے آپ نوں ملکی سطح تے عوامی نمائندگی دا اہل ثابت کر سکدے نیں جہڑے لوک جناب بلاول بھٹو نال رل چکے نیں، اوہ سمجھدے نیں ایس ویلے وطن عزیز وچ بلاول بھٹو توں ودھ ویژنری سیاستدان کوئی ہور نہیں اے۔ قارئین! جناب بلاول بھٹو عام سیاستدان نہیں۔ ایہدی وجہ ایہ اوہناںنے زندگی وچ اوہ حادثے ویکھے جہڑے انساناں نوں لمحیاں وچ بڈھا کر دیندے نیں۔ مراد سعید ورگے لوک اوہناں نوں حادثاتی یاں پرچی چیئرمین کہندے نیں کدی سوچو کہ جہڑے حادثے اوہناں دے نال ہوئے ایس ویلے کرہ اراض تے کوئی دوجا سیاستدان اے جہنوں سیاست دی وراثت وچ ایس حد تک دکھ تے صدمے ملے ہون، جنے بلاول نوں ملے۔ جہڑی شخصیت دے کردار تے وطن عزیز وچ ان گنت داستاناں بیان تے رقم کیتی گئیاں جہنے وطن عزیز دی سیاست دی نویں تے مثبت صورت گری کیتی بلاول دے نانا سن جہناں تے توڑے گئے ظلم تے قصیاں دی لوری اوہناں دی ماں بچپن وچ اوہناں نوں سناندیاں۔ اوہناں دے ماموں دا فرانس وچ قتل دا قصہ لوک جاندے نیں جد کہ اوہناں دی ماں دے دور حکومت وچ بے بسی دی انتہا سی کہ سگا بھرا مار دتا گیا تے قتل دی سازشاں وی اوہناں دے شوہر دی کردار کشی کرن لگیاں جو بچپن وچ دبئی وچ کلا کندھاں نال فٹبال کھیڈدا تے پیو پاکستان وچ قید۔ ماں نوں رہائی ملی ماں پاکستان آئی اجے اپنے پتر دا لڑکپن وی نہ ویکھ سکی تے موت دے چیلنج نوں قبول کیتا۔ کراچی وچ 30لکھ لوکاں توں تجاوز کردا استقبال قاتلاں نوں پریشان کر گیا۔ دو حملے ہوئے پر گھبرائی نہیں۔ مینوں یاد اے 18اکتوبر 2007ء استقبال دے دوران اک صحافی بی بی صاحب توں سوالات کر رہیا سی۔ بی بی شہید نے ساہمنے ویکھیا لوک والہانہ عقیدت دے اظہار وچ دمادم مست قلندر دھمال پا رہے نیں۔ بی بی نے فوراً صحافی توں معذرت کیتی تے آکھیا جے تہاڈے نال گل کردی رہی تے اوہ ناراض ہو جان گے گویا اوہناں نے دور خوشی دے اظہار وچ نامعلوم ورکراں نوں وی عزت دتی رابطہ رکھیا۔ Eny linkرکھیا باڈی لینگوئج وی ورکراں دی محبت دا جواب دیندی پر افسوس کہ ورکر نال بی بی دے بعد رابطہ نہ رکھیا گیا تے نتیجہ ساہمنے اے سگوں جناب بھٹو دی شہادت تے مٹھائیاں ونڈن والے وزیر بن گئے تے قربانیاں دین والے صرف قربان ہو گئے۔ بی بی صاحبہ دے راولپنڈی دے آخر ی جلسہ دے آخری منظر نوں غور نال ویکھیے تے سنیے جو یقین دواندا اے کہ بی بی شہید نوں اپنی موت دا یقین سی۔ اوہناں نے امیدواراں نوں عوام دے منہ در منہ کروا کے آکھیا اوہناں نوں نہیں چھڈو گے۔ کسے دے دباء وچ آکر اوہناں دا ساتھ نہیں چھڈو گے۔ دوجے لفظاں وچ لوٹے نہیں بنو گے تے اوہناں نال رابطہ رکھدیاں ہوئیاں بے وفائی نہیں کرو گے پر افسوس کہ بی بی نوں راہ توں ہٹا دتا گیا۔ Reconciliation دے ناں تے دھوکہ دتا گیا۔ جناب بھٹو صاحب تے حتیٰ کہ بی بی شہید دے دور وچ پیپلزپارٹی دی قیادت کتاب تے عوام دوست سی۔ بعد وچ جوڑ توڑ اقتدار تے کرپشن دوست بن گئی پر ورکراں تے نوجواناں ول توجہ نہ دتی۔ جناب بلاول بھٹو دے سر تے جتھے زرداری صاحب دا سایہ اے، اوتھے اوہناں دے خلاف کیتا جان والا پروپیگنڈا وی اوہناں دے موڈھیاں تے بھار اے۔ جناب بلاول بھٹو نوں بہت کم کرنا اے جہدے وچ ورکراںنال رابطہ تے پارٹی قیادت نوں ورکراں دے نیڑے لیانا اے جو جناب بھٹو دے افکار، بی بی صاحبہ دی جدوجہد توں واقف ہووے۔قیادت لئی کتاب دوستی، عوام، ورکراں نال رابطہ، نوجواناں نال قریبی ناطہ قوم نال سچ بولنا تے باطل نال ٹکرا جانا۔ ایہو بھٹو صاحب دا خاصا سی جہڑا بلاول وچ وی اے پر انجانی قوتاں اوہناں دی حرکت نوں ساقط کر دیندیاں نیں جدوں تک بلاول نوں آپ آزاد نہیں کرواندے قوم نوں آزادی نہیں دوا سکدے۔ جناب ذوالفقار علی بھٹو تقدیر تے محترمہ بی بی شہید معجزیاں تے جناب بھٹو دی وراثت، جرات ، جدوجہد تے غریب نال محبت تے یقین رکھدیاں سن۔ جناب بلاول لئی تقدیر نے راہ بنا دتے تے حکمراناں دی مکمل نکامی دے نتیجے وچ بلاول لئی کارکردگی تے جدوجہد دی بدولت کامیابی حاصل کرن لئی راہ کھول کے معجزے وی وکھا دتے پر جدوجہد دا مطمع نظر پیپلزپارٹی دی مقبولیت، ورکر دا اعتماد تے محبت دی بحالی تے سب توں ودھ کے وطن عزیز دے دکھی تے بے بس عوام نوں دکھاں توں نجات دوانا ہونا چاہیدا اے نہ کہ اقتدار نہیں تاں اقتدار مل وی گیا تے اوہ غلامی در غلامی ہووے گی۔