امریکی صدر دی مسئلہ کشمیر تے ثالثی دی پیش کش

لکھت: اعجاز علی ساغر

5 اگست 2019 نوں بھارت نے مقبوضہ کشمیر تے چڑھائی کردیاں ہوئیاں اوہدی خصوصی حیثیت ختم کر دتی تے پورے مقبوضہ کشمیر نوں دنیا دی سب توں وڈی جیل بنادتا، پکڑ دھکڑ دے ناں تے وڈے پیمانے تے مظلوم تے نہتے کشمیریاں دا قتل عام شروع کر دتا گیا عورتاں دی سرعام عصمت دری کیتی جان لگی تے بھارت اقوام متحدہ دی قرارداداں دی کھل کے خلاف ورزی کرن لگا تے عالمی قوانین دیاں دھجیاں اُڈان لگا ایہ دراصل اقوام متحدہ تے امریکہ دے منہ تے بھارت ولوں طماچہ سی بھارت مظلوم کشمیریاں تے مظالم دے پہاڑ توڑ کے درندگی دی انتہا کر رہیا سی جہدے تے انسانیت دے علمبردار چپ سن پاکستان عمران خان دی قیادت وچ ایس مسئلے نوں عالمی سطح تے اجاگر کرن لگا ایس دوران عالمی میڈیا جہڑا ایہناں مظالم دی کوریج تے کر رہیا سی پر اوہ وی خاموش تماشائی بنیا ہویا سی وزیراعظم پاکستان عمران خان نے وزیر خارجہ شاہ محمود قریشی تے وزیر امور کشمیر علی امین گنڈا پور نوں مسئلہ کشمیر عالمی سطح تے اجاگر کرن لئی ٹاسک دتا تے آپ وی فرنٹ فٹ تے عالمی رہنماواں نال رابطہ کرن لگے وزیراعظم قوم نال خطاب کردیاں پوری قوم نوں کشمیر آور (Kashmir Hour) منان دا آکھیا پوری قوم اکٹھی ہووے تاں جے اقوام عالم نوں پتہ چل جاوے کہ پاکستان کشمیر دی حق خود ارادیت لئی کسے وی سطح تے جان نوں تیار اے قوم دا بچہ بچہ کشمیر کشمیر کر رہیا سی۔ اپوزیشن، حکومت، قوم تے سارے ادارے سب اک پیج تے سن تے سب دا اک زبان ہو کے اک ای نعرہ سی کہ کشمیر نوں حق خود ارادیت دیو وزیراعظم پاکستان جنرل اسمبلی وچ خطاب لئی اپڑے تے اقوام متحدہ وچ تقریر کردیاں ہوئیاں آکھیا کہ کشمیر ساڈی شہ رگ اے۔اقوام عالم مظلوم کشمیریاں نال کیتے ہوئے وعدے پورے کرے تے کشمیر نوں آزادی دوائے وزیراعظم پاکستان عمران خان نے امریکہ وچ سائیڈ لائن ملاقاتاں کیتیاں تے عالمی رہنماواں تے زور دتا کہ ایس دیرینہ ایشو نوں حل کروان وزیراعظم عمران خان نے امریکی صدر ڈونلڈ ٹرمپ نال وی ملاقات کیتی تے اوہناں نوں کشمیریاں تے بھارتی فوج دے مظالم دی پوری روداد سنائی اوہناں نے نریندر مودی نوں ہٹلر نال تشبیہ دیندیاں آکھیا جیویں ہٹلر نازی نے یہودیاں دا قتل عام کیتا سی ایسے طرح مودی وی اوہدے نقش قدم اُتے اے تے مظلوم کشمیریاں تے مظالم دے پہاڑ توڑ رہیا اے۔ امریکی صدر نے مسئلہ کشمیر تے پاکستان دے کردار دی تعریف کیتی تے مسئلہ کشمیر تے ثالثی دی پیشکش کیتی ایہ وزیراعظم پاکستان عمران خان دی کامیاب خارجہ پالیسی دا نتیجہ سی کہ اقوام عالم ہولی ہولی بھارتی مظالم تے آوازاں چُکن لگے امریکی کانگریس وچ مسئلہ کشمیر تے قرارداداں پیش کیتیاں جان لگیاں عالمی میڈیا جہڑا خاموش تماشائی بنیا ہویا سی اوہدے رپورٹرز بھیس بدل کے بھارت دے مظلوم کشمیریاں تے مظالم پوری دنیا نوں وکھان لگے تے بھارت دا مکروہ چہرہ ساری دنیا وچ بے نقاب کر دتا۔ وزیراعظم پاکستان دے مظلوم کشمیریاں دی آواز پوری دنیا دی آواز بن گئی امریکہ تے برطانیہ سنے دنیا بھر وچ بھارت دے خلاف مظاہرے ہون لگے عمران خان دی آواز دا اثر بھارت وچ وی محسوس کیتا گیا اے تے بھارتی قوم وی نریندر مودی تے بھارتی فوج دے مظلوم کشمیریاں تے مظالم دے خلاف سڑکاں تے آ گئی اے بھارت وچ مسلماناں دے حق وچ طلبہ، تاجر برادری، صحافی، انسانی حقوق دیاں تنظیماں سنے پورا بھارت اکٹھا ہو گیا اے۔پچھلے دیہاڑ وزیراعظم پاکستان عمران خان سوئٹزر لینڈ دے شہر ڈیووس اپڑے نیں جتھے اوہ ورلڈ اکنامک فورم وچ رلت کر رہے نیں اوتھے اوہناں دی امریکی صدر ڈونلڈ ٹرمپ نال دوجی ملاقات ہوئی اے جہدے وچ وزیراعظم پاکستان نے اک واری فیر امریکی صدر دی مسئلہ کشمیر تے توجہ کرائی تے اوہناں نوں مسئلہ کشمیر حل کران لئی آکھیا جہدے تے امریکی صدر ڈونلڈ ٹرمپ نے عمران خان نوں یقین دہانی کرائی کہ اوہ مسئلہ کشمیر حل کران لئی پرعزم نیں۔ اوہناں نے واشگاف لفظاں وچ آکھیا بھارت نال سانوں تشویش اے تے اسیں ایہدے تے ہن دباء ودھاواں گے ایس حوالے نال ڈونلڈ ٹرمپ نے دورہ پاکستان دی وی حامی بھری تے آکھیا میں اک واری فیر مسئلہ کشمیر تے ثالثی دی پیشکش کرنا آں، امریکی صدر نال ہون والی ملاقات دے بعد وزیراعظم نے دوجے عالمی رہنماواں نال وی ملاقاتاں کیتیاں تے کشمیر ایشو تے حمایت دی اپیل کیتی جہدے تے عالمی رہنماواں نے وزیراعظم پاکستان نوں یقین دہانی کرائی کہ اوہ مسئلہ کشمیر تے پاکستان دے موقف دی تائید کرنے آں تے اوہ پاکستان دے نال نیں۔ ایہ مسئلہ ورھیاں توں لمکیا ہویا سی پچھلی حکومتاں ایہدے تے سیاست کردیاں رہیاں تے کشمیر ایشو نوں دبا دتا گیا پر عمران خان دی قیادت وچ کشمیر ایشو نوں پوری دنیا وچ اجاگر کرکے عالمی ایشو بنا دتا گیا اے عمران خان نے واضح طور تے آکھیا اے میں مظلوم کشمیریاں دا سفیر آں تے کشمیر ساڈی شہ رگ اے ایس لئی اسیں ایہنوں کدی وی کلیاں نہیں چھڈاں گے تے ایہدی آزادی تک جدوجہد کردے رہواں گے تے آواز چکدے رہواں گے