پی ایس ایل وچ کارکردگی وکھان والیاں نوں ورلڈ کپ لئی زیر غور لیایا جا سکدا اے: ہیڈ کوچ

لہور: قومی ٹیم دے ہیڈ کوچ مصباح الحق نے بنگلہ دیش دے خلاف سیریز وچ کامیابی دا کریڈٹ بولراں نوں دیندیاں آکھیا دو سیریز ہارن دے بعد ایہ جت پاکستان کرکٹ لئی بہت ضروری سی۔

پاکستان تے بنگلہ دیش وچکار تیجا ٹی 20بارش دی وجہ توں منسوخ ہون دے بعد پریس کانفرنس وچ قومی ٹیم دے ہیڈ کوچ مصباح الحق آکھیا بنگلہ دیش دے خلاف سیریز وچ کامیابی نال اسیں سارے ریلیکس ہوئے تے اعتماد وچ وادھا ہویا، کسے وی کرکٹر تے ٹیم دے بوہے بند نہیں کیتے، پی ایس ایل ساڈے ساریاں لئی بہت اہم اے، ایہدے وچ پرفارم کرن والیاں نوں ورلڈ کپ لئی زیر غور لیایا جا سکدا اے۔

اجے ساڈے کول ویلا اے اسیں پی ایس ایل وچ سب دی پرفارمنس دا جائزہ لواں گے، پاور ہٹر دی کھوج وچ آصف علی نوں موقع دتا، ہور وی ویکھاں گے کہ کہڑا مُنڈا ٹیم لئی فائدہ مند ہو سکدا اے۔ہیڈ کوچ آکھیا شعیب ملک تے حفیظ نے جیویں ٹیم دی جت وچ اپنے تجربے نوں بروئے کار لیا کے اہم کردار ادا کیتا اوہ خوش آئند اے، سیریز وچ سب نے ای چنگا کھیڈ پیش کیتا، تیجے میچ وچ موسیٰ ، عثمان قادر، عماد بٹ تے خوش دل شاہ نوں کھڈان دا ارادہ سی پر بارش دی وجہ توں ایہناں نوجواناں نوں آزمان دا موقع نہیں مل سکیا۔