وزیراعظم عمران خان دی زیر صدارت وفاقی کابینہ دا اجلاس اج ہووے گا

اسلام آباد: وفاقی کابینہ دے اجلاس وچ 15نکاتی ایجنڈے تے غور کیتا جاوے گا۔ کابینہ آئی جی سندھ دی تقرری تے تبادلے بارے طریقہ کار تے وی غور کرے گی۔ وسیلیاں دے مطابق وفاقی کابینہ کنک دی درآمد بارے ای سی سی فیصلے دی توثیق کرے گی۔

صدر مملکت تے وزیراعظم دیاں تنخواہواں تے مراعات ایکٹ 1975ء وچ ترمیم تے وی غور کیتا جاوے گا۔ وفاقی کابینہ بھارت توں کیمیکل پیریکسائلین اک واری درآمد کرن دی منظوری دیوے گی۔

ممنوعہ تے غیر ممنوعہ بور اسلحہ لائسنس جاری کرن تے وائس چیئرمین اوگرا دی تقرری دا معاملہ وی ایجنڈے وچ شامل اے۔

کابینہ 50لکھ گھراں دی تعمیر بارے وزارت ہاؤسنگ دے ایم او یو دی منظوری دیوے گی۔ بالاں دے حقوق بارے قومی کمیشن دے قیام دا معاملے تے وی غور ہووے گا۔ وفاقی کابینہ نوں ادارہ جاتی اصلاحات بارے بریفنگ دتی جاوے گی۔ پی آئی اے بورڈ دے ڈائریکٹرز دی نامزدگی دا معاملہ وی ایجنڈے وچ شامل اے۔

کابینہ 8تے 20جنوری دے فیصلیاں تے کابینہ کمیٹی برائے توانائی اجلاس دے فیصلیاں دی توثیق وی کرے گی۔