شامیں آٹا لے کے آویں

saad ullah shah

لکھت: سعداللہ شاہ

کہندے نیں اک دانشور بادشاہ لئی تقریر لکھیا کردا سی اک دن بادشاہ دی تقریر وچ اک نکا جیہا جملہ لکھیا ہویا ویکھیا گیا کہ آٹا ندارد یعنی آٹا نہیں اے۔ بادشاہ وی اودوں سمجھدار ہویا کردے سن۔ بادشاہ نے پتہ چلوایا تے حقیقت کھلی کہ ایس دانشور نے بے خیالی وچ گھر دی صورتحال دو لفظاں وچ لکھ دتی۔ بادشاہ نے اوہدے گھر کنک بھجوائی تے انعام و اکرام۔ اودھر تے ساری عوام ای چیخ رہی اے کہ آٹا ندارد کوئی بندوبست کرن دی بجائے بادشاہ دے سارے رتن مسخریاں کر رہے نیں۔ آٹے توں محروم لوکاں دی آوازاں حکومتی مسخریاں دے شور وچ دب کے رہ گئیاں نیں۔ اک اُٹھدا اے تے کہندا اے لوک نومبر دسمبر وچ آٹا زیادہ کھاندے نیں ایس لئی آٹے دا بحران پیدا ہو گیا۔ بندہ پچھے نومبر دسمبر کیہ پہلی واری آیا۔ ایہ صاحب یعنی شیخ رشید صاحب تے کنک شاید کھاندے ای نہیں اوہناں نوں تے ویڈیو کلپس وچ بریانی وچوں لیگ پیس چن چن کے کھاندے ہوئے تے عمران خان نوں اوہناں نوں ویکھ کے شرماندیاں ہوئیاں ویکھیا گیا۔ کجھ دا کہنا اے کہ آٹا افغانستان لئی سمگل ہو رہیا اے تے ایس کم دا (ن) لیگ دے دور وچ آغاز ہویا ۔فیر بیان بدل کے آکھیا گیا کہ پی ٹی آئی نے ایہ سمگلنگ روک دتی اے جے روک دتی اے تے فیر اوہ آٹا کتھے اے۔ کجھ دا خیال اے کہ ایہ بحران مصنوعی اے۔ جے مصنوعی اے تے سرکار ذمہ وار اے تے تاجر ایہ کر رہے نیں تے سرکار دی رٹ کتھے اے؟ کہن والے تے کہندے نیں کہ عمران خان دے سہولت کار آٹا کھا گئے۔ غرضیکہ جنے منہ اونیاں گلاں عوام بٹ بٹ منظرنامہ ویکھ رہے نیں سرکار دے بلند بانگ دعوے تے بڑھکاں خان صاحب دی ناراضگی غصہ تے نوٹس اپنے دوست اعجاز یاد آ گئے:
مرے بالوںمیں چاندی آ گئی ہے
تری زلفوں کا سونا کیا کروں میں
سب توں ودھ مضحکہ خیز فیاض چوہان نیں کہ آٹے دا کوئی بحران ہے ای نہیں۔ گویا کہ لوک انج ای عادتاً رولا پا رہے نیں۔ زخماں تے نمک پاشی ہور کی ہوندی اے۔ غالب نے وی تے آکھیا سی نا:
یہ کہاں کی دوستی ہے کہ بنے ہے دوست ناصح
کوئی چارہ ساز ہوتا کوئی غمگسار ہوتا
انج اک حساب نال ویکھیا جاوے تے سرکار کامیاب جا رہی اے کہ آئے دیہاڑ کوئی نہ کوئی بحران پیدا کر دیندی اے لوک دوجے معاملات ای بُھل جاندے نیں۔ انج ای جیویں کن وچ پیڑ ہو رہی ہووے تے کن وچ دوائی پاندیاں گرم گرم چمچ کن تے لا دتا جاوے تے کن سڑ جاوے اندر دی پیڑ تے فوراً ختم ہو جاوے گی۔ بڑی الجھن نکی الجھن نوں آپ ای ختم کر دیندی اے فیر غالب یا آئے: دل ہوا کشمکش چارہ زحمت میں تمام مٹ گیا گھِسنے میں اس عقدے کا وا ہو جانا آسماں نے یہ بھی دیکھنا تھا کہ اب آٹا پائو کے حساب سے بکے گا۔ پہلاں تے سبزیاں کلو دی بجائے پاء دے حساب نال وکن لگیاں سن۔ ہن 20روپے پاء آٹا اے تے جے کجھ دن ایہو صورتحال رہی تے گل چھٹانک تک آوے گی۔ گل صرف آٹے تک محدود نہیں جہڑا بندہ وی روٹی کھاندا اے اوہنے اپنے کم تے کاروبار نال روٹی پیدا کرنی اے کل توں مستری نے 1300روپے توں دیہاڑی ودھا کے 1400روپے کر دتی اے جتھے وی تسیں حیرت دا اظہار کردے او جواب ملدا اے باؤ جی! تسیں کتھے رہندے او۔ آٹے دے ریٹ تے ویکھو گویا سارے نکے موٹے تاجراں تے محنت مزدوری کرن والیاں نے آٹے دے حساب نال اپنا منافع تے اجرت طے کر لئی اے۔ اوہ جو پہلاں صرف محاورہ سی کہ آٹے تیل دا ریٹ پتہ لگ جاوے گا ہن حقیقت لگن لگا اے۔ اوہی عارف پروہنا دا عوامی شعر:
آٹا مہنگا تیل وی مہنگا
ہن سجناں دا میل وی مہنگا
وفاق سندھ تے معترض اے کہ 34روپے کلو والا آٹا80روپے کلو وچ کیوں فروخت ہو رہیا اے مراد شاہ نے جواب وچ آکھیا اے کہ دو تن دن وچ بحران تے قابو پا لیا جاوے گا۔ ٹرانسپورٹرز دی ہڑتال دی وجہ توں ایہ صورتحال پیدا ہوئی۔ سوال پیدا ہوندا اے پنجاب وچ تے وسیم پلس صاحب نیں تے اوہ بہت غصے وچ وی نیں پر اوہناں نوں کوئی درخور اعتنا نہیں سمجھدا۔ گل انج اے کہ جے سچ مچ سرکار ایس بحران دی ذمہ دار نہیں تے فیر تاجرا ایہناں فلور ملز دا علان تے گورنر پنجاب نواب آف کالا باغ نے دریافت کر لیا سی۔ اوہناں نے فلور مل مالکان نوں گورنر ہاؤس کھانے تے بلایا تے عین کھانے دی میز تے اوہناں نوں آکھیا کہ پچھے ہٹ کے کن پھڑ لو۔ فیر آکھیا کہ چلو رعایت دتی جاندی اے کہ جے گل تک آٹا مارکیٹ وچ نہ آیا تے ایس حکم نوں عملی جامہ پوایا جاوے گا۔ ڈنڈا پیر اے بگڑیاں تگڑیاں دا۔ ایہ تے کوئی گل نہیں کہ تاجران تے بیورو کریسی نے پورے ملک نوں یرغمال بنا رکھی ااے انتظامی سطح تے کوئی محکمہ چاہوے اوہ صحت دا ہووے یاں تعلیم کہ اوتھے متعلقہ بندہ اپنے تجربہ نال کم چلاوے اوتھے وی بیورو کریٹ نوں فٹ کر دتا جاندا اے۔ معاشی سطح تے تاجر نہیں جین دیندے۔ ٹیکس لگدا اے تے تاجراں دا ٹیکس وی ایہدے وچ شامل ہو جاندا اے۔ نجائز منافع خوری عام اے۔ ملازماں دا استحصال کون نہیں کردا۔ تسیں بیکریاں تے یاں سٹوراں تے ویکھ لو بے چارے ملازم 8گھنٹے دی بجائے بارہ بارہ گھنٹے ڈیوٹی دیندے نیں۔ سہمے رہندے نیں کہ ذرا جیہا احتجاج وی اوہناں نوں بیروزگار کر سکدا اے۔ چیک کرن والی کوئی اتھارٹی اسیں تے نہیں ویکھی تے نہ سنی۔ آٹا نایاب ہویا تے یقینا پرانا دور یاد ایا کہ فقیر گھر گھر توں آٹا منگیا کردے سن۔ اوہدا جھولا آٹے نال بھر جاندا ای۔ آٹا عام سی۔ امریکہ نے میکسی پاک کنک سانوں گھلی تے آٹے دا اک نواں دور شروع ہویا ساڈے جھولے وچ میکسی پاک سی۔ تہانوں یاد ہووے گا کہ ایہ کنک اونٹاں تے لدی گئی سی تے اونٹاں دے گلے وچ تختیاں آویزاں سن جہناں تے لکھیا سیThank you America ہن زمانہ بدل گیا اے ڈالر آ گئے نیں اجے میں گوجرانوالہ دی اک شادی دی خبر ویکھ رہیا سی جہدے وچ بارات والیاں نے ڈالر لٹائے۔ ڈالر اک سمبل بن گیا اے۔ جہڑا وی ڈالر دی تھاں خریدوفروخت لئی نویں کرنسی لیاوے گااپنی بقا دا ضرور سوچے گا۔ چلو گل تے چلی سی آٹے دی تے فیر ساڈے یار بابا نجمی دی آٹے تے لکھی نظم دے اک دو بند ویکھ لو:
آٹا شامیں لے کے آویں
بھاویں لہو دے مل لیاویں
اج وی اکو سدھ اڑیا
آٹالے اسمانی چڑھیا
ساڈے ویہڑے کہڑا وڑیا
سول حکومت آمر ورگی
رات لمیری انبھی سرگی
جیویں پچھاں بولے سڑیا
آٹا لے اسمانی چڑھیا
ساڈے ویہڑے کیہڑا وڑیا

اپنا تبصرہ گھلو