چین دے ووہان شہر وچ 4پاکستانی طلباء وچ کرونا وائرس دی تصدیق: ڈاکٹر ظفر مرزا

اسلام آباد: ڈاکٹر ظفر مرزا آکھیا اے چین دے ووہان شہر وچ 4پاکستانی طلباء وچ کرونا وائرس دی تصدیق ہوئی، پاکستان وچ کرونا وائرس دا اک مریض وی کنفرم نہیں، سر پیڑ، بخار، کھانسی، ساہ دیاں تکلیفاں علامتاں نیں، 100وچوں 97مریض بچ جاندے نیں۔

معاون خصوصی صحت ڈاکٹر ظفر مرزا نے پریس کانفرنس کردیاں آکھیا کرونا وائرس وچ چھاتی دا انفیکشن نمونیا دی صورت اختیار کر لیندا اے، چین نے کرونا وائرس دی روک تھام لئی اقدامات کیتے نیں، ایہناں دے اقدامات نوں پوری دنیا وچ سراہیا جا رہیا اے، چین توں کوئی بندہ بیرون ملک جانا چاہوے تے اوہنوں 14دن انڈر آبزرویشن رکھیا جاندا اے، چینی شہر ووہان توں کوئی وی باہر نہیں جا سکدا۔ ڈاکٹر ظفر مرزا دا کہنا سی ڈبلیو ایچ او نے وکھو وکھ اجلاساں وچ کرونا وائرس بارے صورتحال دا جائزہ لیا، اوہناں نے کرونا وائرس بارے وکھو وکھ تدابیر جاری کیتیاں، جے کسے بندے تے کرونا وائرس دا شبہ اے تے اوہنوں انڈر آبزرویشن رکھیا جاوے۔