پرویزالٰہی دا سرپلس پنجاب مقروض کیوں ہویا؟

لکت: محمد اکرم چوہدری

کوئی سوال کرے کہ سرکار کیہ کر رہی اے تے سرکار ولوں جواب آوے گا کہ اسیں بہت کم کر رہے آں۔ ایناں کم کر رہے آں کہ ماضی وچ کسے نے نہیں کیتا۔ ممکن اے انج ہووے پر زمینی حالات وکھو وکھ وکھائی دیندے نیں۔ لہور ہائی کورٹ آکھیا کہ سرکار عدلیہ تے تنقید توں علاوہ کجھ نہیں کر رہی۔ صاف پانی نوں محفوظ کرن تے ماحولیاتی آلودگی نوں روکن لئی موثر اقدامات نہ کرن تے عدالت نے برہمی دا اظہار کیتا اے۔ عدالت ولوں اجہے ریمارکس دا آنا باعث تشویش اے۔ نامزد چیف جسٹس مامون رشید شیخ نے وی سموگ تے قابو پان لئی دائر درخواستاں تے سنوائی کردیاں آکھیا اے اداریاں نے کجھ نہیں کرنا تے لکھ دین۔ اوہناں نے سموگ تے قابو پان لئی عملی اقدامات نہ کرن تے برہمی دا اظہار کیتا اے۔وزیراں نوں اپنے محکمیاں تے توجہ دین دی لوڑ اے۔ درست اے کہ تحریک انصاف نوں حکومت چنگے ماحول وچ نہیں ملی۔ سابق وزیراعلیٰ پنجاب چودھری پرویز الٰہی کہندے نیں کہ دن رات محنت کرکے صوبے نوں سرپلس بنایا سی پر شہباز شریف دی نااہلی دی وجہ توں میرے دور دا سرپلس صوبہ دو ہزار ارب دا مقروض ہو گیا اے۔ اسیں پنجاب دی ترقی لئی بہت محنت دے بعد صوبے نوں سرپلس کیتا سی پر اج پنجاب مقروض اے۔ پرویز الٰہی فضائی آلودگی نوں بہتر بنان لئی موثر کردار ادا کر سکدے نیں۔ ایہ حقیقت اے کہ پنجاب سرپلس سی تے شہبازشریف دے دس ورھیاں وچ سرپلس صوبہ مقروض ہویا اے۔ اصل تحقیقات ایتھے ہونے چاہیدی کہ سرپلس صوبہ مقروض کیوں ہویا، کہڑا پراجیکٹ ضروری سی کہڑا غیر ضروری سی۔ کہڑے منصوبیاں تے پیسہ لا کے صوبے نوں مقروض کیتا گیا۔ کہڑے سیاستداناں نے پنجاب نوں دو ہزار ارب قرض وچ دبایا اے۔ ہن قرض دے نال نال دوجے مسئلیاں نے وی سانوں گھیر لیا اے۔ ماحولیاتی آلودگی دی گل کریئے، صاف پانی دی گل کریئے یاں فیر دوجیاں اہم ضروریات زندگی ول ویکھیا جاوے نظر آن والے تے غیر موثر منصوبیاں تے عوام دا ویلا تے سرمایہ برباد کرکے اج آپ انگلینڈ بیٹھے نیں تے کوئی نہیں جاندا کہ اوہ کدوں واپس آن گے پر ایہناں دے غلط فیصلیاں دی سزا ہن عوام بھگت رہی اے۔ دو ہزار ارب قرض دا بھار چکے صوبے لئی عوامی ضرورتاں نوں پورا کرنا سوکھا تے نہیں اے پر ایہدا ایہ مطلب ہرگز نہیں کہ ہر ویلے ایہو عذر پیش کیتا جاوے تے بہتری لئی دلجمعی تے تعمیری سوچ دے نال کم نہ کیتا جاوے۔ لہور ہائی کورٹ وچ سموگ تے قابو پان لئی کیس سنے جا رہے نیں جد کہ سپیکر قومی اسمبلی دے کول کورین کمپنی والے ایس حوالے نال اک منصوبہ لے کے آئے نیں۔ جہدے مطابق کسانوں نوں فصل کٹن دے بعد رہ جان والے مڈھ ساڑن دی لوڑ نہیں ہووے گی۔ ایہ کمپنی مڈھ نہ ساڑن تے کسانوں نوں نہ صرف معاوضہ دیوے گی ۔ ایس منصوبے دے مطابق کمپنی آپ مڈھ وڈھ کے گھریلو تے صنعتی استعمال لئی عوام دوست تے سستی گیس پیدا کرے گی۔پارلیمنٹ دی ذیلی پبلک اکاؤنٹس کمیٹی وچ آڈٹ حکام نے انکشاف کیتا اے 40روپے دی دوائی دو سو توں دو ہزار روپے تک دی ویچی جا رہی اے۔ ایہناں حالات وچ جے عوام وچ جان تے ایہناں دے ساہمنے ایہ سوال رکھن تے جواب وکھرا ای آوے گا۔ عوام خوش نہیں اے۔ ایہناں لئی مسئلے ودھے نیں۔ زندگی مشکل ہوئی اے۔ مہنگائی ودھن نال ہر گھر دا کچن متاثر ہویا اے۔ اشیاء خوردونوش دی قیمتاں وچ وادھے نال سرکار لئی عوامی سطح تے مسئلے ودھے نیں۔ منتخب نمائندیاں دے کول مہنگائی دے حوالے نال کوئی جواب نہیں اے۔ ماسوائے کہ سب کجھ ماضی دی حکومتاں تے پا دتا اے ۔ایہ جواب کسے حد تک حقیقت دے قریب وی اے پر مصنوعی مہنگائی دا ہونا متعلقہ وزیراں تے اداریاں دی عدم توجہ تے مسئلیاں نوں نہ سمجھن دی وجہ اے۔ اشیاء خوردونوش دی قیمتاں نوں قابو وچ رکھن لئی قابل قبول طریقہ کار وضع کرکے عوام لئی آسانی پیدا کیتی جا سکدی اے پر بدقسمتی نال ایس اہم ترین شعبے نوں نظر انداز کیتا گیا اے۔ نتیجتاً عوام دی جیب تے بھار ودھیا اے۔ وزیراں لئی لازم اے کہ اوہ وزارتاں نوں وقت دین مسئلیاں تے گل کرن توں پہلاں ایہناں نوں سمجھن دی کوشش کرن بہت سارے مسئلے اجہے نیں جہناں نوں حل کرن لئی فنڈز دے بجائے سمجھ بوجھ دی لوڑ اے۔ بہتر تال میل تے بیورو کریسی نوںکم وچ آزادی دے کے کئی مسئلیاں حل کیتے جا سکدے نیں۔ عوام نوں پاکستان تحریک انصاف توں بہت توقعات نیں۔ لوکاں نے عمران خان نوں ووٹ دتا اے۔ عوام نے بیٹ نوں تبدیلی لئی ووٹ دتا اے سیاسی مافیا نوں شکست دین دے بعد عوام دی زندگی آسان ہونی چاہیدی اے تے ایس آسانی لئی دن رات محنت وزیراں دی بنیادی ذمہ داری اے۔ لہور دی سڑکاں تے ای گندگی دے ڈھیر لگ جان گے تے دوجے شہراں دا کیہ حال ہووے گا۔ پنجاب سب توں وڈا صوبہ اے ایتھوں دے وزیراں دے کول آرام دا کوئی وقت نہیں ہونا چاہیدا۔ پنجاب حکومت دے وزرا حقیقی معنیاں وچ پی ٹی آئی دا چہرہ نیں ایہ لوک توقعات تے پورا نہیں اتردے تے معمول دے مطابق کم کردے رہے غیر معمولی کوششاں نہ کیتیاں تے عمران خان دے فلاحی ریاست دے خواب نوں تعبیر ملنا مشکل اے۔