شیخ رشید عدالت عظمیٰ دے ریڈارتے

shahid nadeem

لکھت:شاہد ندیم احمد

ایس ویلے پوری دنیا، بالخصوص غیر ترقی یافتہ تے ترقی پذیر ملکاں وچ سفر لئی سب توں سستا ذریعہ ٹرین سروس نوں ای سمجھیا جاندا اے تے ایہو وجہ اے کہ دنیا بھر وچ ایہدے تے بھرپور توجہ دتی جاندی اے، پر پاکستان وچ ریلوے نوں وکھو وکھ حکومتاں دی غفلت تے ریلوے دے اعلیٰ افسراں دی نااہلی تے بدعنوانی نے تباہ کرکے رکھ دتا اے۔ ریلوے وچ موجود کرپٹ عناصر فنی طریقے نال منافع بخش ٹریناں نوں خسارے وچ پاندے نیں، ایہدے بعد اوہناں نوں بند کر دتا جاندا اے۔ ٹریناں نوں خسارے وچ پان لئی پہلاں ایہناں دی حالت خراب کیتی جاندی اے، فیر ایہناں دی بوگیاں گھٹ کرکے کرایاں وچ وادھا کر دتا جاندا اے۔ ایہدی وجہ توں مسافراں دی تعداد وچ کمی ہون دی وجہ توں خسارہ یقینی اے ۔ دراصل ریلوے وچ موجود بعض عناصر ادارے نوں تباہ کرکے ٹرانسپورٹ مافیا نوں فائدہ اپڑانا چاہندے نیں کیوں جے ہزاراں مسافراں نے سفر لئی انٹرسٹی ٹرانسپورٹرز نال رابطہ کرنا شروع کر دتا اے جہدا فائدہ چکدیاں ہوئیاں ٹرانسپورٹرز نے کرایاں وچ کئی گنا وادھا کردتا اے۔ایس حقیقت توں انکار نہیں کہ ٹرین دا سفر ساڈے ایتھے مقبول تے سستا ترین ذریعہ اے، پر ایس ویلے ریلوے دا پہلے ورگا فعال نظام نہیں رہیا۔ تقسیم ہند دے ویلے (پاکستان ویسٹرن ریلوے نوں) مجموعی طور تے مین تے برانچ لائناں دا جہڑا وسیع جال وچھیا ہویا ملیا، حالات دی ستم ظریفی کہو کہ 72ورھیاں دے دوران ہور پھیلن دے بجائے سکڑدا چلا گیا تے اج پشاور توں کراچی تے کوئٹہ توں کراچی مین لائن دے سوا برانچ لائناں دے بہت گھٹ سیکشن اپنی اصل حالت وچ موجود ہون گے، بعض تھاواں تے لوک ریل دی پٹڑیاں تک اکھاڑ کے لے گئے نیں۔ ایس 22کروڑ آبادی دے ملک وچ حکمراناں دی نااہلی دی وجہ توں عوام ریل جہے گھٹ خرچ سہولت توں محروم ہو رہے نیں۔ چیف جسٹس سپریم کور ٹ نے ریلوے خسارہ کیس دی سماعت دے دوران پاکستان ریلوے دی آڈٹ رپورٹ تے برہمی دا اظہار کردیاں ریمارکس دتے کہ ریلوے کرپٹ ترین ادارہ اے، پورا محکمہ سیاست دا شکار اے، مسافر تے مال گڈیاں چل رہیاں نیں نہ ریلوے سٹیشن ٹھیک نیں، ریل دا ہر مسافر خطرے وچ سفر کر رہیا اے۔ ایس موقع تے وفاقی وزیر ریلوے شیخ رشید محکمہ دی ناقص کارکردگی دے حوالے نال کوئی تسلی بخش جواب نہ دے سکے، سگوں پچھلی حکومت نوں ریلوے دی ناقص کارکردگی دا ذمہ دار ٹھہراندے رہے، حالاں جے وزیر ریلوے شیخ رشید دا شمار عمران خان دے انتہائی قریبی بندیاں وچ ہوندا اے، اوہناں نے ریلوے دی وزارت اپنی خواہش تے لئی سی۔ عدالت عظمیٰ نے جہڑے ریمارکس ریلوے دی ناقص کارکردگی بارے دتے نیں، اوہناں دی روشنی وچ تحریک انصاف دی پوری کابینہ دی کارکردگی نوں جانچیا جا سکدا اے۔ایہ امر سرکار لئی باعث شرم اے کہ عدالت عظمیٰ وچ ریلوے دی جہڑے حالت زار بیان کیتی گئی، اوہ کسے اک ادارے دی کہانی نہیں، سگوں پورے دیس دا نقشہ اے، ہر تھاں اک افراتفری دی صورتحال اے۔ تحریک انصاف نے کرپشن دے خلاف نعرہ لاندیاں ہوئیاں اقتدار حاصل کیتا سی، پر سرکار دے تقریباً ڈیڑھ سالہ دور اقتدار وچ ناقص کارکردگی دے سارے ریکارڈ ٹُٹدے جا رہے نیں۔ تحریک انصاف نوں چاہیدا سی کہ اقتدار وچ آندیاں ای کرپٹ نظام نوں ٹھیک کرن دی کوشش کردی، تاں جے کرپشن دی کوئی گنجائش باقی نہ رہندی، پر سرکار دی جہڑی کارکردگی ساہمنے آئی اے اینی بھیڑی تے دوران جنگ وی کسے سرکار دی نہیں ہوندی، پشاور دا بی آر ٹی منصوبہ تحریک انصاف دی ناقص کارکردگی دا منہ بولدا ثبوت اے۔ جے سرکار نے ڈیڑھ سال گزارن دے بعد وی ریلوے وچ کوئی منصوبہ شروع نہیں کیتا تے ایہدا ذمہ دار کون اے؟ ریلوے وزیر توں لے کے منصوبہ بندی تک سب دے سب حکومتی کابینہ دے اراکین نیں، ہن پچھلی حکومتاں تے الزام تراشی کرکے ویلا گزار یا نہیں جا سکدا۔ عمران خان وزیراں دی کارکردگی دے حوالے نال مصلحتاں دا شکار رہے نیں، اوہ اوہناں ولوں تعریفاں دے کجھ بول سن کے چپ ہو جاندے نیں، حالاں جے اوہناں نوں شیخ رشید جہے وزیراں نال باز پرس کرنی چاہیدی اے کہ اوہناں نے ریلوے دی بہتری لئی کیہ کجھ کیتا اے۔ جے سپریم کورٹ وچ ریلوے نوں بند کرن دیاں گلاں ہو رہیاں نیں تے ایہ گل شیخ رشید لئی نہیں وزیراعظم عمران خان لئی ندامت دی وجہ اے۔ شیخ رشید سنے سب وزیراں نوں سمجھ لینا چاہیدا اے کہ پچھلی حکومتاں تے الزام لا کے عوام نوں بے وقوف بنان دا زمانہ لنگھ گیا اے۔ عوام نوں ہور دلاسیاں دے لالی پاپ نال نہیں بہلایا جا سکدا، حکومتی ٹیم نوں کارکردگی وکھانی ہووے گی، دوجی صورت وچ عوام وی سرکار نوں ایسے طرح شیشہ وکھاوے گی جیویں خسارہ کیس دی سماعت دے دوران عدالت عظمیٰ نے شیخ رشید نوں شیشہ وکھایا اے۔بدقسمتی نال بے شرمی حکمراناں دا وطیرہ بن گی ااے، اپوزیشن توں لے کے میڈیا تک سرکار نوں ناقص کارکردگی دا شیشہ وکھان وچ مصروف عمل نیں، پر سرکار بڑی ڈھٹائی نال منن نوں تیار نہیں اے۔ عوام وی آئے دیہاڑے سرکار دی ناقص کارکردگی تے بولدے نیں، پر عمران خان زبان خلق نوں نقارہ خدا سمجھن دے بجائے ایہنوں رقیباں دی سازش سمجھدے نیں۔ وزیراعظم حکومت مخالف مافیاز دی گل کردے نیں جد کہ سارے مافیاز دا سدباب کرنا سرکار ای دی ذمہ داری اے۔ حکومت نوں ایہ گل سمجھنی چاہیدی اے کہ عوام نے زرداری تے شریف خاندان دی سیاست توں تنگ آ کے تحریک انصاف نوں اقتدار دتا سی، پر ڈیڑھ سالہ ناقص کارکردگی ثابت کر رہی اے کہ اوہ زرداری تے شریف خاندان توں وی بدتر انتخاب ثابت ہوئے نیں۔ جے تحریک انصاف اپنی پنج سالہ مدت پوری کرنا چاہندے نیں تے نہیں چاہندے کہ کوئی مخالف عوامی احتجاجی تحریک منظم ہووے تے اوہناں نوں اپنی ٹیم وچ تبدیلی لیانی ہووے گی، انتظامی کارکردگی نوں بہتر بنانا ہووے گا، ہن ذاتی انا تے ذاتی تعلقات تے دتی جان والی تھپکیاں کارگر ثابت نہیں ہون گیاں، ایس لئی وزیراعظم میرٹ دی زبانی کلامی دوہائی پان دی بجائے باصلاحت وزیراں دا تقرر کرنا ویلے دی اہم لوڑ اے، شیخ رشید، عمران خان ولوں تے بے فکر ہو کے زبانی جمع خرچ نال وزارت ریلوے چلا رہے سن، پر ہن سپریم کورٹ دے ریڈار دی زد وچ آ کے اوہناں نوں کجھ نہ کجھ کر کے وکھانا پوے گا۔ ریلوے دے کجھ ملازماں دی سبکدوشیاں تے کاغذی منصوبے ریلوے دی بدحالی نوں خوشحالی وچ بدل نہیں سکدے، اداریاں نوں فعال بنان لئی بلاامتیاز باصلاحیت لوکاں نوں تقرر کرنا ہووے گا، جے عمران خان نے شیخ رشید تے جہانگیر ترین جہے بندیاں نوں حکومتی ذمہ داریاں توں سبکدوش کرکے بنی گالہ تک ای محدود نہ کیتا تے ایہ اپنے نال نال سرکار دے حق وچ وی چنگا نہیں ہووے گا

اپنا تبصرہ گھلو