کشمیر تے جنگ ہو سکدی اے

لکھت: عتیق انور راجا

حقیقت تے ایہ اے کہ ایس ویلے دنیا بھر توں آواز اُچی ہو رہی اے کہ بھارت سرکار دیس وچ رہن والے مسلماناں، عیسائیاں تے دوجے مذہباں دے لوکاں نوں اپنی دھرتی تے برداشت کرن نوں تیار نہیں اے۔ انتہا پسند ہندو کھلے عام مسلماناں نوں کدی پاکستان تے کدی سعودی عرب ول چلے جان دا کہندے نیں۔ بھارتی فلم انڈسٹری دے نامور ادکار نصیر الدین شاہ نوں برملا ایہ کہنا پے گیا کہ 70ورھے بھارت وچ رہن دے بعد اج اوہناں نوں ایہ احساس ہویا اے کہ بھارت مسلماناں دے رہن لئی محفوظ نہیں اے۔ ہندو شدت پسنداں دی سوچ نوں ویکھ کے حکیم الامت ڈاکٹر علامہ اقبال نے اک وکھری مسلم ریاست دانقشہ پیش کیتا سی تے ایسے مسلم ریاست دی تکمیل لئی قائداعظم محمد علی جناح نے قوم نوں متحد کیتا تے اک وکھرے وطن دی تشکیل ممکن ہوئی۔ اک عرصے تک ات گردی دا شکار رہن والے پاکستان دا امیج صلح جو، امن پسند دیس دے طور تے ساہمنے آرہیا اے تے بھارت متشدد سوچ دا حامل بن چکیا اے۔ اک برطانوی جریدے دی اکانومسٹ نے عدم برداشت والا بھارت دی ہیڈ لائن دے نال دسیا اے کہ بھارتی وزیراعظم نریندر مودی دی مسلم مخالف پالیسیاں نے دنیا دی وڈی جمہوریت نوں خطرے نال دوچار کر دتا اے۔ ایہ پالیسیاں وڈی خونریزی دی وجہ بن سکدیاں نیں۔ جریدے نے افسوس دے نال لکھیا کہ بی جے پی دا انتخابی امرت بھارتی سیاست لئی زہر قاتل بن چکیا اے۔ بھارتی وزیراعظم ہندوستان نوں صرف ہندو ریاست بنان لئی عمل پیرا نیں۔ بی جے پی دی متنازعہ پالیسیاں دی وجہ توں پورے بھارت وچ مظاہرے جاری نیں۔ طلباء، سیکولرز ہیٹھلی ذات دے ہندو، سکھ، عیسائی ایتھوں تک کہ مودی دے محبوب بھارتی میڈیا نے وی نریندر مودی دے خلاف بولنا شروع کر دتا اے۔ اودھر وزیراعظم عمران خان دی قیادت وچ پاکستان دا بیرونی دنیا وچ امیج تبدیل ہو رہیا اے، برطانی ہائی کمشنر ڈاکٹر کرسچن ٹرنر نے اک بیان وچ آکھیا میں پاکستان دی سیاحت دی صلاحیت تے خوبصورتی نوں ویکھ کے حیران رہ گیا۔ امن وامان دی صورتحال دا باریک نال جائزہ لین دے بعد اوہناں نے پاکستان تک سفر دی پابندیاں نرم کرن دا فیصلہ کیتا اے تے ایہ پرامن، روشن تے محفوظ پاکستان دی علامت اے۔ برطانوی ٹریول ایڈوائزری وچ تبدیلی نال پاکستان بارے مغربی دنیا دا نقطہ نظر وی بدلے گا تے آن والے دناںدیس وچ سیاحت تے سرمایہ کاری دی راہ پکی ہوندی چلی جاوے گی جہدے نال پاکستان نوں درپیش معاشی مسئلے، روزگار دی فراہمی، کرنٹ اکاؤنٹ خسارے دے حل وچ مدد ملے گی۔ امریکہ نے وی اک مدت بعد پی آئی اے لئی ڈائریکٹ پروازاں دی اجازت دے دتی اے۔ دوجے پاسے بھارت وچ حالات کنٹرول توں باہر ہوندے چلے جا رہے نیں۔ بھارتی سرکار دا ہر ہتھکنڈا اوہناں لئی ہور رسوائیاں دی داستان لکھ رہیا اے۔ ایس لئی وزیراعظم پاکستان عمران خان نے ڈیووس وچ اک بیان وچ دنیا نوں سمجھان دی کوشش کیتی اے کہ کشمیر دے مسئلے تے پاک بھارت جنگ ہون دے بہت سارے امکانات موجود نیں۔ بھارت سرکار ہر طرح دے تشدد دے بعد وی کشمیریاں نوں اپنا ہمنوا نہیں بنا رہی۔ کشمیری ہر صورت بھارت توں آزادی چاہندے نیں۔ پچھلے کجھ عرصے وچ ساڈے عرب حکمراناں دی ہمدردیاں بھارت دے نال لوڑ توں کجھ ودھ ای نظر آ رہیاں سن ایس لئی نریندر موذی نے سوچیا کہ ایہ ویلا بہت مناسب اے کہ قنون سازی کرکے کشمیر نوں بھارت دا حصہ بنالیا جاوے۔ ہٹلر دے جانشین نے اپنی پارلیمنٹ توں قنون پاس کروان توں پہلاں ای کشمیر وچ ہور فوج ہور اختیارات دے نال گھل دتی تے اپنی قوم تے دنیا نوں دسیا کہ کشمیری اوہناں دے نال رہنا چاہندے نیں صرف کجھ نوجوان نیں جہڑے آزادی لئی پتھر بازی کردے نیں۔ بھارتی ماہرین دس رہے نیں بھارتی معیشت دا بیڑا غرق ہو چکیا اے جو عرب بھارت وچ ارباں ڈالر لانا چاہندے سن اوہ بھارت دے اندر ہون والے مظاہریاں توں پریشان نیں تے سرمایہ کاری کرن توں ہچکچا رہے نیں۔ انج تے بہت ساری بھارتی ریاستاں آزادی لئی کوششاں کر رہیاں نیں تے بھارت سرکار طاقت دے زور تے اوہناں دی آواز دبا رہی اے۔ سکھاں دے مقدس مقام گولڈن ٹیمپل تے جیویں بھارتی فوج حملہ آور ہوئی تے دلی دیاں سڑکاں تے جہڑی سفاکی نال سکھ قوم دے لوکاں نوں ماریا گیا اوہناں دے گھراں نوں ساڑیا گیا اوہنوں کوئی کیوں بُھل سکدا اے۔ چنگا!ویکھنے آں کہ بھارت دے کول ہن کیہ آپشن بچدا اے۔ کیہ بھارت کشمیر دا مسئلہ کشمیری قوم دیاں امنگاں دے مطابق حل کرن دی گل منے گا۔ اجیہا گمان وی نہیں کیتا جاسکدا۔ اندرونی طور تے انتشار دا شکار بھارت پاکستان دے سر جنگ تھوپن توں باز نہیں آوے گا۔ ایہو گل میرے وزیر اعظم نوں پریشان کر رہی اے۔