جنونی بھارت وچ انصاف دی موت

Hameed Ullah Bhatti

لکھت: حمیداللہ بھٹی

پچھلے ورھے مئی وچ بی جے پی انتخاب جت کے دوبارہ حکومت وچ آئی تے کجھ مبصرین دا خیال سی کہ مودی ہن ہندو قوم پرستی دے بیج بون دی بجائے شاید کجھ کارکردگی ول توجہ مبذول کرن پر اجیہا خیال کردیاں اوہ بھل گئے کہ انتخابی اکھاڑے وچ اتردیاں ہوئیاں بھاجپا نے منشور وچ اجہے ای نکات شامل کیتے جہناں نال ہندو اکثریت خوش ہووے تے وڈی اقلیت مسلماناں نوں ٹکٹ دین توں وی اجتناب کیتا حالاں جے محتاط اندازے دے مطابق مسلم آبادی 25کروڑ توں تجاوز کر گئی اے آسام، اتر پردیش، کیرالہ دا مسلم ووٹر نتائج تے اثر انداز ہون دی قوت رکھدا اے فیر وی بے اعتنائی ایس امر دی دلیل اے کہ بی جے پی ہندوستان دی معاشرتی تقسیم تے سیاست کر رہی اے جنونی بھارت وچ مسلمان بدترین ناانصافی دا شکار نیں انتخاب وچ جموں و کشمیر دی خصوصی حیثیت دے خاتمے دا وعدہ کیتا گیا تاں جے مسلم اکثریتی ریاست وچ دوجے مذہباں نوں آباد کیتا جا سکے ایہ طریقہ کار فلسطین وچ یہودی بستیاں وسان نال مماثلت رکھدا اے دوجی واری مینڈیٹ ملن توں مودی نے ایہ مطلب لیا کہ جت ہندو اکثریت نوں خوش رکھن تے مسلم مخالف پالیسیاں بنان وچ ای پنہاں اے ایسے سوچ دی وجہ توں تن طلاق دا متنازعہ فیصلہ کیتا گیا ایس فیصلے دی مخالفت وچ مسلماناں دی آواز کمزور سی جہدے نال مودی سرکار ہور شیر ہو گئی تے جموں کشمیر دی خصوصی حیثیت بارے آئین دی شق 370دا خاتمہ کر دتا ایہ اجیہا فیصلہ سی جہدے نال کشمیر وچ بغاوت دی فضا بن گئی جہنوں دبان لئی مسلسل کرفیو لا رکھیا اے کشمیر دے حالات توں دنیا نوں بے خبر رکھن لئی ذرائع مواصلات تے پابندیاں لا رکھیاں نیں پر کشمیریاں وچ غم و غصے دے باوجود بھارت وچ وڈے پیمانے تے ہلچل ویکھن وچ نہ آئی سگوں جنونی ہندوواں نے شادیانے وجائے اک احمق وزیر نے خصوصی حیثیت دے خاتمے نوں کشمیری عورتاں نال شادیاں رچان دے مواقع ملن نال تعبیر کیتا جدید دور وچ اجہی طفلانہ حرکتاں کدھرے ویکھن نوں نہیں ملدیاں پر جنون دے زیر اثر بھارت وچ وزیراں دے منہ توں اجہی بدکلامیاں عام نیں موثر مخالف آواز نہ چُکن تے مودی، امیت شاہ تے اوہناں دے مشیر خاص اجیت دوول نوں ایہ حوصلہ ہویا کہ بھارت توں مسلم شناخت ختم کرن لئی ٹھوس طریقہ کار بنایا جاوے سوچ بچار دے بعد شہریت بارے نواں قنون بنایا گیا ایہ قنون بننا سی کہ ورھیاں توں دبے ہوئے مسلماناں دا خوف جیویں یکلخت ختم ہو گیا اوہ بے خوف ہو کے سڑکاں تے آگئے شہریت قنون دی مخالفت وچ اُٹھن والی لہر نے پورے ملک نوں لپیٹ وچ لے لیا اے۔ یونیورسٹیاں توں لے کے شہراں، پنڈاں تے بازاراں وچ مظاہرے ہو رہے نیں۔ دارالحکومت دہلی دے شاہین باغ وچ عورتاں تے بچے احتجاج وچ شریک نیں جہنوں ختم کرن دی ہر ممکن کوشش کر لئی گئی اے پر احتجاجی تحریک دا زور ختم نہیں ہو رہیا سگوں دہلی دے نواح علاقے توں اٹھن والی تحریک مسلسل زور پھڑ رہی اے حکومت دا ہر حربہ غیر موثر ثابت ہو رہیا اے۔مسلمان ورھیاں توں بھارتی معاشرے وچ دب کے زندہ رہ رہے نیں ستم ظریفی تے ایہ اے کہ عدالتاں وچ وی جنون دی لہر وڑ آئی اے تے انصاف دی دھجیاں اڑائیاں جا رہیاں نیں، عدالتاں وچ فیصلے کردیاں ہوئیاں مذہب نوں مدنظر رکھیا جاندا اے 2002وچ گجرات وچ وڈے پیمانے تے مسلم کش فسادات ہوئے جہناں وچ ہزاراں انساناں نوں مسلمان ہون دی وجہ توں قتل کر دتا گیا جہناں وچوں کجھ اک تے قنونی کاروائی ہوئی تے کجھ جنونیاں نوں سزا ہوئی ایناں انصاف وی سپریم کورٹ نوں چنگا نہیں لگیا تے اوہنے 33مسلماناں نوں زندہ ساڑن والے 17انتہا پسند رہا کر دتے نیں حالاں جے اوہناں تے الزام ثابت ہو چکیا کہ اوہناں نے 22عورتاں سنے 33مسلماناں نوں پہلاں اذیتاں دتیاں تے فیر زندہ ساڑ کے ہلاک کر دتا۔ سپریم کورٹ دی رحمدلی جنونیاں دی رہائی تک محدود نہیں رہی سگوں فیصلے وچ رہائی پان والیاں نوں دو حصیاں وچ تقسیم کیتا اک گروپ نوں مدھیہ پردیش دے شہر اندور جد ک دوجے نوں جبال پورہ گھلدے ہوئے دوواں شہراں دی انتظامیہ نوں حکم دتا اے کہ رہائی پان والے مجرماں نوں سماجی تے عوامی خدمات دے اداریاں وچ رکھیا جاوے تے اوہناں دے روزگار دا وی بندوبست کیتا جاوے اجہی سہولتاں کارنامہ سرانجام پان والیاں نوں دتی جاندیاں نیں لگدا اے عدالت نے 33مسلماناں نوں ساڑنا کارنامہ تصور کیتا اے جدوں مذہب دی بنیاد تے فیصلے ہون لگن اودوں بندیاں دے نال انصاف دی وی موت ہوندی اے تے بھارت دے طول و عرض وچ انج عام ہو رہیا اے پر دنیا چپ اے جہڑے مہذب ہون دے دعویدار نیں اوہناں نوں وی چپ جہی لگ گئی اے جدوں بھارت دی گل ہوندی اے تے انسانی حقوق دی خلاف ورزیاں تے رپورٹاں جاری کرن والے ہونٹ سی لیندے نیں۔ جمہوری ملکاں وچ اختلاف رائے دا احترام کیتا جاندا اے تے جہنوں کوئی فیصلہ یا گل چنگی نہ لگے اوہ مظاہرہ وی کر سکدے نیں پر بھارت وچ مظاہریاں دی اجازت صرف اکثریت نوں اے مسلماناں تے جناں وی ظلم ہووے اوہناںنوں بولن دی آزادی نہیں شہریت ترمیمی قنون دے خلاف مسلمان سڑکاں تے نکلدے نیں تے پلس تشدد کرن لگدی اے تے ایہ تشدد مظاہرے تک محدود نہیں رہندا پلس مسلماناں دے گھراں تے دھاوا بول دیندی اے تے کدھرے وی کوئی نقصان ہووے تلافی لئی مسلماناں نوں جرمانے کیتے جاندے نیں۔ دلت، سکھ، عیسائی تے بدھ مت تے وی ظلم ہوندا اے پر اوہناں دی بھارت وچ تعداد محدود اے ایسے پاروں گھٹ نفرت کیتی جاندی اے کجھ جنونیاں نے بھارتیاں دے ذہناں وچ بٹھا دتا اے کہ کجھ دہائیاں تک انڈیا وچ مسلماناں دی اکثریت ہو جاوے گی تے ہندو اقلیت وچ بدل جان گے مودی دے فیصلیاں توں لگدا اے اوہ وی اقلیت ہون دے خوف دا شکار نیں تے بھارت نوں ہندوواں دا ملک رکھن لئی ہتھ پیر مار رہے نیں۔شہریت ترمیمی قنون دے خلاف بھارت وچ ہر تھاں مظاہرے ہو رہے نیں کیوں جے جہڑے لوک سی اے اے دے تحت شہریت حاصل کرن گے اوہناں نوں اپنے مذہبی عقیدیاں دے شواہد وی دینے ہون گے حالاں جے بھارتی آئین دے تحت مذہبی عقیدیاں دی بنیاد تے قنون سازی ممنوع اے پر مودی سرکار مذہب دی بنیاد تے ای پالیسیاں بنان تے قنون سازی وچ مصروف اے۔ یونیورسٹیاں دے پڑھے لکھے لوک وی محسوس کرن لگے نیں کہ بھارتی معاشرے وچ مذہبی تفریق پروان چڑھدی رہی تے ملک دے امن و سکول نوں ناقابل تلافی نقصان ہو سکدا اے پر جنونی حکومت نوں رتی برابر پرواہ نہیں اوہ تعلیمی اداریاں وچ اپنے زیلی ونگاں توں دنگا فساد کراندی اے جدوں کدھرے اجیہا واقعہ ہو رہیا ہوندا اے تے پلس خاموش تماشائی بن جاندی اے تے کسے حملہ آور نوں پھڑن وچ دلچسپی نہیں لیندی جہدا مطلب اے کہ پلس حملہ آوراں دی حفاظت کردی اے تے انج ہدایت پاروں ای ممکن اے نہیں تاں امن نوں نقصان اپڑان دی اجازت کیوں دیندا اے؟جنونی سب توں پہلاں انصاف دا خون کردے نیں تے بھارت وچ روز انصاف دی موت ہوندی اے پر کسے نوں پرواہ نہیں آبادی دے تناسب نال کئی گنا زیادہ مسلمان جیلاں وچ بند نیں پر کسے جج نوں رحم نہیں آندا ہندو کسے مسلمان نوں قتل کرے، زندہ ساڑے، املاک نذرآتش کرے جیویں مقدمہ جج دے ساہمنے رکھیا جاوے گا جج نوں ہندو تے رحم آ جاندا اے پر مسلماناں دا ناں آوے تے جج بے رحم بن جاندے نیں ہندو تے گائے دا گوشت رکھن دا جھوٹا الزام لا کے تشد دکردے نیں پر اج تک کسے مظلوم خاندان نوں انصاف نہیں ملیا جنون دی لہر نے پورے بھارت نوں لپیٹ وچ لے لیا اے تے ایہ جنون انصاف نوں مارن دے بعد ہور کیہ گُل کھلائے گا؟ سمجھنا مشکل نہیں ایہ جنون انصاف دے بعد خطے دے امن نوں وی نقصان اپڑا سکدا اے جہدے تے دنیا نوں نظر رکھن دی لوڑ اے بھارتی وزیر دفاع راجناتھ نے کیرالہ وچ شہریت دے متنازعہ قنون دے حق وچ نکلن والی ریلی نال خطاب کردیاں دھمکی دتی اے کہ بھارت تے حملہ ہویا تے مراکش توں ملائیشیا تک کسے نوں امن نال نہیں رہن دیواں گے سوال ایہ اے کہ جنونی بھارت وچ انصاف دی موت تے دنیا چپ اے کیہ دنیا دا امن درہم برہم کرن تے وی چپ ای رہوے گی؟

اپنا تبصرہ گھلو