چینی بحران

empty profile

لکھت: فاروق ندیم

عوام نوں ایس نال کوئی غرض نہیں کہ حکومت نوں اپوزیشن توں بوہتا خطرہ اے یا اپنے اتحادیاں کولوں؟ اوہ تے ایس چیز اُتے پریشان اے تندور یا ہوٹل توں 50گرام دا جو پُھلکا لبھدا اے، اوہنوں روٹی ای کہندے نیں؟ کدی مارکیٹ چوں جان بچان والیاں دوائیاں غائب، کدی آٹا غائب، کدی چینی مہنگی، کدی بجلی تے گیس دے بل سون نہیں دیندے، کدی پٹرول بمب تے کدی بجلی بمب، کدی آٹا بمب تے کدی چینی بمب، ایہ کیہ چکر اے بلکہ گھن چکر اے ، حالانکہ گل سدھی جہناں نے الیکشناں وچ سیاسی جوئے تے داء لایا سی اوہ ہن جتن توں بعد اپنا ریٹرن چاہندے نیں۔ اوہ وی کئی گنا سود مرکب نال کیوں جے ڈربی دی ریس وچ جتن دی امید لے کے گھوڑے تے بازی لگدی اے جتن توں بعد کئی سو گنا منافع سمیٹن دا ٹائم شروع ہندا اے ۔ بھرے بھڑولیاں والے ایویں تے نہیں سیاسی قیادتاں دی اے ٹی ایم مشیناں بن دے۔ اوہناں اپنا مارک اپ تے لینا ای لینا اے۔ بوجھ سارا عوام تے پیند ااے تے ایس گل اُتے حیران اے بازار وچ آٹا 80روپے کلو وکدا اے تے حکومتی ترجمان ٹی وی اُتے رولا پاندے نیں، 40روپے کجھ پیسے دا ریٹ اے جتھوں مرضی خریدو اوہناں دی ایہ گل سن کے لوکی خواب وچ ای سرکاری ریٹ اُتے آٹا خرید رہے نیں۔ عوام تے ایس پاروں بے جان اے ہن چینی بحران دا شو شروع اے۔ چینی بازاروں 80روپے کلو لبھ رہی اے ایہدا ریٹ 100توں ودھ جانا اے۔ لہٰذا کھنڈ دی تھاں زہر ای پھکو۔ ایہ وی ویلے سر ای پھکو کیونکہ اگے کپاہ دا بحران وی آنا اے، دالاں، سبزیاں، کنک، خوردنی تیل، گیس پٹرول، بجلی تے ہور پتہ نہیں کہڑے کہڑے بحران آنے نیں۔
ایس ویلے ہاٹ کیک کرنٹ ایشو چینی بحران اے۔ ایہ چین والے چینی نہیں بلکہ کھان والی چینی یعنی مٹھے دا بحران اے۔ جدوں تائیں پنجاب وچ گڑ ، شکر تے دیسی کھنڈ دا رواج رہیا، مٹھے دی لوڑ تھوڑ نہیں سی۔ پنڈاں، قصبیاں، چھوٹے شہراں وچ ایہو مٹھا چلدا سی، کوئی شہروں پروہنا آ جائے تے چاء وچ ’’ولیتی کھنڈ‘‘ پائی جاندی سی جس نوں ہن اسیں چینی کہنے آں۔ شوگر ملاں ودھیاں تے ایہ دھرو وی ہویا گڑ، شکر، دیسی کھنڈ بنان تے پابندی لا دتی گئی جس ایریے وچ شوگر مل ہندی اوتھوں دے کاشت کار چوری چھپے گھر لئی مٹھا کڈھدے رہے۔ ایہ حقیقت وی اپنی تھاں اے جدوں دا چینی دا رواج شروع ہویا اے شوگر ملاں ودھیاں نیں۔ انساناں وچ وی شوگر دی بیماری ودھ گئی اے۔ مائیکرو فنانس والیاں نوں چاہی دا اے گڑ، شکر، دیسی کھنڈ لئی فنانسنگ کرن۔پاکستان وچ کسے وڈی تبدیلی توں بغیر ایہ بحران ختم نہیں ہو سکدے۔ اک بحران مُکے گا تے دوجا اکھ پُٹے گا۔ عوام بھاویں گیس دیاں قیمتاں کئی سو ودھن تے باں باں کرے کردی پھرے حکومت نوں ’’سرمد کھوسٹ‘‘ دی فلم ’’زندگی تماشا‘‘ بین کرن توں فرصت نہیں۔فی الحال آٹا بحران دے بعد چینی بحران شروع اے۔ پیپلزپارٹی، نواز لیگ، پی ٹی آئی وی شوگر مل مالکان نال بھری اے۔ نیب والے آصف زرداری، میاں برادران، مریم نواز تے چودھری برادران نوں کُرلاندے سن۔ ایتھے تے آوے دا آوا وگڑیا نکلیا اے۔ حکومتی بنچ شوگر مافیا نال بھرے نیں اوہ منن لئی تیار نہیں کہ چینی بحران اے کہندے نیں سب نارمل اے، بھاویں سب کجھ ابنارمل اے۔ مخدوم خسرو بختیار کہندے نیں کوئی چینی بحران نہیں بس ایویں ای ’’طلب رسد‘‘ دا معمولی معاملہ اے اوہ خود وی شوگر مل مالک نیں شوگر مل مالک جہانگیر ترین چینی بحران نوں ’’حکومتی ٹیکس‘‘ دے سر مڑھدے نیں۔ یعنی اپنی ای حکومت نوں قصور وار ٹھہراندے نیں۔ وزیر مملکت برائے ریونیو حماد ڈار اپنی جگہ سوالیہ نشان نیں کہ ٹیکس تے صرف ساڈے ساڈھے تن روپے ودھیا اے تے چینی دی قیمت 25روپے فی کلو کیویں ودھ گئی؟ عوام اپنی تھاں رو پٹ رہی اے کہ 115گرام دی روٹی 10روپے دی اے۔ وزن کرو تے 80گرام دی نکلدی اے۔ ایہہ کیہ چمتکار اے اُتوں کھنڈ دی قیمت دا گٹو سر تے آ ڈگیا اے۔کپتان صاحب دی ٹیم دے اسد عمر وی آتا بحران تے چینی بحران نوں نہیں تسلیم کردے ۔ اک پاسے شوگر مافیا فعال اے تے دوجے پاسے حکومتی ترجمان سرگرم نیں کہ اوہناں دی حکومت وچ کوئی بحران نہیں۔ جے کوئی بحران ہے وی تے اوہ پچھلی حکومتاں دی کارستانی اے۔ چودھری شوگر مل کیس وچ جدوں بی بی مریم نواز گرفتار ہوئی بڑا شور پایا گیا کہ بی بی مریم نواز تے آصف دی گرفتاری دی وجہ ایہ سی۔ اوہناں شوگر باہر گھلی ای نہیں تے سبسڈی کلیم کر لئی۔ ہن بھانڈا ایہ پھٹ رہیا اے ایہ کم تے اوہناں ساریاں شوگر ملاں، سٹاکسٹاں دا اے جو چینی باہر گھلدے رہے۔ چینی دی قیمتاں وچ اضافے دی وجہ شوگر مل مالکان ایہ وی دسدے نیں کہ 40کلو گنے وچوں 4کلو چینی نکلدی اے۔ اسیں 240روپے گنا خریدنے آں ایس لئی قیمت ودھی۔ گنے دے کاشتکار ٹپدے نیں، مائی باپ مل والے گنے دا ریٹ 192توں 205روپے لاندے نیں اوہ وی نہیں دیندے۔گنا پیا پیا سُک جاندا اے چینی بحران وی آٹا بحران وانگوں اے۔ مرکزی حکومت ایہدی ذمہ داری سندھ حکومت تے سُٹ رہی اے جو پیپلزپارٹی دی اے جد کہ سندھ دے وزیراعلیٰ مراد علی شاہ کہہ رہے نیں ایکسپورٹ دی سبسڈی دا ریکارڈ پھول لوو، پی ٹی آئی دے رتن جہانگیر ترین نوں وی سندھ حکومت نے سبسڈی دتی اے ایہنوں کہندے نیں ہور دوجیاں دے منجے تھلے ڈانگ پھیرو۔چینی بحران دا ویروا کردیاں ایہ گل چیتے رہوے کہ وڈے کاروباری خاندان شوگر انڈسٹری دا حصہ نہیں۔ شوگر انڈسٹری وچ زیادہ تر سیاستدان نیں جو سیاست وچ براہ راست نہیں، اوہ سیاست داناں دی کنڈ مغرے نیں یا سیاستدان اوہناں دی کنڈ مغرے نیں۔ ق لیگ جو کہ ہن تحریک انصاف دی حکومت دا حصہ اے اوہناں دی شوگر ملاں بارے انکوائری پرویز مشرف نے رکوائی سی ہن اپوزیشن ن لیگ تے پیپلزپارٹی کڑکی وچ اے، اوہناں دیاں انکوائریاں خورے نیب قنون وچ ہون والی متوقع تبدیلی رکوائے گی یا کوئی ہور جھرلو پھرے گا۔ لوک چینی تے آٹا لبھدے پھردے نیں۔ موج اکبری منڈی لہور، پشور، کوئٹہ، حیدر آباد تے کراچی دے ’’سٹہ بازاں‘‘ دی اے۔ عوام وڑے بھانڈے وچ۔ بھڑولے پھرن والیاں نے عوام توں وتاؤں لینے۔چینی بحران تے بعد دی گل اے اوس توں پہلاں تے جنوبی پنجاب دی معیشت دا بیڑہ غرق ہویا اے۔ زراعت دا بھٹہ بیٹھا اے کیونکہ پچھلے چینی بحران دے لالچ وچ گنے دی قیمت ودھن دی توقع نال شوگر ملاں توں فوری پے منٹ ملن دی خواہش وچ جنوبی پنجاب وچ کپاہ گھٹ بیجی گئی تے زیادہ رقبے اُتے گنے دی کاشت ہوئی۔ ایہدا مطلب اے ہن آٹا، چینی، پٹرول، گیس دے بحران توں بعد اگلا بحران ’’کپاہ بحران‘‘ ہووے گا۔عوام نوں ایس نال کوئی غرض نہیں کہ حکومت نوں اپوزیشن توں بوہتا خطرہ اے یا اپنے اتحادیاں کولوں؟ یا فیر اپنی 16مہینیاں دی ناقص کارکردگی کولوں؟ عوام تے ایس یوٹرن اُتے حیران و پریشان اے کہ پنجاب حکومت نے صوبے دے تمام اداریاں دے سکیل نمبر اک توں لے کے 21دے ملازمین تے افسراں لئی بچیاں دی میرج گرانٹ، ہونہار بالاں لئی سکالر شپس تے تجہیز و تدفین دے وظیفیاں وچ جو پنج ہزار توں لے کے پندراں ہزار روپے دا اضافہ کیتا سی اوہ اچانک واپس لے لیا گیا اے۔ باقاعدہ جاری ہون والے نوٹیفکیشن دی واپسی بعد ملازماں مایوس ہون یا غصہ کرن ایہ اوہناں دی مرضی۔ ایس بارے اوہناں نوں نویں پاکستان وچ مکمل آزادی اے ایسے طراں ایجوکیشن دے ملازماں دے جو بچے سکینڈری جماعت تے اتانہہ کالج یونیورسٹی پڑھدے نیں جے اوہ 90فیصد یا اوس توں ودھ نمبر لیندے تے اوہناں نوں ’’بناولٹ فنڈ‘‘ تن ہزار توں 50ہزار تائیں لبھدا سی۔ اوہنوں ڈبل کرن دی حکومت نے خش خبری سنائی فیر یوٹرن لیا تے مُکر گئی۔ حکم ہویا اوسے تنخواہ تے کم کرو ’’بناولٹ فنڈ‘‘ وچ کوئی وادھا نہیں۔ایتھے چینی بحران نال نبڑن تے چینی مافیا نوں ٹھیک کرن لئی اتلیاں کول ٹائم نہیں۔ حکومت لئی ہور بڑے انٹرنیشنل مسائل نیں ووٹ لین پچھوں، فرشتیاں ہتھوں صندوقڑیاں بھرن توں بعد عوام دا پچھوڑا سیکنا اے؟ عوام نوں ایس نال کوئی غرض نہیں کہ حکومت نوں اپوزیشن توں بوہتا خطرہ اے یا اپنے اتحادیاں کولوں؟ یا فیر اپنی ناقص کارکردگی کولوں؟ عوام تے ایہ سوچ کے خش اے چلو فی الحال خواب ویکھن تے کوئی پابندی نہیں کوئی سنسر نہیں۔ خواب وچ جس دی چاہو ماں بھین اک کر دیو جہڑے بھاء چاہو آٹا ، چینی، گیس، پٹرول تے بجلی خریدو، پیسے بھاویں دیو یا نہ دیو۔

اپنا تبصرہ گھلو