کتاب کلچرتے اسیں

لکھت: ڈاکٹر اخترشمار

علامہ محمد اقبال نے آکھیا سی :
محو حیرت ہوں کہ دنیا کیا سے کیا ہو جائے گیواقعی جیویں جیویں سائنسی ترقی ہو رہی اے، انسان وی اک مشین بن کے رہ گیا اے، اک زمانے وچ لوک دور دور رہندیاں ہوئیاں اک دوجے نال خطاں دے راہیں منسلک ہویا کردے سن۔ مہینیاں بعد کوئی خط آئوندا تے لوک اپنے پیاریاں دی لکھی تحریر نوں اکھاں نال لاندے سن، خط دی خشبو تے جاں، دل معطر کردے سن، ڈاکیے دی راہ ویکھی جاندی چٹھی لئی، پر ہن خط دی تھاں موبائل انٹرنیٹ تے سکائپ نے لے لئی، انج بظاہر فاصلے تے گھٹ ہو گئے تے دور رہن والے نیڑے آئے پر اوہ جہڑے نیڑے تے آلے دوالے دے لوک سن اوہ اک دوجے توں دور ہوندے جاندے نیں اک ای کمرے وچ اک ٹبر دے لوک بیٹھے ہوئے موبائلاں تے مصروف نیں تے آلے دوالے توں قدرے بے نیاز ہون لگے نیں، سوشل میڈیا دے بازار وچ اسیں رات دن اپنے آپ توں غافل ہوندے جانے آں، ماواں اپنے گھروچ بیٹھے ہوئے بالاں نوں وی موبائل میسج دے راہیں بلاندیاں یں کہ پتر آ جا کھانا تیار اے، اپنے کمرے توں نکل آ۔نویں نسل تے 24گھنٹے موبائل یاں کمپیوٹر سکرین نال چپک کے رہ گئی اے اوہناں دے کھان پین دا کوئی ویلا نہیں رہیا، رات نوں اوہ باہروں آن لائن کھانا منگواندے نیں صبح دیرنال جاگدے نیں، ناشتہ پہلاں تے سکول کالج کیفے وچ جا کے کردے نیں یاں جے چھٹی ہووے تے گیارہ وجے توں اک وجے تک اوہ ناشہ کردے نیں لنچ دی واری مغرب تک آندی اے تے فیر کافی رات نوں ڈنر….کمپیوٹر موبائل نے اعصاب شکن کردتے نیں ہن کتاباں وی آن لائن پڑھی جاندیاں نیں ریسرچ لئی گوگل دا سہارا لیا جاندا اے ، جدوں سماج توں کتاب دے قاری نایاب ہو رہے ہون تے ادبی رسائل جرائد تے اخبارات کون پڑھے گا؟ کتاب نوں ہتھ وچ لے کے پڑھن والی شاید ایہ آخری نسل ہووے۔ادب وی ڈیجیٹل ہوندا جا رہیا اے ہن لوک شاعری افسانے پڑھن دی بجائے سکرین تے ویکھن سنن دے عادی ہو رہے نیں، بس کجھ لوک نیں جہڑے کتاباں خریددے نیں، رسائل جرائد پڑھدے نیں، باقی نویں نسل دے کول ویلا ای نہیں۔ ایہ ساریاں گلاں ایس لئی یاد آ گئیاں کہ دو تن رسالے اکٹھے موصول ہوئے خوشی ہوئی کدی اسیں وی ادبی اخبار تے فیر ادبی جریدہ شائع کردے سی پر ہن ادبی جرائد پڑھن والے وی فیس بک تے وٹس ایپ تے آ گئے نیں سو ایسں تے پچھلے ورھے رسالہ بند کر دتا سی، لائق تحسین نیں اوہ دوست جہڑے ایہ خسارے دا کم جاری رکھے ہوئے نیں۔ ادب لطیف تیسطیر ادبیات، بیاض، الحمراء، تخلیق، فانوس، ادب دوست، مکالمہ ماہ نو، الزبیر، مخزن، نوادر، نقاط الماس، پیلھوں چہار سو رنگ ادب تے کئی دوجے ادبی جرائد دا دم غنیمت اے۔بعض یونیورسٹیاں دے تحقیقی مجلے سال وچ اک واری یاں دو واری شائع ہوندے نیں، پر ایہناں دے پڑھن والے صرف پروفیسر یاں اہل قلم نیں، خیر گل رسائل دی ہو رہی سی تازہ الحمرا وچ ایس واری ممتاز شاعر جمیل یوسف دا گوشہ شائع کیتا گیا اے، ایس توں علاوہ تحقیقی و تنقیدی مضامین تے ادبی نگارشات وی شامل نیں، ایس پرچے وچ منیر نیازی دے حوالے نال عمران بابر جمیل دا دلچسپ مضمون وی شامل اے۔ منیر نیازی ساڈے اردو تے پنجابی دے اچھوتے شاعر سن اوہناں دی شاعری دے علاوہ گلاں تے چٹکلے وی ساڈی یاداں دا اثاثہ نیں، کجھ واقعات عمران بابر جمیل نے بیان کیتے، منیر نیازی نے لڑکپن وچ نیوی وچ نوکری کیتی سی، عمران بابر جمیل نے نیول اکیڈمی دے اک مشاعرے دا ذکر کیتا جہدی صدارت منیر نیازی نے کیتی سی آخر وچ اوہناں نے نیول چیف دی موجودگی وچ مختصر خطاب وی کیتا تے آکھیا: نیول چیف صاحب توں تہاڈے ساریاں دی موجودگی وچ ایہ گزارش کرنا آں کہ میرا ناں فوجی بھگوڑیاں دی لسٹ توں کڈھ دتا جاوے ایس انکشاف تے نیوی دے جوان تے افسر سب حیران رہ گئے۔ منیر نیازی نے دسیا کہ میٹرک دے بعد اوہ نیوی وچ بھرتی ہوئے سن پر دل نہ لگن پاروں اوہ بھج آئے سن ، اوہ ایہ انکشاف سرعام کر رہے سن جتھے اوہ اک پروہنے دی حیثیت نال مدعو سن…. ہن اجہے لوک گھٹ رہ گئے نیں جہڑے اپنے بارے پورا سچ بولن دی جرات رکھدے ہون، شاہد علی خان دے الحمرا دی خوبی ایہ وی اے کہ اوہ تواتر دے نال ہر مہینے اپنے قارئین تک اپڑ جاندا اے تے ساڈے وچوں زیادہ اجہے وی نیں جہڑے رسالہ وصول کرکے اطلاع تک نہیں دیندے، رسالہ کیہ ہن تے تسیں کافی ڈاک خرچ کرکے اپنی کتاب کسے شاعر ادیب نوں گھلو تے اوہدی رسید وی بڑی مشکل ای ملدی اے، ایس لئی وی اسیں فیس بک تے رسالے یاں کتاب دی تصویر پوسٹ کر دیندے نیں انج کرن والے وی ہتھ دی انگلیاں تے گنے جا سکدے نیں۔
حال وچ ای نوجوان شاعر طارق اسد دا شعری مجموعہ گم شدہ خاک شائع ہویا اے، طارق نے اپنے لہجے وچ نکھار پیدا کیتا اے، اوہ شہرت دے پچھے بھجن دی بجائے مطالعے تے تخلیق تے توجہ دین دا قائل اے، دیباچہ غلام حسین ساجد نے تحریر کیتا اے جد کہ انتساب ممتاز اطہر تے جاوید اختر بھٹی دے ناں اے، تفصیل نال گل فیر ہووے گی فی الوت کئی دناں توں اک ہور کتاب وی ساڈے کول پئی اے، فرخندہ شمیم اسلام آباد وچ رہندیاں نیں شاعری تے افسانہ تخلیق کردیاں نیں، اوہناں دا تازہ مجموعہ ماں دے ناں توں شائع ہویا اے جہدے وچ اوہناں دیاں نظماں شامل نیں، احسان اکبر، ڈاکٹر نثار ترابی، رشید نثار دے علاوہ ڈاکٹر ضیا الحسن تے قیوم طاہر دی آرا وی کتاب دا حصہ نیں، فرخندہ شمیم نے خواتین شاعراں وچ اپنے منفرد لہجے دی اک جینوئن شاعرہ نیں، ٹیلی ویژن نال وابستگی دے سبب اوہ ادبی حلقیاں وچ زیادہ متحرک نہیں رہن، ہن ریائرمنٹ دے بعد اوہناں دا تخلیقی کم منظرعام تے آ رہیا اے، ایس توں پہلاں اوہناں دے افسانیاں تے مشتمل مجموعہ مٹی اور پاں شائع ہو چکیا اے دوواں تخلیق کاراں نوں مبارک ہووے۔

اپنا تبصرہ گھلو