چوہدری رِنج: ان ہائوس تبدیلی دیاں چہ مگوئیاں!

shahid nadeem

لکھت: شاہد ندیم احمد

پاکستان تحریک انصاف دی سرکردہ اتحادی جماعت مسلم لیگ (ق) وی حکومت تے ایہدی کارکردگی توں مطمئن نہیں تے سمجھدی اے کہ حالات بد توں بدتر ہو چکے نیں۔ سپیکر پنجاب اسمبلی چودھری پرویز الٰہی آخر کار پھٹ پئے، اوہناں نے صحافیاں نوں سد کے اپنا سارا دکھڑا ساہمنے رکھ دتا اے۔ اوہناں دا کہنا بڑا معنی خیز اے کہ اتحادیاں نال غیراں ورگا سلوک کیتا جا رہیا اے، ایہ گل حیران کن اے کہ عمران خان ایم کیو ایم دی ذرا جہی رنجگی برداشت نہیں کردے تے ملن ملان دی راہ کڈھن لگدے نیں، پارٹی دے اندر کوئی انتشار نظر آوے تے سارے کم چھڈ کے پچھے پے کے اوہنوں حل کردے نیں، پر کیہ وجہ اے کہ مسلم لیگ (ق) توں خفا وکھائی دیندے نیں، انج لگدا اے کہ عمران خان نوں اندرلے خانے چودھری صاحبان دے شریف برادران دے نال تعلقات دی بحالی دی خبر مل گئی اے ، جہدی وجہ توں اوہ کھچے کھچے نظر آندے نیں۔ دوجے پاسے چودھری پرویز الٰہی کھل کے شکوے، شکایت کرن دے نال برے سلوک دے طعنے وی دے رہے نیں، پچھلے دناں وزیراعظم نے مسلم لیگ (ق) نال مذاکرات لئی جہڑی کمیٹی بنائی، اوہنوں وی بدل دتا گیا اے، گویا مذاکراتی کمیٹی دے طے کیتے معاملات عمران خان نوں قبول نہیں، ایس لئی باہمی اختلافات دور کرن دی گل نویں سرے توں شروع ہوگئی اے۔یہدے وچ شک نہیں کہ بظاہر تحریک انصاف تے مسلم لیگ (ق) وچکار اختلافات دی وجہ پنجاب تے وفاق وچ منگی جان والی وزارتاں نیں جہدے لئی حکومت تے مسلم لیگ (ق) وچ خاموش جنگ جاری اے۔ پچھلے دناں ایہناں اختلافات پاروں تحریک انصاف فارورڈ بلاک نے جنم لیا جہنوں وزیراعلیٰ پنجاب عثمان بزدار نے اپنے اثر و رسوخ پاروں شروعات وچ ای رام کر لیا، پر مسلم لیگ (ق) دے سینئر رہنما پنجاب وچ اپنی حکومت قائم کرن یاں فیر مرکز تے پنجاب وچ ہور وزارتاں دے خواہاں نیں۔ تحریک انصاف ایس معاملے نوں زیادہ اچھالن دی بجائے دبے پیریں حل کرن دی کوشش کر رہی اے جد کہ وزیراعظم عمران خان کئی واری باور کروا چکے نیں کہ اوہناں دے وزیراعلیٰ عثمان بزدار ای رہن گے۔ ایہدے نال نال ایہ گل وی لُکی نہیں رہی کہ مولانا فضل الرحمان دے دھرنے دے پچھے تے عثمان بزدار دے خلاف مہم جوئی وچ چودھری برادران دا ہتھ رہیا اے۔ اک توں ودھ واری ایہ افواہواں وی منظم طریقے نال اُڈائی گئیاں کہ پنجاب نوں چلانا عثمان بزدار دے وس دا روگ نہیں، صرف پرویز الٰہی چلا سکدے نیں۔وزیراعظم عمران خان نے پنجاب دے حوالے نال جہڑے سازشیاں دا ذکر کیتا سی، کسے نہ کسے خانے وچ چودھری برادران دا ناں وی ضرور لکھیا ہووے گا ، اجہے حالات وچ کپتان نوں زیردام لیانا ممکن نہیں اے۔ جے گل صرف مطالبات دی ہوندی تے عمران خان ولوں اینی سرد مہری دا مظاہرہ نہ کیتا جاندا، کیوں جے مطالبات تے ایم کیو ایم وی کر رہی اے تے جی ڈی اے وی، اختر مینگل نے وی مطالبات دی فہرست سرکار نوں تھما رکھی اے، حکومت دا دوجیاں دے مقابلے وچ مسلم لیگ (ق) دے نال رویہ وکھرا اے۔ تحریک انصاف دے سارے ناراض اتحادی جماعتاں نال نہ صرف رابطے جاری نیں سگوں وزیراعظم کابینہ دے اجلاس وچ بار بار خالد مقبول صدیقی بارے پچھدے رہندے نیں۔ وزیراعظم عمران خان نے مسلم لیگ (ق) نوں بساط توں ودھ کے نوازیا اے، الیکشن توں پہلاں اوہنوں نشستاں خالی کرکے تے الیکشن دے بعد وفاق تے صوبے وچ وزارتاں تے پنجاب دی سپیکر شپ دے کے چودھری برادران نوں پنجاب وچ دوبارہ متحرک ہون دا بھرواں موقع دتا اے، نہیں تاں حقیقت ایہو اے کہ چودھری برادران دی نوازشریف دور وچ سیاست ختم ہو چکی سی۔ وزیراعظم دے منصب تے بیٹھا ہویا بندہ بے خبر نہی ہوندا۔ اوہدے کول درجناں اجہے ادارے ہوندے نیں جہڑے چڑیا دے پر مان دی خبر وی دیندے نیں،ایہدے توں قطع نظر کہ بعض اوقات دتی جان والی خبراں حکومت دے مفاد وچ چنگیاںنہیں ہوندیاں۔ایہ امر تشویشناک اے کہ مسلم لیگ (ق) اجہے حربے آزما رہی اے جہڑے حکومت لئی پریشانی دی وجہ بن دے رہے نیں، مثلاً کجھ عرصہ پہلاں اک اجہی ویڈیو لیک کیتی گئی جہدے وچ ایہ الزام لایا گیا کہ گورنر پنجاب چودھری سرور پنجاب حکومت دے معاملات وچ مداخلت کر رہے نیں، ایہدے نال انتظامیہ تے پلس افسراں دی تعیناتی وچ چودھری برادران دے اختیارات چاہن دی گلاں وی زبان زد عام ہوندی رہندیاں نیں۔ ایس حوالے نال (ق) دے دوجے ارکان پارلیمنٹ کافی متحرک نظر آندے نیں، مونس الٰہی دی وزیراعظم عمران خان نال ملاقات دے بعد خلیج ہور ودھ گئی اے، چودھری پرویز الٰہی ، وزیراعظم عمران خان توں اینے دور ہو چکے نیں کہ اوہناں نوں پریس دا سہارا لینا پے رہیا اے، نہیں تاں کل تک چودھری صاحبان جدوں چاہندے، وزیراعظم نال ملاقات کر لیندے سن، کیہ بعید کہ پرویز الٰہی جہڑی سوتن دا طعنہ دے رہے نیں، عمران خان آپ ایسے تاثر وچ مبتلا ہون کہ مسلم لیگ (ق) سوتن ورگا کردار ادا کر رہی اے۔ چودھری پرویز الٰہی اک منجھے ہوئے سیاستدان نیں، پر نجانے کیویں عمران خان نوں سمجھن وچ غلطی کر گئے، پر ایہ چنگی گل اے کہ اوہ اجے تک پوائنٹ آف نو ریٹرن ول نہیں جا رہے، اوہ اج وی حکومت دے نال رہنا چاہندے نیں تے ایہ خواہش وی رکھدے نیں کہ تحریک انصاف حکومت اپنے پنج ورھے پورے کرے، پر اتحادی جماعتاں نوں ہر ویلے شک دی نظر نہیں ویکھیا جاوے، ایہدے نال باہمی بے اعتمادی ودھدی اے۔ چودھری پرویز الٰہی اک پاسے بے جا شک نہ کرن دی ترغیب دیندے نیں تے دوجے پاسے ایہ افواہ وی گرم اے کہ مسلم لیگ (ن)، پیپلزپارٹی تے مسلم لیگ (ق) رل کے پنجاب وچ اِن ہاؤس تبدیلی لیان دی منصوبہ بندی کر رہیاں نیں، نویاں باریاں، بوہے کھولن دی گلاں ہو رہیاں نیں، پر چودھری برادران وعدیاں دی پابندی کرن والے نیں، دوجے پاسے مقتدر قوتاں اجے ایس سیٹ اپ نوں چھیڑنا نہیں چاہندیاں، کیوں جے عمران خان دے سوا اوہناں دے کول کوئی چنگا آپشن نہیں اے، عوام دی طرح مقتدر قوتاں وی آزمائے ہویاں نوں دوبارہ آزمان دی خواہاں نہیں، ایسے لئی مسلم لیگ (ق) کسے قسم دا رسک لین لئی تیار نہیں اے۔ اوہ صرف پنجاب دی وزارت اعلیٰ لئی تحریک انصاف دے نال مقتدر قوتاں نوں ناراض نہیں کرن گے۔ چودھری برادران دی اگلی نسل نے وی پاکستان وچ سیاست کرنی اے، ایس لئی اوہناں نوں وزارتاں توں ودھ اپنا سیاسی کردار قابل ترجیح اے۔تحریک انصاف حکومت دا مسلسل اتحادی جماعتاں نال ناراضگی دے بعد انج لگدا اے کہ وزیراعظم اتحادی سیاست دی سائنس توں واقفیت نہیں رکھدے، جد کہ دوجے پاسے حکومت دے ڈلیور نہ کرن تے خراب کارکردگی دی وجہ توں عوامی سطح تے ہون والے ردعمل نے وی اتحادیاں نوں ڈرادتا اے، ایسے وجہ توں اتحادی جماعتاں نے پر پُرزے کڈھنے شروع کر دتے نیں پر مسلم لیگ (ق) دے حوالے نال مونس الٰہی دا بیان قابل غور اے کہ اسیں حکومتی اتحاد توں نہیں نکلاں گے، جدوں تک کہ عمران خان سانوں دھکے دے کے نہ کڈھن، اینی محبت دے ہوندیاں ہوئیاں پرویز الٰہی دا سوتن ورگا سلوک دا شکوہ حیرانگی دا باعث اے۔ درحقیقت حالات اینے سادہ نہیں جنی سادگی نال بیان کیتے جا رہے نیں۔ تحریک انصاف تے مسلم لیگ (ق) وچ معاملہ وعدیاں دی تکمیل دا نہیں، سگوں اندرلے خانے پیٹھ وچ چھرا کھوبن دا اے، جہدے دور ہون وچ اجے شاید کجھ ویلا لگے گا، ایہناں حالات وچ چودھری صاحبان تے کپتان وچکار فاصلے تیزی نال ہور ودھ رہے نیں۔ دوجے پاسے سیاسی محاذ تے چہ مگوئیاں جاری نیں کہ اپوزیشن اِن ہاؤس تبدیلی دے آپشن دا استعمال کر سکدی اے، چودھری پرویز الٰہی آن والے وقتاں وچ حکومت دے خلاف جان لئی بنیاداں رکھ رہے نیں، پر حتمی فیصلہ مقتدر قوتاں دے اشارے دے بغیر نہیں کیتا جاوے گی

اپنا تبصرہ گھلو