اردو ادب دی ماں‘ بانوقدسیہ!

Akhtar sardar chaudhary

لکھت: اختر سردار چودھری

بانو قدسیہ 28 نومبر 1928 ء نوں مشرقی پنجاب دے ضلع فیروز پور وچ پیدا ہوئیاںتے تقسیم ہند دے بعد لہور آ گئیاں سن۔اوہناں دے والد بدرالزماں اک گورنمنٹ فارم دے ڈائریکٹر سن تے اوہناں داانتقال 31 ورھے دی عمروچ ہو گیا سی۔ اوس ویلے اوہناں دی ماں ذاکرہ بیگم دی عمر صرف 27 ورھے سی۔ بانو قدسیہ دی عمر اوس ویلے ساڈھے تن ورھے سی۔ اوہناں دا اک ای بھرا پرویز سی جہدا پہلاں ای انتقال ہو چکیا سی۔
بانو قدسیہ نے ابتدائی تعلیم اپنے آبائی قصبے ای وچ حاصل کیتی۔ اوہناں نے کنیئرڈ کالج برائے خواتین لہور توں ریاضیات تے اقتصادیات وچ گریجویشن کیتا۔ بعدوں اوہناں نے 1951ء وچ گورنمنٹ کالج لہور توں ایم اے اردو دی ڈگری حاصل کیتی۔ اوہناں نوں بچپن توں ای کہانیاں لکھن دا شوق سی تے پنجویں کلاس توں اوہناں نے باقاعدہ لکھنا شروع کر دتا سی۔ جدوں پنجویں کلاس وچ سن تے سکول وچ ڈرامہ فیسٹیول دا انعقاد ہویا جہدے وچ ہر کلاس نوں اپنا اپنا ڈرامہ پیش کرنا سی۔ کافی کھوج دے باوجود وی کلاس نوں 30منٹ دا کوئی سکرپٹ نہ ملیا ۔ چنانچہ کلاس فیلوز تے اساتذہ نے ایس مقصد لئی بانو قدسیہ ول ویکھیا جہناں دی پڑھن لکھن دی عادت کلاس وچ سب توں ودھ سی۔ اوہناں توں عرضی کیتی گئی کہ تساں ایہ ڈرامہ لکھ دیو۔ اوہناں نے ایس چیلنج نوں قبول کردیاں ہوئیاں جنی وی اردو آندی سی ایس ڈرامے وچ لکھ دتی۔ ایہ اوہناں دی پہلی کاوش سی۔ ایس ڈرامے نوں پورے سکول وچوں پہلا پرائز ملیا۔ ایس حوصلہ افزائی دے بعد اوہ میٹرک تک افسانے تے ڈرامے ای لکھدی بانو قدسیہ نے 1981 وچ ’’راجہ گدھ‘‘ لکھیا جہدا شمار اردو دے مقبول ترین ناولاں وچ ہوندا اے۔ اوہناں دی کل تصانیف دی تعداد دو درجن توں ودھ اے تے ایہناںوچ ناول، افسانے، مضامین تے سوانح شامل نیں۔ اوہناں نے اردو دے علاوہ پنجابی زبان وچ وی بہت لکھیا جد کہ پاکستان ٹیلی ویژن لئی کئی ڈرامے لکھے جہناں نوں بے پناہ مقبولیت حاصل ہوئی۔اردو دی مقبول و معروف ناول و افسانہ نگار بانو قدسیہ اپنے عہد دی قد آور مصنفہ سن۔ اوہ معروف ادیب اشفاق احمد دی بیوی سن۔ اوہناں دی کہانیاں، افسانے تے ناول معاشرے دی عکاس نیں، اوہناں دیاں تحریراں وچ حقیقت پسندی، معاشرتی مسئلیاں دی بھرویں جھلک نظر آندی اے۔ بانو قدسیہ لہور وچ 4فروری 2017ء نوں انتقال کر گئیاں سن، اوہناں دی عمر 88ورھے سی۔ اوہ کئی دن علیل رہیاں تے ہسپتال وچ زیر علاج سن کہ خالق حقیقی نال جا ملیاں۔ دنیائے ادب دا روشن ستارہ ہمیشہ ہمیشہ لئی ڈُب گیا۔ ادب دی دنیا وچ بانو قدسیہ دا ناں بطور بانو آپا تے اردو ادب دی ماں دے طور تے ہمیشہ یاد رکھیا جاوے گا۔بانو قدسیہ لمے عرصے تک اپنی کہانیاں دی اشاعت تے توجہ نہ دے سکیاں تے ایم اے اردو کرن دے دوران اشفاق احمد دی حوصلہ افزائی تے اوہناں دا پہلا افسانہ ’’داماندگی شوق‘‘ 1950ء وچ اوس ویلے دے اک سرکردہ ادبی جریدے ’’ادب لطیف‘‘ وچ شائع ہویا۔ بانو قدسیہ نے مشہور ناول و افسانہ نگار تے ڈرامہ نویس اشفاق احمد نال شادی کیتی۔ بانو قدسیہ دی اوائل دی زندگی تے جے اک نظر پائی جاوے تے پدری شفقت توں محروم دھی سن، پڑھی لکھی ماں تے نانا دی محبت دے پرچھاویں وچ تربیت حاصل ہوئی اک اجہے دور وچ جدوں کُڑیاں دا گھر توں باہر نکلنا وی معیوب سمجھیا جاندا سی، صرف دینی تعلیم ای کُڑیاں کل اثاثہ سمجھیا جاندا سی۔ بانو قدسیہ اوس زمانے وچ یونیورسٹی تک زیور تعلیم نال آراستہ ہوئیاں۔ اشفاق احمد جہے پڑھے لکھے خوبرو نوجوان دی محبت و توجہ حاصل ہوئی۔اشفاق احمد دے بیرون ملک جان دے بعد اوہناں دی واپسی دا انتظار کیتا، دوواں نے اک دوجے نال کیتے وعدے نوں پورا کرن لئی شادی کیتی جہدے تے اشفاق احمد نوں اپنے گھر والیاں دی مزاحمت دا ساہمنا وی کرنا پیا سی، ایہدے باوجود اوہناں نے اپنی نویں زندگی دا آغاز کیتا، ایسے مزاحمت دے پیش نظر بانو قدسیہ نے آئندہ دی زندگی وچ آن والے کٹھن مرحلیاں نوں برداشت کیتا، سخت محنت کردیاں ہوئیاں اشفاق احمد دا ہر لمحے ہر منزل تے ساتھ دتا، اک دوجے دی بھرپور ہمت ودھاندے رہے سارے گھریلو فرائض انجام دتے، بالاں دی بہترین تربیت کیتی، ایتھوں تک کہ دوواں اک دوجے لئی لازم و ملزوم ہو چکے سن، اک دوجے دا لباس سن تے ہر معاملے وچ پردہ وی رکھدے سن۔بانو قدسیہ نے ناول، کہانیاں تے ڈرامے لکھے جہناں وچ راجہ گدھ دے علاوہ بازگشت، امربیل، دوسرا دروازہ، تمثیل، حاصل گھاٹ اور توجہ کی طالب ، قابل ذکر نیں۔ اوہ اپنے کالج دے میگزین تے دوجے رسالیاں لئی وی لکھدی رہیاں نیں۔ بانو قدسیہ نے اردو تے پنجابی زباناں وچ ریڈیو تے ٹیلی ویژن لئی بہت سارے ڈرامے وی لکھے، اوہناں دے اک ڈرامے آدھی بات نوں کلاسک دا درجہ حاصل اے جد کہ اوہناں دی دوجی تصانیف وچ آتش زیر پا،آدھی بات،ایک دن،آسے پاسے،چہارچمن،چھوٹاشہر،بڑے لوگ،دست بستہ،دوسرا قدم،فٹ پاتھ کی گھاس،حاصل گھاٹ،ہوا کے نام،ہجرتوں کے درمیاں،کچھ اور نہیں،لگن اپنی اپنی،مرد ابریشم،موم کی گلیاں،ناقابل ذکر،پیا نام کا دیا،پروا۔پروا اور ایک دن،سامان موجود،شہربے مثال،شہر لازوال آباد ویرانے،سدھراں،سورج مکھی وی شامل نیں۔ریڈیو تے ٹی وی تے بانو قدسیہ تے اشفاق احمد ادھی صدی توں ودھ عرصے تک حرف و صورت دے اپنے نرالے رنگ وکھاندے رہے۔ ٹی وی تے بانو قدسیہ دی پہلی ڈرامہ سیریل ’’سدھراں‘‘ سی جد کہ اشفاق احمد دی پہلی سیریز ’’ٹاہلی تھلے‘‘ سی۔ بانو قدسیہ دا پنجابی وچ لکھن دا تجربہ ریڈیو دے زمانے وچ ای ہویا۔ ریڈیو تے اوہناں نے 1965ء تک لکھیا، فیر ٹی وی نے اوہناں نوں بہت مصروف کر دتا۔ بانو قدسیہ نے ٹی وی لئی کئی سیریل تے طویل ڈرامے تحریر کیتے جہناں وچ ’’ دھوپ جلی ’’ خانہ بدوش ‘‘کلو ‘‘ تے ’’ پیا نام کا دیا‘‘ ورگے ڈرامے شامل نیں۔بانو قدسیہ دی علمی و ادبی خدمات دے اعتراف وچ حکومت پاکستان ولوں اوہناں نوں 2003وچ ’’ستارہ امتیاز ‘‘ تے 2010 وچ ’’ہلالِ امتیاز‘‘ نال نوازیا گیا۔ ایہدے علاوہ ٹی وی ڈرامیاںتے وھی اوہناں نے کئی ایوارڈز اپنے ناں کیتے تے ہن اوہناں نوں کمال فن ایوارڈ نال نوازیا جا رہیا اے ۔بانو قدسیہ جہناں نوں اسیں بانو آپا دے ناں نال وی جاننے آں نوں ساڈے توں بچھڑے تن ورھے لنگھ گئے نیں، ایس ویلے لہور دے جنوب وچ واقع ماڈل ٹاؤن دے ’’داستان سرائے‘‘ وچ اشفاق احمد تے بانو قدسیہ دیاں یاداں کھلری ہوئیاں نیں، ایہناں دوواں دا تخلیقی سفر جیویں جیویں طے ہوندا گیا ’’داستان سرائے‘‘ دے نقوش اُبھردے گئے، اج ’’داستان سرائے‘‘ ایہناں دوواں دی شب و روز محنت دا امین اے۔ اردو ادب دا اک ہور روشن باب بند ہو گیا۔ بانو آپا تے اردو ادب دی ماں ہمیشہ لئی ساڈے توں جدا ہو گئیاں۔ بانو قدسیہ دی ادبی و علمی خدمات تاریخ وچ لکھی جان گیاں۔ بانو قدسیہ دی وفات تے اردو ادب یتیم و مسکین ہو گیا تے ادبی دنیا وچ پیدا ہون والا خلا مدتاں پُر نہیں کیتا جا سکے گا۔ اوہ اپنی ذات وچ اک ادارہ دی حیثیت رکھدیاں سن تے اوہناں دی تحریراں، کہانیاں تے افسانے نویں لکھن والیاں لئی کسے ادارہ توں گھٹ نہیں سن۔ اللہ پاک اوہناں دی مغفرت فرمان۔ آمین

اپنا تبصرہ گھلو