عزت ذلت اللہ دے ہتھ وچ اے، وزیراعظم

اسلام آباد(بیورورپورٹ) وزیراعظم عمران خان آکھیا اے ساڈے کول سب توں وڈا اثاثہ ساڈے نوجوان نیں، پاکستان بہت جلد پورے خطے نوں لیڈ کرے گا۔ اسلام آباد وچ نیشنل انکوبیشن سنٹر سٹارٹ اپ دی تقریب نال خطاب کردیاں وزیراعظم عمران خان دا کہنا سی اللہ تعالیٰ نے انسان نوں بے پناہ صلاحیتاں نال نوازیا اے پر لوک کامیاب ایس لئی نہیں ہوندے کیوں جے اوہ ہار من جاندے نیں۔

وزیراعظم آکھیا دوجے پاسے کامیاب انسان کشتیاں ساڑ کے اگے ودھدا اے۔ ہر وڈے کم دے آغاد دے پچھے اک بہترین آئیڈیا ہوندا اے۔ انسان تجربیاں توں سیکھ کے ای اگے ودھدا تے مشکل ویلے توں لنگھ کے ای کامیاب ہوندا اے۔

اوہناں دا کہنا سی نکامی دا خوف انسان نوں بزدل بنا دیندا اے۔ زندگی وچ خوفزدہ ہون والیاں نے کدی وڈا کم نہیں کیتا۔

آزاد انسان اپنے راہواں دا آپ انتخاب کردا اے جد کہ ذہنی غلام زندگی وچ کدی کامیاب نہیں ہو سکدا۔ وزیراعظم عمران خان دا کہنا سی عزت تے ذلت دین والا اللہ اے، کوئی انسان تہاڈا کجھ نہیں وگاڑ سکدا جدوں معاشرہ غریباں دی مدد کردا اے اوہ اُتے چلا جاندا اے۔

اپنا تبصرہ گھلو