لہور ہائیکورٹ: پلاسٹک بیگز دے استعمال تے پابندی لان دا تحریری حکم جاری

لہور: ہائیکورٹ نے پلاسٹک بیگز دے استعمال تے پابندی لان دا تحریری حکم جاری کر دتا اے۔

جسٹس شاہد کریم نے ہارون فاروق دی عرضی تے 7صفحیاں تے مشتمل تحریری حکم جاری کیتا۔ عدالت عالیہ دے تحریری حکمنامے وچ ہدایت جاری کیتی گئی اے پنجاب دے سارے وڈے ڈیپارٹمنٹل سٹورز پہلے مرحلے وچ پلاسٹک بیگ دا استعمال مکمل طور تے ترک کر دین۔

عدالت نے پہلے وچ پنجاب دے سارے ہول سیلرز تے پلاسٹک بیگز دے استعمال تے وی پابندی لاگو کردیاں حکم دتا اے سارے ڈیپارٹمنٹل سٹوراں تے ہول سیلرز دو ہفتیاں وچ پلاسٹک بیگز دے متبادل انتظامات پورے کرن۔ تحریری حکم وچ آکھیا گیا اے محکمہ تحفظ ماحول لہور دے سارے وڈے سٹوراں نوں عدالتی حکم توں آگاہ کرکے عملدرآمد رپورٹ پیش کرے۔

عدالت نے صارفین لئی عدالتی حکم سارے وڈے سٹوراں تے نمایاں تھاں تے آویزاں کرن دا وی حکم دتا گیا اے۔ ایس عدالتی حکم نامے وچ مٹی وچ زائل ہون والے شاپنگ بیگز دا استعمال شہر دے سارے وڈے سٹوراں لئی لازمی قرار دتا گیا اے۔

اودھر محکمہ تحفظ ماحول دی رپورٹ دے مطابق پلاسٹک بیگز ماحولیاتی آلودگی وچ وادھے دا وڈی وجہ نیں جہناں تے پابندی لاگو کرنا لازم اے۔ پلاسٹک بیگز تے پابندی لاگو کرن لئی سارے سٹیک ہولڈراں نال میٹنگز ہو چکی اے۔ پلاسٹک بیگز دا استعمال مکمل طور تے ترک کرن دی تجاویز تے عملدرآمد کرن وچ تھوڑا ویلا چاہیدا ہووے گا۔

اپنا تبصرہ گھلو